وإلى نشدني واحد" قلت ..} مدري

[اميرة الحرف]

لاأدري ... او مدري (بلهجتنا العاميه)

هذه العباره كثير مانرددها وكثير جدا مانسمعها
ولكننا لانهتم لها كثيرا وليس تقليلا من مكانتها في قاموس اللغه ولكن لأنها اصبحت مستهلكه
وبدون مبالغه قد تكون من اول الكلمات اللتي ينطقها اطفالنا في عامهم الأول ياكثر ماتلقى طفل تقوله أي شي يجاوبك ببراءه ( مدلي)


خلوني اتنحى معكم قليلا عن لغتنا الجميله العربيه لاتخافون مراح احكي اردو بس بتكلم بالعاميه عشان يكون الحديث ذا أريحيه اكثر

مدري يااعزائي اللي احنا متهاونين فيها وكثير من كبار السن يحبونها واركز على قولة كبار السن لأنهم بسطاء يكرهون الخوض في التفاصيل يعيشون الحياة ببساطتها وهدوءها ولن اقول سذاجتها لأن البساطه بنظري ونظر الواقعيين امثالي ليست سذاجه (( عالبساطه البساطه ياعيني عالبساطه))
يقول شاعر قديم لاأعرفه//
والى نشدني واحدٍ قلت مدري
.............حيثٍ في مدري تضيع البصاير


بعكس جيل اليوم اللي يموتون بشي اسمه تفاصيل ولذلك ترى مدري العدو اللدود لهم ولربما حقدو عليك وكرهوك بمجرد انك اجبتهم بمدري فأنت لم تروي عطشهم ولم تشبع نهمهم للتفصيل الممل اللذي يحبونه
ولربما صارت مشاكل ممكن توصل انك تخسر ناس تحبهم بمجرد انك قلت مدري

فمدري هذي مثل بعض الكلمات الانجليزيه اللي ممكن تجي بنفس النطق ولكنها تختلف في المعنى بحسب وجودها في الجمله

ركزو معي وجودها في الجمله لكن هنا صاحبتنا مدري مراح تكون بجمله لبساطة لغتنا مدري جمله بلحالها
بس ابلش عاد كيف تعرف تفسيرها

خلوني اتفلسف عليكم شوي

لو كنت تتكلم مع احد بموضوع عادي جدا وواضح جدا وماهو سياسي ولاشي
ولا راح تحش في مديرك في العمل
ولا راح تسأله كم راتبك
وفاجأك وانت تسأله أي شي عابر لو تقول وين سهران امس؟؟ لكان رد عليك بقولة والله مدري؟
ياخي لاتحلف طيب

مدري هنا كيف افسرها :

هل ممكن تكون مدري حقت اللكاعه والخبث واللي الناس يغطون بها حاجات كثير تصريف يعني

ام انها مدري حقت الضعف وقلة الحيلة واللي يلجألها انسان قليل الاراده مدرعم في حياته بدون هدف مايدري وين يروح

ولا مدري حقت الغيبيات والقدر اللي تعني مدري وش يسويبنا الله يعني ننوي تسوي شي بس تقول مدري من باب ان يسره الله

شفتو شكثر مدري

والمشكله اننا نكررها بدون أي تفسير من الاسباب السابقه ولكنها عادة وممكن لزمه في الحديث كما هو الحال مع محاكيتكم


خلونا نحذف مدري من قواميسنا عشان مايتوه المتلقي ويحقد عليك

اذا انت ماودك تقول وتبي تمرر موضوع خلك شجاع وصريح وقول اسف مااحب اتكلم بهالموضوع
ولاودي اخوض في تفاصيله

اذا انت ماتدري وين رايح تعال وقف شوي لاتطلع قبل تحدد هدفك عشان ماتقابل احد يسألك على وين وتقول مدري او اذا طقت براسك ودجيت من الطفش وسألك احد على وين احذر تقول مدري ياخي قول طفشان افر قول رايح لووتر ليمون اللي على التحليه حتى لو كنت متجه للشفا صدقني بتعدي عليه اكثر من قولة مدري

اما الأخيره حقت الغيبيات فأنت هات الأصل في الشي اللي تبيه ولاعليك اشكال في افصاحه والحقه بالمشيئه وان يسره الله
وريحنا من مدري

مدري شقولكم بس انشالله اني امتعتكم بسواليفي كما استمتعت بفشة خلقي عليكم

دمتم برخاء بقدر صفاء قلوبكم

عيووف

[هندي المقبل]

