,’,’, الدوســريه ومشــاعر حالمــــه ,’,’,’

[مشاعر حالمه]

السلام عليكم ورحمة الله وبركاته ..

دايركت ع الموضوع يالغوالي...

حرمه دوسريه ..كتبت فيني قصيده وارسلتها مع بنتها

وتقول أبياتها


سلام يابنت الرجال المشاكيل

يا(......) ودّي لـ ( .....) سلامي

سلام يابنت الرجال الحلاحيل

اهل الوفاء والطيب ربعٍ كرامي

نطاحة البارود حمّاية الخيل

عدوهم من ضربهم ماينامي

(.........) تعرف لاقد الوقت به ميل

والنعم والله بالرجال الحشامي

عذرى على كل البني تاخذ الكيل

والطيب فازت به بكل احترامي

,’,’,’,’,,’,’,’

يوم وصلتني الرساله علمت ابوي وامي وقريتها لهم

قالوا لي هلي ردّي عليها قلت ومافيه الا هالحل وان شاء الله أوفيها ..

تقول أبياتي ...




يامرحبا عداد المطر ودارج السيل

وعداد حرفٍ سطروا به الاسامي

باللي سلامه عطّر القلب بالهيل

مع عنودٍ عطشت كل ظامي

بنت الرجال مذبحة ظامر الحيل

أهل الوفا ربعٍ صقور كرامي

دخيلهم ماترهقه ظلمة الليل

دواسرٍ يحمونه بكل دامي

لطامة العايل كسابة الخيل

وبارودهم في ساحة الحرب حامي

لو قلت أوصف وصفهم صعب لو قيل

اخاف ماأوفي ذا الرجال الحشامي

وختامها بهديك سلامٍ وتبجيل

حب وغلا لك ياعظيم المقامي


وسلامتكم ...

ملاحظه / اللي بين الأقواس اسمي واسم بنت الحرمه ..

والقوس اللي لوحده (قبيلتي ) ,,,

واتمنى انها تعجبكم بس ..ترى فيه بعض التكرار في مجاراتي لها لاني كتبتها بشكل سريع هاك الوقت ..

تحيتي لكم / مشاعر حالمه ..

[شمــــــــوخ]

ماشاءالله

صح لسانتس يامشاعر وصح لسانها

ماقصرتي لاأنتي ولاهي


عجبتني حيييل الأبيات قواكن الله

بس ماأظن قسم المحاولات الشعريه هو المناسب

أظن المحاوره أنسب..

أمتعينا بجديدتس يالغلا تراي متابعتس

لاهنتي

,,

[محمد الدلماني]

صح لسانكم جميعا بس الابيات الاولى فيها اكمل الفراغ ماحلته شموخ

[فهد معزي]

مشاعر حالمه

صح لسانك على هذا الرد الرائع

وصح لسان الدوسريه على هذا الابيات

[مشاعر حالمه]

شمــوخ ...

بعد قلبي والله ..

واكبــر شرف لي انج تتابعيني فديت روحج يكفي حضورج وطلتج الحلوة ..

صح ابدنج ولاهنتي ياالغلا ...

صحيح والله ..المحاوره والرديّه هي المكان الأنسب ..^__^ سوري ماعليش أخطأت في القسم ..

بارك الله فيج ..

تحيتي لج / مشاعرحالمه ..

[مشاعر حالمه]

محمد الدلماني ..

^___^

اوكــي شمــوخ ماحلّــت الفراغ انت ليه ماتحله هع <== اقول وخري هناك بس

صح ابدنك يالطيّب ولاهنت ..

تحيتي لك / مشاعرحالمه ..

ملاحظه / تراني عدلت في الأبيات لأنه جاني نقد بسيط صغيرووون ^__* ...وعدلتها ..

يامرحبا بك عد ماسال من سيل

وعداد حرفٍ ينقرا بالاسامي

باللي سلامه عطّر القلب بالهيل

لفتت عنودٍ عطشت كل ظامي

بنت الرجال مذبحة ظامر الحيل

أهل الوفا ربعٍ صقور كرامي

دخيلهم ماترهقه ظلمة الليل

دواسرٍ يحمونه بكل دامي

لطامة العايل على سبق الخيل

وبارودهم في ساحة الحرب حامي

لو قلت أوصف وصفهم صعب لو قيل

اخاف ماأوفي حق قومن حشامي

وختامها برسل سلامي وتبجيل

حب وغلا لك ياعظيم المقامي

ان شاء الله انها تمام الحين ^_^

[مشاعر حالمه]

فهد المعزي ..

تسلم والله وصح ابدنك ولاهنت يالشيخ ..

تحيتي لك / مشاعرحالمه ..