ماني بأول خل فارق خليله

[عبدالرحمن الجابري الحربي]

ياللي نويت بفعلك اليوم البعاد=روّح مراح النجم في كل ليله
وش عاد لا فارقتني يعني وش عاد=ماني بأوّل خل فارق خليله
مع السلامة يارفيقٍ به عناد=مع السلامة خوّتك لي فشيله
حاولت أنا باصلاح حالك ولا فاد=ولاني على ذريّة آدم وكيله
في هالزمان الطيب ضيع له أجواد=خلى شبيهك في حياتي الحصيله
طعنتني والهم من طعنتك زاد=وش له تعاملني بغدرٍ وحيله
ما جاك مني غير وقفات وأمجاد=وأنت تجازيني بحقدٍ تشيله
يا كثر ما حلمي معك ياولد جاد=طوفتها وأنت تشب الفتيله
أبوي ربّاني على سلم الأجداد=سلم الرجال اللي مشوا بالفضيله
أوصاني بوصايا كما سيوفٍ حداد=تقطع رقاب اللي تنافض شليله
خل المراجل في حياتك لك وتاد=ترقى بها روس الجبال الطويله
خَلّك حكيمٍ تصدر الراي بركاد=واصحى من دروب الردى والرذيله
سوق الوفا والطيب تلقى به أجواد=تلمع كما لمع السيوف الصقيله
وادمح خطا صاحبك من دون تعداد=لابد يجيلك وقتٍ وترتكيله
يجلى الظلام النور وإن عاد له عاد=ما شيء خافي بالحياة الذليله
ولا شفت حولك يومٍ بروق ورعاد=اصحى لا ترقى فوق راسك مخيله
اللي يخونك منكر العيش والزاد=واللي يبيعك لا تشكّى رحيله
يا صاحبي شوفتك كانت ليَ أعياد=واليوم منك الروح صارت عليله
أحداث حلمٍ شفتها قدمي وكاد=من خان مرّة دوم يلعب بذيله
اسمك ووصفك بينهم فرق وميعاد=أربع حروف وتفترق بالفصيله
واللي رفع سبعٍ شداد بلا عماد=إن ما تزيل اللي براسك أزيله
واللي نويت بفعلك اليوم البعاد=مع السلامة خوّتك لي فشيله
وش عاد لا فارقتني يعني وش عاد=ماني بأوّل خل فارق خليله

بقلم / عبدالرحمن الجابري الحربي ،،،
" شاعر عظيم المشاعر "