يــاطول صبــــري .!!

[شمــــــــوخ]

مسهم / صبحهم بالخيـــــــــــــر

قبل نبدأ بالموضوع اللي مالقيت له مقدمه ..

اللي سمع شيء ولا شيّات يستر علينا الله يستر عليه و حللونا<< يدريكم إنه تحش في كل مكان
و ليته بصوت واطي بعد " صورة خشه تحاول تستحي "

موضوعنا

قبل فترة كنت مسافرة جواً بالطيارة برمضان << و الله زين علمتينا نحسب جواً يعني بالسياره ..

متوجهة لم جدة المدينة اللي تجيب لي المغص الأبدي .. طبعا مما لا يخفى عليكم إن محاتسيتكم لا بغت تسافر

– إن شاء الله لو على بعير - فهي تحشر كل اللي عندها من عفش و تاخذه معها ..

شنطة يد و شنطة أكل للطواريء و اللابتوب و كيسة مب ضروري فيها شي بس زيادة زحمه ..
همن تقعد به لا بغت تجلس ع الكرسي

طاري الكراسي .. وراهم في بعض الطيارات في الدرجة السياحية<< لا جلست على الكرسي تغدي تقل واحد طالعن للبر بردان و يبي يتوضى للصلاة ؟؟ .. أنواع الاعاقة و أنت جالس ..

لا تعرف تسند ظهرك و إن غيرت وضعية الكرسي نغزك اللي وراك " لو سمحت ما أعرف أحرّك رجولي " ..

الله ياخذ ابليس هالحين جالسين و الطيارة تب تطير .. وشوله تب تحرك رجولك علّمنا ؟ ..

لا و من زود الضيق لا بغيت تسولف في سالفة .. تبعد عن اللي وراك و تلصق راسك براس اللي جنبك و تقولها ..

المشكلة لا منك قضيت مسولف و مبرّدن تسبدك تكتشف إنك لاصقن بآذان اللي قدامك و إنه قالطن معك في السالفة

من طأطأ لسلامو عليكم .. من جد يا شينه لا صرت تسولف بإذن اللي قدامك

<< طراه إن كان فيه اثنين ورانا و أنواع الحماس بالسوالف .. ما فهمت غير إن واحدن منهم الظاهر

اللي جنب الشباك يب يملّك بذيك الفتره .. و إن قير المازدا صعب مدري ثقيل .. عاد ليه ؟ و الله مدري

نرجع لموضوعنا .. حشرت أغراضي غصب بمكان العفش .. شوي و لاّ قريبتي اللي جنبي تبي غرض

من هاللي حشرناهم فوق .. طبعا الخلق كلهم جالسين و دقايق و تب تتحرك الطيارة .. قلت لها و الله لو وشو ما قمت ..

عاد أبغض ما عليّ أوقف و أمد ذراعي و أفتح الدرج .. يصير كل اللي بالطيارة قالطين حول ما يدخلون معي داخل

الشنطة .. قالت أجل أقوم أنا ؟ و الله لو تهوّنين بكبرتس عن الروحة ما قمت<< تبينه من الله انتي ..

قلنا خلاص ننادي المضيفة .. و نضغط الزر تقريبا خمس مرات .. خبركم بزران و طاحوا على شي ..

جاتنا المضيفة ووقفت عندنا .. مير نرفع رووسنا معها و نناظر وشهي تناظر بالسقف نحسب فيه شي ..

قلنا سلمتس الله نبي الشنطة من هنا ممكن تعطيننا اياها ؟ قالت أبفتح لكم الدرج بس ..

لكن أنتوا تجيبون الشنطة أنا ما راح أجيبها .. !! طبعا قريبتي بالنهاية هي اللي قامت و جابت الغرض

ولاّ أنا ما نويت أقوم .. بس وش المقصد يعني يومنه ما تساعد ؟

ع فكرة ذي مب أول حركة ولا أول مره لمضيفين الخطوط .. ! داايم تتكرر معانا .

طبعا ولا هانت سالفة تأجيل الرحلات اللي صايرتن كثر الرمل .. قد صارت و ارتزينا داخل طيارة أكثر من ساعتين ..

همن اكتشفنا إنهم حاشرين بالطيارة ركاب رحلتين و إن الجهة المقصودة غير اللي حنا نبي ..

و اضطرينا ننتظر بالمطار الثاني .. زمناً و قدره ...


مهــــــــم .. !

حركة عدم المساعدة في رفع العفش من قبل بعض المضيفين + عدم توضيح سبب تأخير الرحلات

تراها تكررت أكثر من مره .. لذلك الخطوط لازم تشوف حل لأمثال ذولا اللي يجيبون المرض ..

تقولون لنا خدمة و مدري و شو و نعتزّ و عملاءنا .. و هذي آخرتها ؟!

ضروري نشوف ردود فعل إيجابية من قبل شركة المفاجئات .. شركة الخطوط السعودية / " حبيبتكم " الغالية !

ما يستفاد /

1- دايم احجزوا درجة رجال أعمال كالعادة<<يا ناصحن الناس انصح نفسك ..
و لو قالوا لكم ما فيه إلا السياحية قولوا لهم نروح بسيكل و لا كراسيكم !

2- عندكم عفش إلفزوه بشناطكم .. و اطلعوا للطيارة ما معكم ولا حتى قلم .. منة الله ولا منة خلقه

3- لا احرمتوا يالحريم و شلتوا النقاب .. انتبهوا للغطاء لا ينسلح ..
و إن شاء الله إني أبكتشف السبب الجوهري في أن :

لماذا لا طاح الغطاء فجأه تصيرين فاقتن الخشة و شكلتس ماله أوم الداعي ?

4- الشاشات اللي قدام الكراسي بالطيارة تعكس الخشش ياصبايا .. انتبهوا ترى فيه ناس متولّمه

5- الموضوع كالعادة خمبقة و نتايج فضاوة .. وقد يكون ضمن على ما قالوا : " الخرط الفاضي " ..

و كما يقول المثل : " الفاضي يعمل آآضي " .. و دام قاضينا فايز .. باخذ راحتي
.

فتكم بعافيه


شمـــــــــــوخ