مــلـك خـفــوقـي وتـخــضــع لـلـمــلــوك الــرقـــاب !!

[منصور الرويلي]

يامعدن الالماس والفيروز ويا الذهب = يانجمة الصبح . يافرحة اللقيا . وهم الغياب
هاتي يدينك فديتك دون كل العرب = أبي أرتحل مع خيالك والذهاب الذهاب
ماعاد أبرجع على دربً بداية تعب = أبي عيونك دياري والرموش السحاب
ياللي وصالك على غير الحبايب صّعب= واصعب من الصعب لا يعد أقوى الصعاب
انتي ملاذي عن الدنيا وظل الهدب = سكة سفر في حياتي وانتي كل الزهاب
القلب عرش الملك والا المشاعر شِْعب = ملك خفوقي وتخضع للملوك الرقاب
والتايه اللي تخيل يوم قطف العنب = ليته تريّح قبل يمشي طريق الاياب
شاطر ويلعب ؟ ولكن من عليه اللعب = على الكرز والخزاما يوم سال اللعاب
سحرً على الساحر المسحور كم انقلب = وكم من عليلً على ريحة نسمها استطاب
هاذي تعادل بعيني كل شعر انكتب = هاذي هي القاف والمعنى وكل الكتاب
ديوان شعري وصدري ممتلي بالعتب = وأشوفها تختلج بين الرضا والعتاب
الباهره . الشارقه . كالشمس ماتحتجب= لاشرق سناها على الدنيا يزول الضباب
قمة سكوني وجمر المشاعر لهب = هي واقع الحلم مابين الخطأ والصواب
والدرب هذا تعب ؟ وجيت غاوي تعب = ومعها تجاوزت هم التعب والعذاب

*
*