رســــــالــــه

[طيف القصيد]

يافيصل إلّحق ترى هرجك يسليني= سولف ترى الهم هز القلب واركانه
سولف عن اللي طرالك لاتخليني=شرق وغرب فداك الكون والوانه
اببتسم لو هروج الناس تكويني=وشعري على هرجتك باشيل قيفانه
وان سج فكري وهل الدمع من عيني=لاتلومني يابعد داري وسكانه
لاني عرفت القهرفي مطلع سنيني=والروح من علقم الويلات رويانه
يافيصل القلب هدته النياشيني=ادمت عروق الغلا من جورخلانه
شكواي لله من هموم تباريني=من صدة اللي عليه الروح شفقانه
وشلون اصدق اخويَ مايحاكيني=كني غريمه او من اشد عدوانه
من صغرنا ماجرحته لو يبكيني=والحين شابت بي ايامي على شانه
معقول عقب الاخوه مايراعيني=معقول ماضل لي في مهجته خانه
لي هامة ماخلق منهو يوطيني=ولي عزه ماوطاها الضيم وازمانه
لاكن غلاته ودم حن له فيني=خلى دموعي بوسط العين غرقانه
والله احبه لونه مايدانيني=وادور رضاه لوهو صك بيبانه
ويشهد علي الاله الي منشيني=من عزني يوم مادورت خذلانه
ان جاني بطيب ردت مثله إيميني=وليمن نكر طيبتي سامحت نكرانه
سولف يافيصل وحط إيديك بيديني=وشف كيف ذاب السجين وغاب سجانه
اضحك ونا معك بضحك يانظرعيني=واترك جروح البشر لله سبحانه