[[ خَفَايَا رُوْحْ تَعْبَانْهْ ]]

[أبو غرام]

مثل الصباح الحلو لا عانـق الغيـم=تدامجوا واستنزفـوا وبـل همّـال
احيوا نبات الارض والخلق ترنيـم=الكـل منهـم غيّـر اليابـس لبـال
فرحة مطر يفرح بها القلب ويهيـم=يسرح بها فكره من الجـال للجـال
نشوة حياة الناس هـزه نبـا غيـم=ونشوة حياتي هزها طيّـب الفـال
في رجعته غّيم على جـوي الديـم=بل العروق اليابسـه حـرّك آمـال
نوّر حيـاة القلـب والقلـب ماليـم=ومن لام قلبي جعل قلبه على الصال
شيخن يكف المجد ويشيـل ويقيـم=يركز بيارق شيخته وين مـا مـال
حاف الكرم والجود من دون ترقيـم=وباب الشجاعه مثبتـه دوم بافعـال
كم من عظيمن حاول لدارنـا يظيـم=وامسى غبين مكبله يديـه باغـلال
ولي عهدن ذكره يرفع بـه الريـم=عن باقي الغزلان يِطرَق لها البـال
شيخن على داره كما صقرن يحيـم=يحمي حماها عن هوى كـل عيّـال
هذي حقيقـة صاحبـي دون تعتيـم=مثل الضيا نوّر لي الجاش والحـال
اسرح معه بالفكر طربـان واشيـم=وعن هرجة العدوان حطيت الاقفـال
يالله لك الحمد وعسى وضعه يديـم=يبقى لنا وجـه السعـد دوم بقبـال
كتبتها فـي لحظـة اعـلان تعميـم=نشوة فرح في رجعته طيّب الفـال