ديوان الشاعر::: رابح الغضيان:::

[رابح الغضيان]

(بطل فيلم)

من لا عرف مدخله يضيع مخراجه=والناس ماهي سوا يمكن تصدقنـي
والكذب سلعه رديه عنـد هراجـه=وحبٍ من النوع هذا مـا يوافقنـي
لا صار حبك مزيف في رجا حاجه=من غير تمثيل خذ حاجتك واعتقني
في نعمة الضوء ما نحتاج لسراجه=والنور نور الضماير يـا موهقنـي
خدعتني بابتسامـه يـوم نتواجـه=وصدقت عينٍ بنظراتـه تلاحقنـي
وغرّقتني بالكلام العذب وأمواجـه=وصبحت بيّدك على كيفك تغرّقنـي
ولبست ثوب الحرير وسلك ديباجه=ومثّلت دور الحبيب وقلت عاشقني
ماكنت داري عن التمثيل واخراجه=وانتي بطل فلم والتمثيـل شوقنـي
وخلف الكواليس والمكنون بادراجه=بانت حقيقة غرامٍ كـان حارقنـي
واليوم يا زارع البستـان وانتاجـه=هذي محاصيل حبـك لا ترافقنـي
ولا عاد تشكي ولا تبكي وش تواجه=الله يوفـقـك وادع الله يوفقـنـي
ومن لاعرف مدخله يضيع مخراجه=ويديّك ماهي سوا .. يازين صدقني

أخوكم:رابح الغضيان