ديوان الشاعر ::: سعود العواجي :::

[سعود العواجي]

فترة نقاهه

وفّر على نفسك بااوادعك ياسعـود)=هذي هي آخر جملة ٍ مـن شفاهـه !!
حاولت أبرر لكـن العـذر ..مـردود=والعذر بعـد الذنـب أكبـر تفاهـه !
صابر عليه وكـل شـي ٍ لـه حـدود=وعجزت أعكّر فيـه صفـوة مياهـه
دام أعترافي كان "واضـح" ومقصـود=ياليت يعرف وش شعوري تجاهه ؟؟!
إذا عطيتـه حـب بوصـال وعهـود=يشـره إذا مشيـت عكـس إتجاهـه
فوق المحبـه يـوم عاملتـه بـزود=لايظن فيني "نقص عقـل " ونباهـه !
إذا أحـب ..أحـب ّ! باآقـل مجهـود=ولا اخذت معه الحب " فترة نقاهه "!!
حظي رماني بشخص طايش ومقـرود=واكبر دليل أن حب ..حـب بشراهـه
ماالوم دمع ٍ ضـاق بعيونـه السـود=لاصار // ذيب الهم // ياكل //شياهه !
وصلت معه لـدرب ضيـق ومسـدود=من يوم كثروا في عيوني ...أشباهـه
لاحط جواله على طوووول "موجـود"=وكثـر اتصالـي مايثيـر أنتبـاهـه
وشلون أدينه ظلم ! وأيامـي شهـود=لاأثبت على جرح الخفوق ..اشتباهـه
أصلا ً فراقه مثل وصله بـلا ..فـود=عايش معـاه بوسـط هـم ومتاهـه
أهم شي أن قال لي : روووح ياسعود=أسمي هو آخر ماانطقت به شفاهه !!!

******



أنا عنزي وابوي من جدي عقاب

إذا انت شايف خطوتي يمـك متاهـات وعـذاب=أرجوك اصحى لاتقيس خطاي فـي بعـد نظـري
أطمح ولكن ماملـى وجـه الطمـوح إلا التـراب=وأنا اعرف اني من بقايا الهم واللوعه ...ثـري !
خلقت وانا من سراب ليـا سـراب ليـا سـراب=ماغير ادرهج خطوتي بالـدرب وأقـص آثـري
وليا عرفت اني عنزي وابوي من جـدي عقـاب=رفعت راسي يـوم صيتـه بالملا..شّـد ظهـري
ماجيت شاعر منزرع في كلمتـه عشريـن نـاب=جيتك وانا من دم راسـك يابعـد راسـي بـري
ماعابني شعـري ولاسويـت لـي شـي ٍ يُعـاب=هذا لأني صرت في بعض المواقف ..عنصـري!
أشيب من هول الزمن وأرجع على وضعي شباب=وأحيان عمري لـو حسبتـه مايقـاس بمظهـري
أوفي ولكـن الوفـا منكـور يامـااااال الذهـاب=وما اخون والله لو تنكّـر لحـم يـدي لـاظفـري
أنا بدوي طبعي مااحسب لغيـر خلاقـي حسـاب=وأن شفتني بدور الحضاره قلت رجال ..حضري !
أعشق طواريق الشعر وأكـره أساليـب العتـاب=وأذوب في هرج الغرام أن صار معسول وطـري
ويضيق صدري لا سمعت من البشر "كلمة أعجاب"=لني بشعري ماوصلت لـقيس وإلا...البحتـري !!
أمـا كلامـي لانطقتـه يشبـه لنّـو السـحـاب=وإلا عساه يموت فينـي قبـل ياصـل لـنحـري
وان كان شفت الاسئله ماتت قبل نطـق الجـواب=وش لي أبيع من التعب وقلـوب غيـري تشتـري
برحل مدام ان الرحيل بهاالزمن ..عين الصـواب=ومدام عقلي من جلست يقول لي : وش تحتـري؟؟
ليا بقيت أبقـى علـى خـوة عزيزيـن الجنـاب=وليا رحلت أكيد محد ٍ في خفا أحوالـي ..دري!!

