تهئ تهئ <<< تراني أبكي من الطفش

[شمــــــــوخ]

السلام عليكم ....

.يخرب بيتك يالطفش !!

مادري وش فيها اليومين هذي ماغير الطفش لاعبن في حسبتي ومجنني

يعني صارت الحياه ممله وكئيبه وبارده ومافيها اكشن ودمار وحرب

ياهووه احد يحرك الجو >>>> لا احسن يرقصون لتس علشان تستانسين حضرتس

احد يقوم يفجر قنبله او يسوي لنا مصيبه علشان نقعد نبربر فيها ونهلكها بحث وتمحيص
ونسوي لها تحليل الدي ان اي وتقارير تنتقل من هذا لذيك وكل تقرير تزيد عدد صفحاته حسب
الي بيروح له التقرير اذا انه من ذولاك المتمكنين من تزويدها بالبانزين علشان تشعلل اكثر واكثر .

يعني نبى مصيبه ناخذ ونعطي فيها ونكبرها وننفخ فيها لين تنفجر

من كم يوم كنا في جمعة عائلية نسائيه بحته وكل وحده تصيح وثيابها شليح

الي تقول زوجي كفخني امس لانه جا لقي الغدا ماخلص والي تشتكي من عيالها ماغير طايحين
في بعض مصارعات بسبب السوني والناريتو الله يقطعهم ( الا الناريتو هذا مسويين منه افلام واشرطة بلايستيشن
و كله مضاربات وماغير اولادنا طايحين في بعض )) والي تشتكي من شغالتها والي تشتكي من حماتها الشريره .

عاد انا اتسمع فيهم والحزن يقوطر مني ( ياربي ليش انا حالي مو زي حالهم ..
ليش ماعندي مشاكل زي الي عندهم )

وقررت اطبق الي سمعته يمكن تحصلي مشكله وانشغل فيها وانسى طفشي .

ومن بكره ويجي الرجال من شغله وانا ماسويت الغداء وقلت للشغاله مانبي اليوم لاتسوين شيء
قلت يمكن يكفخني بالزبيريه وبكذا بصير اسعد وحده في العالم

بس الي صار انه يوم جلس يحتري الأكل شافني راجعه من المطبخ وانا مامعي شي وقالي وين الغداء ؟
قلت اليوم انا مالي مزاج اطبخ هااه عندك شي بتقوله يالله وريني وش بتسوي

رد علي بكل هدوء وقالي لااا ابد سلامتك خلاص أجل أروح ارقد ولما تخلصيه صحيني

يعني انت مو زعلان ومعصب مني وبتكسر الدنيا على راسي

قالي على ايش يابنت الحلال الأكل مو كل شي في الدنيا

قلت أجل ماني طابخه اليوم أبد .

قالي خلاص لما أصحى نرووح للمطعم .

ياربي بذبحه يعني بدل مايصفقني على الي سويته زي زوج جارتي يقوم يكافأني ويوديني للمطعم

قررت اني ازوجه علشان تجيني ضره تنهاوش انا وهي وندبر لبعض مكائد ودسائس وتصير الحياه معها

احلا واحلا وقررت افاتحه في الموضوع ويوم قلت له ضحك وقالي مابقي الا هذي أني اتزوج عليك

قلت مااابغاك تحبني انا ابغى تتزوج وحده ثانيه وتحبها هي علشان انا انغاظ وانقهر وأذبحكم اثنيناتكم

قال وليش هذا كله انا مابي اتزوج !!

قلت ليش ؟؟

قالي لاني مرتاح معاك ياقميل

خلاص انا قفلت الدنيا في وجهي .

شاورت اخوي في أن حياتي بارده ومافيهامشاكل ولا أكشن .

قالي اذا معك فلووس حطيها في الأسهم وهي أن شاءالله بتخسرتس وتجيتس جلطه ونتفك منتس يالخبله

قلت متاكد من هذا الشي قال اكيد كل الناس تحطمت حياتهم وتدمرت والسبه الأسهم

قلت خلاص وانا اشري اسهم بذيك الحسبه وياليتكم معي وانتم تشوفوا المؤشر يوم أرتفع ضغطه ووصل سعر السهم
لعدد خيالي , طبعآ أنا خسرت فيها بس مو ذاك الزوود
وانا اندب حضي العاثر وأخوي جنبي جاته صدمه , واقوم أبيع أسهمي وأتصدق بالربح على

الهندي الي يكنس قدام بيتنا والمسكين مو مصدق عمره أغمى عليه فوق سطل الزباله ماغير جبنا له مويه بارده
كبيناها عليه ويوم صحي قالي ( سكرا ماما انا الحين فيه روه الهند يتزوج هوبي انا ويجيب بتشى بسرعه قبل هوبي

انا مايصير اجوز علسان انا فيه سغل هنا من عسر سنه ومافيه فلوس واجد >>> ياحظه عنده هموم كثييييييييره وانا ماعندي شي صدق حظوظ

طيب يعني وش الحل في رايكم ؟؟

طفشانه وزهقانه

ترى هذي مقدمه لموضوعي خخخخخخخخخخخ لاتخترعون


الي أبغى أقوله ::

ليش لما تكون الحياه حولنا هاديه وتضحك لنا ومافيها مشاكل ومتصالحين مع نفوسنا

ومع الكل دايم نحس بطفش وملل ونقعد نشتكي

ليش مانقول الحمد لله على أحنا فيه واللهم دمها نعمة واحفظها من الزوال

بالله مو انتم تشتكون من الطفش والملل لما يكون كل شي حولكم هادي وحلو ؟؟؟

هذا اسمه نكران وجحود ,, ماتخاف أن ربي يغضب عليك ذيك الساعه ويبتليك ببليه تندب فيها طول عمرك

وتتذكر انك كنت في يوم من الأيام إنسان سعيد وكانت كل سبل الراحه والرخاء والرفاهيه

والمتعه متوفره لك وكنت برضك تشتكي ؟؟؟

مادري ليش بني ادم مايرضى بحاله ليش دايم يشتكي وليش دايم يعترض وليش دايم ينكر وليش دايم يجحد ؟؟

كلنا فينا الخصله هذي حتى الي بينكر بقوله دعبس في ذاكرتك لابد انك يوم من الأيام نكرت او جحدت او نسيت !!

دايم بني آدم شكاي ويعترض على المقسووم !!

صح تجينا أحياننا فجأه صحوة ضمير وتخلينا نندم ونستغفر ونتذكر أن ربي أنعم علينا بنعم كثيره لو عديناها

مااحصيناها بس هم نرجع ننسى ونعيد الي كاان ويالليل ماطولك !!

بس الحمد لله على كل شي

وأستغفر الله العلي العظيم

((اللهم دم علينا نعمك ولاتحرمنا منها ,, اللهم لك الحمد حمدا كثيرا مباركا فيه ولاتبتلينا وأعف عنا وأرزقنا وأرحمنا أنك أنت أرحم الراحمين ))

ودمتم بخير

كنت طفشانه قمت كتبت الموضوع

ياليت تشاركووني بهالمووضوع الإجتماعي وتناقشوووني فيه ..

وتقولولي الطفش وصل لوين معاكم ...؟


س ل م ل م