انا على شانك نويت اريق دم المحبره

[صالح السالم]

انا على شانك نويت اريق دم المحبره=وانتي عليك ترددين الحرف من خلف اللثام
كذاب من قال ان درب العشق ما هز شعره=صوتك اليا مر المسامع راحت عزومي حطام
والله مدري كيف هزة صخرة الخافق مره=وكيف اشغلتني بعد ما فكت عصافير الغرام
قدرت تلم شتات شاعرها قبل ما تبعثره=وتملكتني قبل ما تبادلني اطراف الكلام
وشلون اوصفها وهي ليل(ن) ما يقدر يسهره=غير الجمال اللي نثر سحره ورى جنح الظلام
قلبٍ تمر بيومه العابر ولا تجيب اخبره=ما يستحق انه يعيش العمر في برد وسلام
يسوق عذره لي وهو لو صد ملزوم اعذره=حتى لو ان طيور خفاقي على وصله حيام
عذره يقول الوقت متخالط حديده ودرره=ولا ودي انزل بعد ما حلقت من فوق الغمام
وانا لو ان البعد كاسرني قبل ما يكسره=ما والله ارضى له ولا ارضى لي سوى راس السنام