وشلون أخـاف وعزوتـي وايليـه

[جرح العنزي]

قصيده اعجبتني فحبيت ان انقلها لكم


الرجااء اللي يعرف اسم الشاعر يقوله



الخوف والله ماحسبنا لـه الخـوف
الا مـن اللـي نعبـده ياأجوديـه

وشلون أخاف وعزوتي كلها سيوف
وشلون أخـاف وعزوتـي وايليـه

ملوك بالدنيـا وفرسـان وحتـوف
ذيقـار مجـد أجدادنـا الأولـيـه

حنا على أهل الكون كله بنا نـوف
حنا الكرم والجود وأهـل الحميـه

العي لامن شافنا صـار معسـوف
وأقلنـا ماقيـل عـنـه الـرديـه

من وين ماسرنا بنا العز مـردوف
ياويل من هزنـاه يصبـح ضحيـه

ترحب مجالسنا اليا زارنـا ضيـوف
ويزيد ترحيبـة شـذى الشاذليـه

حنا هل الفزعات مانعـرف نكـوف
وحنا الصخى وحنا جـزال العطيـه

العز في وايل على كليب موصـوف
مقولـة التاريـخ ماهـي خفـيـه

حنا هل المعروف لأصحابنا ريـوف
ودخيلنـا لحمـاه نصبـح فـديـه

مايوم خنا العهد ونعـف ونعـوف
نعف عـن قـوه وعـن مقدريـه

مانخضع لذلـه ولاهمنـا ظـروف
من وين مارحنـا ملكنـا الفضيـه

ننصب كنا السيل من ضايق جروف
لاصاح صيّـاح النخـاوي عنزيـه

سيوفنا نفرق بها صفوف وصفوف
وأردى عنزي بالكون يلهم سريـه

يخاف منا الدرب لوكـان محفـوف
ويهابـنـا ثقلينـهـا بالوطـيـه

تاريخنا سجلات وأمجـاد وحـروف
من جدنـا وايـل لتالـي السميـه

خل الذي ماشاف يرهي على الشوف
ويتوب ويصلي على أحمـد نبيـه

أسألك بالله كيف ياصلنـي الخـوف
دامي سعـودي وعزوتـي وايليـه