اجمل ماقيل في عنزه

[سعوط المجانين]

رد الشاعر \ جلعود الدهمشي

مبداي بسم اللي بعث صالح وهـود = باعث نبي الحـق بخيـر الرسايـل
مرسي سفينة نوح في قمة الجـود = في قمة الجـودي رسـت بالثقايـل
منجي خليل الله من بطش نمـرود = منجيه من نار(ن) حـروره هوايـل
من بعد ذكره سطـر الـرد جلعـود = لمعوض بن معيض كنـز الجمايـل
جاني سلامك وأرسل الـرد بالـزود = بأحسن تحيـة ياكريـم الخصايـل
خمشه رجال الفعل والفعل مشهـود = في ساعة(ن)تعرف فعـول القبايـل
رجالهم مـاداج فـي درب منقـود = عزيز نفس(ن) ما يجـي للخمايـل
عز الخوي (تنصاه تلقاه موجـود) = ماهو من اللي يسبقـون الرحايـل
عز الصديق وعز من كان مضهـود = عزالرجـال اللـي تعـزوا بوايـل
اعيال وايل بالوفى شيـك مرصـود = هم للوفى نبـراس والشـك زايـل
اعيال وايـل بالشديـدات عبـرود = عدوهـم تسفـل عليـه السفايـل
اعيال وايل واهبت مجهـمَ الـذود = ماهم من اللي يكنـزون الحصايـل
اعيال وايل نافسـوا زايـد الـزود = في مرقبٍ عالـي تعـدى المخايـل
اعيال وايل مابهـم صـد وصـدود = رجالهم مـا مـال والجـو مايـل
اعيال وايل كلهم عضـد وعظـود = عدوهـم مالـه عليهـم دخـايـل
اعيـال وايـل كنهـم أزرق العـود = لاقلت وايـل قـل كريـم السبايـل
اعيال وايـل كايـدوا كايـد الكـود = وأركوا على الكايد وناشوا الجزايـل
عذروبهم بالطيب زادوا على الـزود = وعذروبهم بالفعـل أهـل الفعايـل
مدحت ربعي والقبايـل بهـا جـود = كـلٍ علـى شفـه يديـر المثايـل
وصلوا على اللي بالشفاعات موعود = أحمد رسول الحـقّ خيـر الدلايـل