انا اشهد انك خوتك تطرب البال

[نايف سعد الخمعلي]

يالله انا طالبك ياغافر السيه = وحدك عليمٍ بجوفي ويش هو حاوي
عسى مزونِ مطرها خير وسميه = تسقي الديار المحول الي بها العاوي
ياذيب عهدٍ عليه ماخلف النيه = اما مثل خوتك والا فلا اخاوي
لاشك لك في غلاة البيد ماليه = والكل منا لسجات القدم هاوي
عينك تبي مسامر الضاوي خلاويه = حتى ولو كان جوعك للحشا طاوي
وعيني بها من عذاب القلب ماريه = لاشك ابا اصبر مدامي للصبر قاوي
ماشاقتك جلسة المشراق والفيه = وانا تساوى علي البرد والكاوي
عندك حياتك مابين ايديك مطويه = وعندي حياة الرغد والموت متساوي
اجيك كلي ولع ياسعدها جيه = واضحك ليا قلت ليه قصة الشاوي
وان غبت تلعب بوسط الجوف ملويه = عزي لمنهو يعيش الهم واللاوي
غديت مثل القليب اليا انحدر طيه = ياليل لاجيت جبت الهم لي ضاوي
ياليل سكن نجومك عني شويه = أزريت هوجاسها ياليل ماياوي
وياذيب مهما غدا للضيق ماريه = والله لاصبر مادامي للصبر قاوي