شتان مابين الكبر والتعالي.......

[حمد الوايلي]

شتان مابين الكبر والتعالي=وشتان مابين العقل والجهالات
يلي تفرق بالحرام وحلالي=وتؤمن بان اصل التصرف قناعات
قلي مادام ان الزمن للزوالي=والفكر بين اقناع وبين الصراعات
وين الصحيح اللي عليه الجدالي=وين الخطا دام الخطا له علامات
نزاع فكري يبتدي بالتوالي=النفس ثم العقل ثم اكمل الذات
وحنا على فهم الحقيقه نبالي=ونسعى ورى قتل الجهل والخرافات
الى الهدف نمشي بروس الطوالي=وماينقطع حبل الفكر والطموحات
واظروفنا تغرنا بكل حالي=وتترك بعمق ارواحنا جمع واشتات
فضائنا واسع وماهو بخالي=فيه النجوم الساطعه بالسموات
ناخذ من اقرب ديننا مايوالي=ونبعد عن اللي ينفتح بالمتاهات
حتى نعيش بصافيات الليالي=واقلوبنا تسعد بكسب الحسنات
ألذ ماذقناه طعم الوصالي=لو يختلف من بيننا بالناكهات
احدن يذوقه مر والبعض حالي=وأحدن يذوقه دون مشها ورغبات
ياصعبها ذيك السنين الطوالي=وياسهلها عند اللقاء والخيالات
ستر الولي غطا خطا كالجبالي=وأذا اراد الكشف لو كبر ذرات
ماتخسره تنساه لو كان غالي=وماتكسبه تكثر عليه الغلافات
وبعض البشر شخصيته بانتحالي=يقضي حياته بالردى والتفاهات
وعن ماشرع ربي مجنب وسالي=مايدري ان العمر يقضي بلحظات
عش ماتريد ولاتعيش بضلالي =ابليس دربه تسلكه في خطوات
هذا بعض مما يدور بخيالي=تصوير ابسط للفكر واطلاعات
ياليتني جبت المفيد بمقالي=ومااكون مثل اللي تعب بالشعارات
ماينكتب يبقى ويطري ببالي=وماينمسح غير السطر والمسافات