يابو فهد ضيقت صدري بشكواك.......

[احمد العريفي]

عندما يشتكي اليك صديق عزيز جدا(خارج المملكه) ولا تملك اي وسيله للمساعده. فهنا يتدخل الشعر للتخفيف من المعانات.
وهذه القصيده موجه للاستاذ / احمد بن حمود القريشي

يابوفـهـد ضـيـقـت صدري بشـكـواك = الامــــر لله ما لنا فـيـه حـيـلـــــه

عـنـد الـولي يابوفــهـــــد داك ودواك = الله كــريـم وكـل هـمٍ يـزيـلــــــــه

نشـفـق على من كان مثلك وشـرواك = نـشـفـق على اللي مايمد الهـزيله

عـز الله انك هـقـوت اللي تـهـقـــواك = ربيع في وقت الـسـنـيـن المحـيله

ماضاق صدراللي على الدرب خاواك = ياعون من ضاعت عليه الوسيله

يابوفـهــد عـسـى الـبـلاوي تــعـــداك = وعـلـيـك سـتـر الله يضـفي شليله

يابوفـهـد كان اسـود الـوقـت عــاداك = ولاعـتـك بقعـاء بالحمول الـثـقيله

وبالمـعـمعـه يابوفـهـد تاهـت اريــاك = وحسيت وسط الصدر مثل المليله

عـليك باللى من عـنـا الوقـت ياقــاك = ربٍ كـريـمٍ مايـضـيـَع دخـيـلـــــــه

الـمـشـكـلـه يابوفـهـد ماقـدر انصـاك = الـوقـت ضـيـق والـمسافه طـويله

والا انت تـسـتـاهـل عـنا من تــعـناك = مثلك ترى يستاهـل اللي يـجـي له

احمد بن عبدالرحمن العريفي
(نديم المجره)