اختي العزيزه العيوف

طرح جميل ورائع

يقول احد الشعراء في احد قصائده :

كلمة "مدري" تكفيك عن كل نشاد = وتكفيك شر محفرين الجحاره

وخطر ببالي بيتا كتبته من قصيده قديمه :

كني مدري او بعد كني غبي = اسمع الكلمه واخليها تفوت
دام هالكلمه ماهزت منكبي = اتركه في صدر صاحبها تموت
عن كثير الحكي اعزز مذهبي = افضل من الرد عليه السكوت

======
اذاً كلمة "مدري" لها فائده كبيره جدا وارى انها مهمه ولا مجال للأستغناء عنها , وانا هنا اتكلم عن "مدري اللكاعه" كما سميتهيا وليست "مدري " التي تعني عدم تحديد القرار .

ربما سخطك على مدري في اخر مقالك ناتج عن كونك أمراه لانه وبكل صراحه هن اكثر من يعانن من هذه الكلمه فكثيرا مايجدن الاجابه على العديد من اسئلتهن "مدري" لا اعرف هل هو لكثرة الاسئله التي يوجهنها ام لكاعه من الرجل او تكاسل من الاجابه.

شكرا لك

[اميرة الحرف]

استاذي الموقر السيف القادم

شاكره لك مرورك وتمييزك للموضوع

اما عن قول ان النساء اكثر من يعاني من كلمة مدري بل على العكس انا اشوف ان المرأه هي اكثر استخدام لكلمة مدري نظرا لتحفظها في اجاباتها
بعكس الرجل اللي ماراح يتحرج او يخاف من نتائج الاجابه

عموما انا مدري ليش جايزتلك الكلمه بس انا صايره لزمه عندي وودي اتخلص منها لأنها من جد مالها داعي


دمت برخاء اخي الكريم

[سامي السيف]

انا مدري وش اقولك بس بصراحه شكرا على الموضوع

كلمة مدري لايمكن الاستغناء عنها لانها تختصر الشي الكثير وربما تكفيني من الاجابه على سؤال محرج او خصوصي شخصي

[هبوب العنزي]

بسم الله الرحمن الرحيم


العيوووووف موضوع يستحق التميز ومدام بنهرج عاميه ونترك اللغه العربيه اقولك


العيوف نيشانك صاب الهدف بهبووووووب مع كلمة (مدري)


كلمة مدري ساعات تكون طوق النجاة بالنسبه لنا ودرع واقي لعزف رصاص الاسئله الى تحوم


مثل طير فوق روسنا لجل هذا كلمة مدري مثل ماقلت لك طوق نجاة احتفظي بها يالعيووووووف


يقول الشاعر محمد الفيحاني


أنـــــا( ما ادري ) ومن يدري متى هــــــم


........................ لنـــــــا عقب التعذيب راحمينـــــــــا


اذا كان به يالعيوووف كلمة لازم نحاول التخلص منها فهي كلمة( ليت )


اما ( مدري) أبيها وأباها ونباها


تقبل مروري ولك كل الشكر والتقدير

[نجلاء محمد]

عزيزتي العيوف موضوع تميز بتميز صاحبته

( مـــــدري) كلمة نرددها كثيراً بمعنى وبدون معنى

في اغلب الاحيان نقولها هروباً من اي موقف مهما كان حتى لو كان بسيط وبأمكاننا الاجابه عليه الا ان وضعنا

المزاجي وقتها يفرض علينا قول كلمة ( مدري) فقط لعدم رغبتنا بالاجابه

عن نفسي اكررها كثيرا لاني من النوع الي ما يحب يسمع كلام كثير فانقذ نفسي بمدري عشان الي قدامي يسكت

وخلاص ههههههه

واحيانا نقولها حيره لعدم مقدرتنا لتحديد الهدف المعني

رأيي قريب من رأيك اختي العيوف ليتنا نتخلص من هذه الكلمه لانها بكل صراحه غير لائقه ان لم تقل في محلها

لانها تعرضك لمواقف غير مرضيه عندما تنطقها قد تكون واضحه للطرف الاخر انها هروب او تثاقل فبالتالي تشكل

حساسيه بين الاطراف

تقبلي تحياتي

نجـــلاء

[اميرة الحرف]

سامي السيف
حياك اخوي ولم تقل لنا اي نوع منها تستخدم
عموما بالتأكيد انها لايمكن الاستغناء عنه وتفك ازمات بس انا اتكلم عن تكرارها

دمت برخاء