جمــــــــــــس أحمـــــــــــــر

[فواز المهنا]

راكب اللي بالصحاري ما عرف قير الدبل = جمسٍ احمر ضاريٍ للمشي ما بين الحدود
واردٍ من ديرة اللي صنّفونا بالجهل= الصقوا فينا الجرايم والمسالم باليهود
سايقه من سبّة اللي شايله مشيه عجل = ما فطن وطي كفراته بالحجر والا بنفود
منهبل والا لمح دوريّةٍ زاد الهبل = يدعس ويدري بجمسه يسكر بشرب الوقود
يقطع الأرض وعسير الدرب يصبح له سهل = يسرع وما كنّه الا من صواريخ السُكُود
فوق حمله لي معه رسالةٍ فيها جمل = للحبيب اللي بوصله شحّ وبهجره يزود
قلت له .. قلّ له حبيبك حالته ما تحتمل = كم وكم طاح مغشيّ لين في روحه يجود
مشتقي من وصلك اللي كل يومٍ هو يقل = خايف ان أسهم غلاته دحدرت عقب الصعود
وش حصل منه يجازى بالجفا قل وش حصل = دامه اللي وافيٍ لك ما نقض ذيك العهود
قلت له ذكره باني قلت له كلمة رجل = حالف اني ما اتراجع الا من زود الصدود
وانتظر منه جواب ولو حصل شدّ الرحل = ينطلق لي ناوي انه عقب هالفرقا يعود
والوصل لو صار منه يبشر بوصلٍ دبل = تقهر العين الحسوده يا عسى بالعين عود