*******


نسج العنكبوت

ياللي نسجت الحلم فيني مثـل " نسـج العنكبـوت"=خذني معك وإلا انتشلني مـن "دياجيـر" الظـلام !!
اخاف لامن رحت عنـي كلهـا ساعـه و " امـوت"=وأن مت منت بقايل ٍ من بعد موتي .. ياحراااااام ؟؟!!
معاك أحس ان الكلام أرحـم كثيـر مـن السكـوت=وأحيان احس ان السكوت أرحم كثير مـن الكـلام !!
ياني احبك كثر طيبة مـن سكـن فـي "حضرمـوت"=وأكثر من أعداد "الحجيج " بداخل " البيـت الحـرام"
وغلاك أكبر من غلا "عقاب العواجي" عنـد " نـوت"=وأكبر من " الخيبـه " بوجـه ٍ مايعـرف الأحتـرام
لو كان " لاحجام الغـلا" بالقلـب مقيـاس وثبـوت=أن كان مبطي قست " وزن الحب " " بالكيلو جرام "!!
من بعد ماصنت المشاعر حزت منـي كـل صـوت=إلين توجك الخفوق وصرت فـي " عـرش" الغـرام
ولو هو على كيفي عسفت الحرف لعيونـك ..بيـوت=لكن أخاف ان كل بيـت ٍ مايجـي " قـد المقـام "!!
لو هو يغار " الشيح" مره مـن مـذاق " العنـزروت"=أن كان ماغار " النفل " من ريحة أنفاس " الخـزام"!!
ياليت لو تسمح بجي من داخل ضلوعـك وآفـوووت=إلين اشوف أني بقلبك و" أفرش فراشـي وأنـام "!!
بنام ولامني صحيـت بخافقـك وأحتجـت " قـوت"=في عينك اليمنى " شراب " وعينك اليسرى " طعـام "
ياليـت لـو معلـق ٍ بعـروق قلبـي " باراشـوت "=حتى ليا منـه سقـط يمنـع حـدوث الأرتطـام !!
من ماشفت الهوى صايـر مثـل " لعـب البلـوت "=أول بداياتـه زعـل وآخـر نهاياتـه ...خـصـام
وأنت يوم انـك تركـت الحـب فـاعماقـي يمـوت=(( تعتقد حالي بعد جرحك على أحسـن مايـرام ؟؟!!

********



بدون عنوان

ياما سمعـت مـن السوالـف وطنشّـت=وبعـض السوالـف ماتثيـر أهتمامـي
مدام شفت "اردى" المخاليـق..لا طشّـت=ينهش "بلحمي" لين يرمي " عظامـي "!!
من يـوم ماحسّبـت عمـري وبلشّـت=وأنا أقيـس الهـرج وأووزن كلامـي !!
أمير ! لـو ماشفتنـي لابـس ٍ "بشّـت"=والبشـت مانـزّل ورفّـع مقـامـي !!
ليا انتخوا بي // لابتي// لجلهم " ششّت"=وعنـد المواقـف دوم مكّـرب حزامـي
أحمي دروبي مااشتكي لـو " تليشّـت "=وفزعة //خوالي// مثل فزعة //عمامي !!
ومدام حـزن مـن المراجـل وحوّشـت=وخسرت !! لاكنّي كسبـت أحترامـي !
وجودهـم لايعنـي أنـي " تهمّـشـت"="اكبر عدو" ينحـط داخـل أكمامـي ؟؟!!
أنصبت !! لا..لا..كنت آبقـول: أندّشـت=وياكم رميه جات مـن غيـر رامـي !!
عايش وكنـي عنـد الأنـذال ماعشّـت=ياحييييييف والله صيت بعض "الأسامي"!!
من شانهـم يامـا زعلـت وتهاوشّـت=وبأسبابهم خلوا لي الجـرح " دامـي"!!
خليتهـم وراي // ضقـت ..وتبلـشّـت=قدمتهم // إليـن صـاروا ..أمامـي !!
بدروبهـم لاهشّـت فيهـم ولا ..نشّـت=واليـوم مايبغـون حتـى سلااااامـي !!
وأن كانها "بالصيت" و"الطيب"..كوشّـت="والحمـد لله فعـل الاجـداد سامـي"!!
وأن شفتنـي ساكـت ولايـوم ناقشّـت=تأكـد أنـه مايطـول "صيـاااامـي" !!
"الجيب" جيبي لو أبـي كـان " فتشّـت"=وأقدر أرد الهـرج حامـي بحاااامـي ؟
لكـن تعبـت مـن السوالـف وطنشّـت=لّن السوالف ماتثييير أهتمااااااامـي ؟؟!!

