منقيات لشاعرعبدالله رجاء الجعفري السهلي العنزي

[ناصر محمد السهلي]

مساء العزه والكرامه

حبيت انقل لكم جزء بسيط من قلم ابن العم الشاعر عبدالله رجاء الجعفري وانشالله تحوز على رضاكم

قصيده تتكلم عن(( الحكمه)) وفيها مجاراه لبيت شويمان الجروان

الشعر له عندي مراحل ويزداد=وطيب المعاني بين(ن) مبتداها
ابحشمه عن كل شامت ونقاد=نبراس حكمه ينتفع من قراها
لوكان وقتي ماشفع لي بالاعداد=المرجله عشقي ولالي سواها
تجارب الماضي على دور الاجداد=مسيرت(ن) تعرف ونمشي وراها
تفرح قلوب الناس لاهلت اعياد=ضحكات من صبح الحياه ومساها
ونجاوب الضحكات في صوت وانشاد=وبعالي الاصوات نرسل صداها
مرحوم يالي شاد في شعره اسياد=عالج بيوت الشعر وانتج دواها
له حكمت(ن) صارت مع اولاد واحفاد=باطيب عطور الورد واعذب شذاها
الناس ماتدري عن الداي من غاد=ومحست الجمره على من وطاها
يقولها جدي مع الناس تنعاد=مثايل(ن) مثل النجوم بسماها
من صابته بلوى وفي نارها زاد=يصبر على دنياه حتى فناها
دنياك لوتقهر من الناس حساد=مصيرها تفنى ويفنى عطاها
لوتملك الاموال وقصور وشعاد=تبقى هموم الحزن تطحن رحاها
يابوي لوشفنا ترا الوضع منقاد=اجيالنا واجيال سارت معاها
دنيا الفنا بكنوزها شي مافاد=يالله سترك وانت حامي حماها
ناس(ن) على الدنيا مواعيظ وارشاد=مكسب رضى الرحمان غاية مناها
وناس(ن) عليها ذنوب وذنوبها اعداد=من كثر ماتخطي تعيش بخطاها
حتى المجالس صايره كذب واحقاد=غيبه نميمه يقطع الله نماها
لاجاك يلي تسمع العلم نشاد=ينشد عن اوضاع البيوت وبلااها
قله ترا واقع نعيشه ومعتاد=كتبتها والعلم في منتهاها

قصيده تتكلم عن الفخر بقيلة(( الجعافره))

ياهاجسي وين البيوت اللي لها يروى ضماي=عن ماجرى ياهاجسي وسط الهموم الوافره
الليل موحش والبلى في ديرت(ن) تعلن غثاي=لشلهبت سود الجبال المرعبه والنافره
متقلد(ن) فكر الحياه اللي بها لقمة عشاي=مثل الحصان اللي حفى ذيك المراتع حافره
اتيه في ذاك الجفى واعيش من كفه عناي=وانا الذي مازعزعه بعض العقول الشافره
سلام ياديرة هلي والشوق من وصلك رجاي=عيال وايل عزوتي وقت الظروف الكافره
ايه اعترف بالوايلي مادام هاللابه ذراي=ومدامني من ساسهم لسولفو جعافره
وفاي ياصيتاً سمى لصيت لويذكر وفاي=شف الجماعه تجتمع على العلوم الظافره
تبقى الفعايل ذكرنا لونايد العالم وراي=والقصد واضح ينفهم لشعشعت دوافره
واللي بلاني يعترف عن وقعت(ن) فيها خطاي=لكنها مشت علي في زحمت(ن) متعافره
توشحتني بالغلط والسر من سلة خفاي=والزافره من وقعها تبقى علينا زافره
ايه اعترف ان الخطى منساه لودارت رحاي=وش فايدة عذر الخطى لصفرت هالصافره
تسمو سوالف صيتنا على الثريا من سماي=وذكر القصايد فعلنا عند الوجيه السافره
والخاتمه هاض القصيد اللي مزجته في نداي=حنا لها عز وفخر وسط الجموع الوافره

قصيده تتكلم عن ((بيضاء نثيل))

ياعزوتي من دون هفوه وتقصير=عيال وايل في شموخ الفعايل
من دور ابن كلثوم مع سالم الزير=وحبك السمينه في رصيد الاوايل
حبك السمينه تعتلي هامة السير=اصيلت(ن)مثل النسب والسلايل
شفني ثقيل ونيتي كلها خير=لوكنت مبدع في جميع الرسايل
مكثره من دون لاجيب تبرير=مادامني بالشعر صغت المثايل
شاعر حقيقي ماحنته المعاصير=ولينحني لوشاف ضيق وهوايل
ماينحني في كثرة الهرج ويغير=ولاله مع القالات كذب وحبايل
الحر عشه في رفيع المواكير=والذيب صيته مع جميع الحمايل
والبوم مسكانه بذيك المحادير=بين الخفوش الطارفات الهزايل
شعر(ن) بلا منتوج مافيه تصوير=وياما سمعت اقوال مبدع وهايل
ماهو غرور وفلسفه دون تفسير=ولهمني حسد البشر والغلايل
مشيت دربن تنتشيه الحوافير=وحمل القصايد في رصيدي جلايل
يشوقني جمع الرجال المناعير=في وسط روض(ن) جملته المسايل
في خايع(ن) ضم الحيا والتباشير=اقرب ودون شوي لاجيت حايل
نمشي على ذيك الخطوط المياسير=الياما نشوف ديار بيضا نثايل
ولديارنا سويت جزل التعابير=تاريخنا من فوق قب الاصايل
قد وثقوه رجالها دون تزوير=على الفخر والجود فيها دلايل
تخلدو ضمن الفهود المشاهير=على مقر الجود كسب الجمايل
ومع خوة الوافين عندي مشاوير=خوة هل الطالات والشك زايل
يشوقني سج الفياض المخاضير=في جرهد(ن) مادق فيه المبايل
فيها الغضى مع واهجات النواوير=ويزهابها الورد الطبيعي شتايل
النار شبت واعتل(ن) المباهير=مع دلة الرسلان والكيف طايل
وشفت الذبايح علقت بالشناكير=وكل(ن) عصب راسه بعز وفعايل
في وقتها من دون لجه وتفكير=نسترسل ابيات القصايد جزايل
مجلاسنا حول الدلال المغاتير=دام الزمن في تالي العمر مايل
وسوالف(ن) ماقلبت بالدعاثير=فيها العلوم الغانمات الاصايل
هذي نصيحه لرجال البواتير=وكل(ن) حصيله من يمينه نفايل
ومن ضيع الماضي نسى كل تدبير=راحت حياته بيت قيل(ن) وقايل