ركني الخاص (كلمات منتقاه)

[النايفة]

ما بقالي قلب يشفع لك خطيه .... ذوبته جروح صدّك والخطايا

صاحبي بالله لا تعتب عليه .... العتب ما عاد تاسعه الحنايا

كل جرحٍ فات لي منك هديه .... وش بلاك اتخاف من رد الهدايا ..

[النايفة]

أتعبني الحلم ليـن الواقـع أنكرنـي
كني مسكت الفرج بيدي وهديتـه


مافيه داعي على فرقـاك تجبرنـي
حتى الجفا منك ولعنـي وحبيتـه


الجرح عـدى زمانـه لاتذكرنـي
هذاك وقـتٍ تعذرتـه وجافيتـه


لوشفت دمع القصايد كان تعذرنـي
تصور إن الشعر يضحك وبكيتـه


ماغيرونـي ياكـود الله يغيـرنـي
كم واحدٍ عنك يبعدنـي ورديتـه


وفيت وأدري وفايـه مايصغرنـي
صوبت يم الهدف لكنـي أخطيتـه


من طار سرب الغلا والشوق طيرني
شف ماعلى الأرض واحد ماتعديته


خذني على صدرك الدافي وسيرنـي
بعض الولع ياخذ الرجال من بيته


أبنشغـل فـي عيونـك لاتدورنـي
ودي بشيٍ أشوفـه مابعـد جيتـه


خليت قلبي معـك والله يصبرنـي
مبطي وأنا أقول قلبي وين خليتـه


نسيت أعلمك طيفك جـا يسهرنـي
بس أنت ماشفتني وشلون ضميتـه


إشتقت لك مابغيتك عـاد تشكرنـي
تغيب والشوق ماعمري تباطيتـه


ماخذ على خاطري والبعد قاهرنـي
مدري شسوي وأنا كل شي سويته


العام يوم الوعد تسبـق وتنطرنـي
مستغرب شلون هالموعد تناسيتـه


وين أنت رايح ولاكنـك معبرنـي
ماكني اللي علـى العالـم تمنيتـه


لاصار هذي علومك راح تخسرني
ماعمر أحد راح من كيفه وناديتـه


عند الكرامه أبيعك وأنت خابرنـي
الله وكيلك ترى كل شـي مريتـه

كانه هجر بالسلامه روح وإهجرني
أخوي لاصـد عنـي ماترجيتـه

[النايفة]

لجل الغلا نطوي البيداء ونقطعها
.......... مشاعر الحب لاعنه تعنيني
لاقلت لبيه من ثغرك وانا اسمعها
.......... نسيت بعد المسافه بينك وبيني
ياعشقة الروح ياخيرة مطامعها
.......... شوفتك عن باقي الدنيا تكفيني
محبتك من ثلاث سنين زارعها
.......... في شهر سبعه سنة خمسة وتسعيني
وداعة منك وانت اللي مودعها
.......... تجري مع دم قلبي في شراييني
والنفس تامر وأنا مانيب طايعها
......... الله عن العيب والمنقود يحميني
لو ان كبدي هجير الشوق لايعها
.......... أمر عطشان والشبه تعديني
ومدلعه في ذرى شيخ مدلعها
......... مقدام قوم على الشدات قاسيني
شيخ ليا كبرت الدعوى يسنعها
......... مهيب شيخة ختم والا ملاييني

[النايفة]

تــدري وش الــلــي ذابــحــنــي والــبــلا فــيــنـــي؟؟
ابــي اعـــرف عـــروق الــقـــلـــب وشــلــون تــســـرقــهــا؟؟
يــمـــكـــن تـــكــون الـــخــيـــانـــهــ مــن شــرايـيـنــي!!
والا حــظــوظـــكــ يــجــوز ربـــي مــوفــقــهـــا..
مـــا قــلـتـ لأحـــدٍ ســـوى أمــــــي((يــا بــعــد عــيــنــي))..
وشــلـــون خــلــيــتــنـــي لــعــيــونـــكــ أنــطــقــهـــا..!!!!

[النايفة]

ليه دايم تطري الموت بلقانا !
ليه تغرز سيرة الفرقا بصدري !
ذا بدل ما تطلب يطوّل بقانا
تطلب الله ياخذك من قبل عمري !!

[النايفة]

ياللي غيابك حط بالقلب تنكيل
ويلي على قربك ولاني بطايل
لاغاب صوتك ماتفيد المراسيل
وفر على الجوال كثر الرسايل

[النايفة]

لابو شعـــــور الحب لارحم حيه
ان كان جيتك بالغلا وانت ((صديت))