امسح دموعك مال أبو الضيق داعي ولا به أحد يستاهل الدمع يـا آميـر - °~*¤®§(§ شبـــكة ويــلان العـربـيـه §)§®¤*~ˆ°

**سليمان الجعفري** · 03/07/09, (02:42 PM)

امسح دموعك مال أبو الضيق داعي ولا به أحد يستاهل الدمع يـا آميـر

قصيدة الشاعرالرااااااائع / سلطان الرواد الرويلي بشاعر المليون

امل ان تنال اعجابكم

امسح دموعك مال أبو الضيق داعي = ولا به أحد يستاهل الدمع يـا آميـر
دنيـاك تقبـل بالمكـر والخداعـــــــــــي = ما وقّرت شايب ولا ترحـم صغيـر
الكل فيهـا عرضـة(ن) للضياعــــــــي = لو طابت الشربه فـلا تامـن البيـر
يا آمير كان أنـك تجيـد استماعــــــــي = اقضي بها قدام مـا تنسـر الطيـر
سعت لي الدنيا وأنا جيـت ساعـــــــي = وأثاري الدنيا تجنّـب عـن السيـر
دارت رحاها يـوم طـاح القناعـــــــــي = وكان الأمل فيها زهـور ونواويـر
أخذت منهـا يـوم كانـت تراعـــــــــــي = وخليتهـا يـوم القوافـل مدابـيـر
لاشك هـذا مـن كريـم الطباعــــــــــــي = الحـر مالـه بالطمانـه مواكـيـر
الحـر دايـم مـاكـره بالرفـاعــــــــــــــي = يصدع سحاب الصيف وقت المشاهير
واللي يحوش الطيب بسن الرضاعي = يفرق عـن اللـي يطلبـه بالدنانيـر
ان ما كست طيب المكـارم ذراعـــــي = قطعتهـا قـدام تفـرح بـي الغيـر
ياما بذرت الطيب والطيب ضاعـــــي = بـذرت حـبّـه للهوا والعصافـيـر
بذلت بالمعـروف قـدر استطاعــــــــي = وعضيت ابهـام النـدم والتحاسيـر
الصبـخ لا مـا يستـوي للزراعـــــــــي = وحلو العسل مـا يعرفنـه الدبابيـر
اقضي بها يا آميـر قبـل التداعــــــي = وعندك خبر سود الليالي المعاسيـر
انشدك ياللي حاضر الفكـر واعـــــــي = عن جوهره في وجهها الشر والخير
ما هيب سلعـه تنشـرى أو تباعـــــــي = ولا تنعرض بالسوق عند السماسيـر
تعيش في بيـت الكريـم الشجاعـــــــي = وتموت في وكر الخنـا والمحاقيـر
ريحانـة(ن) مـا نبّتـت بالمراعــــــي = يـا بعدهـا يـا قربهـا للقـواريـر
الله خلقهـا مـن عظـام الضلاعـــــــــي = عوجا ومع هـذا لهـا كـل تقديـر
قبل العرب في دفنهـا مـا تراعـــــــــي = واليوم تدفن لكن بصـورة(ن) غيـر
ان جيت ترجع للسبـب والدواعـــــــي = نادي على رجل(ن) وسـط الجماهيـر
ما هو من يلعـب هجـوم ودفاعـــــــي = شخص حضاري ملتزم بالدساتيـر
من دور جده مصلـح(ن) اجتماعــي = يعد نفسه فـي صفـوف المناعيـر
تلقاه فـي كـل المساعـي يداعـــــــــــي = يركض ورا الدنيا يحسب المخاسيـر
والبيـت آيـل للسقـوط امتـداعـــــــــــي = وكل(ن) على كيفه يريـد المساييـر
كان الغنم تسرح على غيـر راعــــــــي = تبشر بذيب(ن) محتري تالي اعصير
ما كنت اباكتب صدمتـي وارتياعــــــــي = من واقع(ن) فاسـد بكـل التعابيـر
إلا أنهـا عـدّت حـدود استطاعـــــــــــــي = وعجزت ألاقـي للخطـا أي تبريـر
ويا ناشد(ن) عن موقفي وانطباعـــــي = اقول حلمي ضاع من غيـر تفسيـر
طوّعت لدفـوف البنـات استماعــــــــــي = وكذاب من هو مـا يحـب الغناديـر
ارخيـت لريـاح المحبـه شراعـــــــــــــي = ظنيت ما بالبحـر مـوج وأعاصيـر
إي والله أني ذقـت حـب ووداعــــــــــي = وغنى (طلال) لمثل حظي (مقاديـر)
وحب الشرف مالي بغيره مساعـــــــــي = إن وردت الشينه أخذت المصاديـر
ماني مـن اللـي بالحيـاة اندفاعـــــــــــي = أعرف قدر نفسـي بكـل المعاييـر
من بـادي أيامـي وهـذا اقتناعـــــــــــي = الطيب كسب(ن) للوجيـه المسافيـر
ما أخص به أهل النفوس الجياعـــــــي = اللي بجمع المـال مثـل المناشيـر
اللي خذوا للجود (طلق اصطناعــــــي) = مات الجنين وللأسف ما حصل خير
حنا علـى مـد الأيـادي سراعـــــــــــــي = نمدّهـا بالجـود مـن غيـر تفكيـر
نمدهـا بالضيـق مـد الوسـاعـــــــــــــــي = وبعنا المواتـر والذهـب والمغاتيـر
لو نحسب اللي فات منـا وضاعــــــــــي = إن كان تمـلا مـن عطانـا قناطيـر
ومن يزرع المعروف لازم يطاعــــــــي = ذروة سنام المشيخه ذيك يـا آميـر
من رفقة الطيب تطيـب المساعـــــــــــي = ومن رفقة الخايب تخيـب المساييـر
يامـا عرفنـا صقورهـا والأفاعـــــــــــــي = وما يستوي العطار مع نافـخ الكيـر
والشمس تاصـل حدهـا بارتفاعــــــــــي = يحصل لها قبل الكواكـب محاديـر
من برجها تشرف على كـل قاعــــــــــي = تحكي لنا عن ماضيـات الأساطيـر
سبع العجايـب والـدول والقلاعــــــــــي = وتاريخ يسرد عن رجال(ن) مشاهير
عن حاتم الطائي صخـي الذراعـــــــــي = وعنتر ابن شـداد وكليـب والزيـر
انشـد وتلقـى للجـواب امتناعـــــــــــــي = صوت الهوا يصفر مع القاع تصفير
راحت بهم دنياك عقـب اجتماعــــــــــي = يا ليتها اخطـت حسـاب المقاديـر
ما يرجـع الميـت نديـب النواعــــــــــــي = الموت حق(ن) ما حصل فيه تاخيـر
امسح دموعك مال أبو الضيق داعــــي= ولا به احد يستاهل الدمع يـا آميـر

منقوووول

وللإستماع للقصيدة الرائعة