*******



صحيح بالدنيا خذيت الصيت والشان الرفيع***ويكفي اني من نسل وائل كليب التغلبي

ياما حملت من المتاعـب فـوق مـالا استطيـع=حتى شعرت ان "الهموم السـود" هـدت منكبـي
المسأله ماهي بقـاف وشعـر وأسلـوب ٍ بديـع=المسألـه لازم أجمّـل صيـت ربعـي وعربـي
أما أقول من القصايد وأكسب أرضـاء الجميـع=وإلا بلاش استنزف حضوري..وجهدي..وتعبي !!
صحيح بالدنيا خذيت الصيـت والشـان الرفيـع=ويكفي بأني من نسل "وائـل كليـب التغلبـي"!!
لكنّي أقدر اثبـت وجـودي ولايمكـن : اضيـع=دام أني اتبع جملة ٍ قيلـت بعد "عهـد النبـي"
ان الفتى من قال : انا ..هذا هو الرجل الشجيـع=وليس الفتى من افتخر وقال : قد كـان أبـي !!
شربت "دم المرجله" من يوم انا طفـل ٍ رضيـع=ولا انفطمت إلا بعـد مادسّـم الطيـب ..شنبـي
من عّدني صاحب فـلا اسـوم بغلاتـه أو ابيـع=دام " الغدر" ماهو بـمن طبعي ولا هو مذهبي !!
واللي ذبح لي من حلاله " شاة" من ضمن "القطيع"=نذر ٍ على نفسـي أذا مااذوقـه "لحـم الظبـي"
وأغليه والله مثل مااغلى "شالح" أخـوه "الفديـع"=وأعامله مثل الاخـو حتـى ولـو كـان اجنبـي
لأن طبعي من عطاني قلبه اصبـح لـه مطيـع=ولا أفرق باالتعامل بين " شايـب " أو " صبـي"
ومن الفراسه فوق ماني طيّـب وبالـي وسيـع=" أني آتحاشى اصتدم بالهرج مع رجل ٍ غبـي" !!
اللي مخوفنـي كثيـر أشيـاء لاجتنـي آضيـع=ومن ضمنها شـي ٍ اذا جانـي يعكّـر مشربـي
"الكذب" و"الجهل بأمور الدين" و" الفشل الذريـع"=ولياعجزت آهدي أعصابي ليـا زاد غضبـي !!
من يوم صار الهم " ذيب" وقلبي " الحمل الوديع"=ينهش بلحمي ليـن ماقطّـع وريـدي وعصبـي
لكـن لـي الله والله العالـم بحالـي والشفيـع=ليـا سجـدت لطاعتـه ذليـل وأثنيـت ركبـي
من بعدها والله لو انـي شلـت مـالا استطيـع=أهم شي اني احس انـي خذيـت اللـي أبـي !!

*******


سالفة قيس

تعال آباعلمك عـن" سالفـة قيـس"=من قبل طيفـك لايغيـب ويصيّـف
تراك لامن شفتني فيس تـو فيـس=أحتاج لـي مـده عشـان آتكيّـف
ياللي نصبت بخافقي"عرش بلقيـس"=قدرك كبيـر وفـوق قلبـي خفيّـف
صدري "كنيسة عشق" والهم "قسيس"=وشوقي "عباده" والخفوق المضيّـف
مايعادلـك مال"الفتيحي"و"الدريـس"=حتـى ولـو حطيـت مال"الخريّـف"
لاشفت خصرك آتعوذ مـن ابليـس=وآضيع بك يابـو عويـد ٍ سخيّـف
هبلتني يامعطـي الـذوق تدريـس=عن مجمل الصوت الرقيق الرهيّـف
زينك ماهو من زين "ريما" ولا "ميس"=اللي لبسن تـاج الجمـال المزيّـف
يكفي تحرك باالعـروق الاحاسيـس=لاشفت زولـك ياالمتيـن النحيّـف!
لاصار صيفك بين "لندن" و"باريـس"=وأنا أقضي الصيف تحت "المكيّف"!!
ماالوم قلبـي لاانهكتـه الهواجيـس=لاصار من طـاري فراقـك ضعيّـف
ودام الهجر يحاك خلـف الكواليـس=قلبـك علـى "دم الخيانـه" نظيّـف
حفظت طيفك دون مااحس وآقيـس=وأنـا أدري ان الذاكـره "ماتسيّـف"
تعال آبجـدد معـك "سالفـة قيـس"=من قبل طيفـك لايغيـب ويصيّـف