صوت حمد و صدى حماد ( حمد الضوي & شاعر البيتين )

[شاعر البيتين]

الطاقم الإداري في شبكة ويلان العربية من مراقبين و مشرفين و إداريين و جميع أعضاء هذا الصرح الراقي برقي أهدافه و سمو معانيه ,,
السلام عليكم ورحمة الله و بركاته ..
اعتذر عن غيابي في الفترة الماضية بسبب الظروف الخارجة عن الارداة و لعل هذه المساجلة الشعرية بيني و بين الأخ العزيز و الشاعر الكبير حمد الضوي شفيعة لي بعد هذا الانقطاع ..

ابيات الشاعر حمد الضوي مع المقدمة كما جاءت :

أبيات متواضعة مهداه للأخ العزيز : حماد الصالح ( ابو راكان ) : ( شاعر البيتين )

هلا بالإتصال اللي وصل من يم ابو راكان = هلا و اهلين ثم اهلين ثم اهلين ثم اهلين
هلابك يالصديق اللي بقيت من اصدق الصدقان = بوقت ٍ به مجانين البشر غطوا على الصاحين
كثير من الرجال لحاجته يبدي لك الصفطان = و الى منه حصل له ما يبي قفى مع المقفين
لكن حماد ذرب افعال و منزه عن النقصان = الى ذكروا رجاجيل الوفاء يحسب من الوافين
له التقدير مني و الثناء و الشكر و العرفان = رجل له قيمته و اغليه حيل و من عرب غالين
خلقنا اخوان يا حماد بالدنيا و نبقى اخوان = اعزك و احشمك و اقدرك من يومنا طفلين
تباعدنا المسافه عن بعضنا و الظروف احيان = و تقربنا الاخوه و المحبه و النسب و الدين
يد ٍ وحده سوى زان الزمن و الا اشلهب و شان = عسى يبقى الرفق ديدن لنا ما دامنا حيين
لكن اشوف مالك من تواجد مع عرب ويلان = و انا خابرك شاعر ما تجيب الا الجزيل الزين
قسم بالله ما قصدي مجامل لك يا بو راكان = لكن معجب بشعر ٍ تكتبه يا شاعر البيتين

و ردي عليه كما جاء في رسالتي له :
صباح الخير .. غمرتني يا بو خالد بطيبك و اهديت علي هالابيات اللي نومستني .. و انا و الله اعتبر نفسي تلميذ من تلاميذك .. و مبطي و الله عن الشعر و كتابته .. جادت القريحه بهـ البويتات عساها تكون عند حسن ظنك ..

هلا يا مرحبا و اهلين بك يا مروض القيفان = هلا بالشاعر اللي نفتخر به و اهلاً و سهلين
ترنم بالبيوت اللي تشادي وابل ٍ هتان = تروت من طشاشه زهرة ٍ ذبلت قبل عامين
قبل ما تكون شاعر يا حمد يا مكرم الضيفان = عرفناك الكريم اللي تحط الدين فوق الدين
و عرفناك الرفيق اللي يصلّح غلطة العربان = و عرفناك الحليم اللي يعدل ميلة الغادين
و عرفناك الاديب اللي كلامه يعتبر ديوان = و عرفناك الروائي و الرجل و الملتزم بالدين
تميزك الصراحه و الوفاء و الجود و الاحسان = و تميزك الرجوله و السمو عن كل علم ٍ شين
و تبقى الصادق اللي ما يعرف الكذب و البهتان = و انا وياك واحد عين و الثاني صبي العين
تكفيني شهاده من سموك يا رفيع الشان = لأنك شاعر ٍ دوّن حروف المعرفه تدوين
يابو خالد فرحت بقافك اللي يروي الضميان = بعد ما نشفت عروقه نبض في داخله عرقين
و تبقى استاذي اللي يعطي دروس ٍ لها عنوان = حزامي تاج راسي مسندي وقت العسر و اللين
على شانك حضرت و قلت يا ويلان يا ويلان = تعالوا و اقروا بيوت ٍ كتبها شاعر البيتين