ياشلاش مانعطيك حمر الطرابيش :::: لو جمعوا كل العساكر علينا

[حمدان المطرفي]

«®°·.¸.•°°·.¸¸.•°°·.¸.•°®»السلام عليكم ورحمة الله وبركاته«®°·.¸.•°°·.¸¸.•°°·.¸.•°®»


اعتذر عن الغياب الطويل اعضاء منتدى الويلان وذلك لظروفي وانشغالي عسى الله لايشغلنا الا بطاعته وجميع من يقرا




بيتين للشيخ محمد ابن سمير( ابو راجح) والملقب بـ ( حريب الدول ) وهو شيخ ضنا الولدعلي من عنزه أتشرف بذكرهما بدون ذكر أسباب القصيده



ياشلاش مانعطيك حمر الطرابيش
لو جمعوا كل العساكر علينا

دونك نسوق المال والخيل والجيش
وإن لزموا ياشلاش نرهن حدينا


أترككم مع ابياتها:

العلم ياقوم الردى و البخاشيش=من واقع الذمه ترى ماغدينا
لاصارت الذمه بسربة خفافيش=مرفوع عنا اللوم يوم ابتدينا
الشخبطه واللخبطه هي خرابيش..؟=ولا حساب ومسأله ماتعنينا
الدلو يابيري ونا فاهم الطيش=مايمنع الشاعر مدامه ذهينا
مايمنع إن الكدش تجمع كداديش=دام إنها بصيغة جماعه تجينا
ولايزعل الدرويش خولة دراويش=ولايربح الليله وبارح قضينا
إن كانت الدعوى بليا تشاويش=ياهملالي كسبها محترينا
ولو شاشت الدعوى نزيده وشاويش=تنعاج الأرقاب الرهيفه بيدينا
اللي نبت ريشه ترى ننزع الريش=وكم ليلتن ظلما عليها سرينا
المال ماورث سلاله على العيش=ولايرجع الميت مدامه دفينا
ونطح الجبل ماهو مثل نطحة كديش=شف العرب حولك وهم عارفينا
ودخيلنا دونه سيوفن معاطيش=نذود عنه فزعته لاانتخينا
يوم إنها مرسال جونا مطاريش=وشلاش لامنه دخل من يجينا
السيف يحكم ياكثير الطواريش=والشيخ أبو راجح نذرها يمينا
ياشلاش مانعطيك حمر الطرابيش=لو جمعوا كل العساكر علينا
دونك نسوق المال والخيل والجيش=وإن لزموا ياشلاش نرهن حدينا
مار إنتبه ياهيه خطك تفاتيش=والسوق لاتدخل ترانا شرينا
والشخبطه واللخبطه مو خرابيش=وحسابها بالسيف ياجاهلينا
ملبسك ياجاهل قديم الدشاديش=والعلم واصل من لبيب وفطينا
واللي نبت ريشه ترى ننتف الريش=حنا بني وايل فعلنا وخذينا

وسلااااااااامتكم ......


حمدان بن ربيع المطرفي العنزي

[خلف الغريب]

ودخيلنا دونه سيوفن معاطيش=نذود عنه فزعته لاانتخينا
يوم إنها مرسال جونا مطاريش=وشلاش لامنه دخل من يجينا
السيف يحكم ياكثير الطواريش=والشيخ أبو راجح نذرها يمينا
ياشلاش مانعطيك حمر الطرابيش=لو جمعوا كل العساكر علينا
دونك نسوق المال والخيل والجيش=وإن لزموا ياشلاش نرهن حدينا
مار إنتبه ياهيه خطك تفاتيش=والسوق لاتدخل ترانا شرينا

كفو والله يا راعي العشوا ولا هنتوا يا اهل الشويهات ونعم فيكم ..

الرائع دوما حمدان المطرفي ..

صح الله لسانك ولا هنت وتحية لك من كل وايلي ...

ابدعت والله يا حمدان في تضمين هذا الموقف المشرف الذي ضرب فيه الشيخ محمد بن سمير رحمه الله المثل الاروع في حماية الدخيل ضد اعتى الدول ...

هذه هي مواقف عنزة وهذه هي شيم عنزة وهذه هي مبادئ عنزة ولا تهون قبائل العرب عموما والف نعم فيهم ...

وهاهو محمد بن سمير يصدح معلنا الحرب على الدولة :

قولوا لريف الجار ماني مخاشيه=أنا الذرنوح اللي بعينه يذوبـي
دخيلنا هيهات يالقـرم نعطيـه=يلقى الامان ولايعود مغصوبـي
أخوان عذرا مطوبرين حواليـه=وعدونا يرجع كسيـر مغلوبـي
عاداتنا نقدي المعادي عن التيه=ومن لايبرهن عن كلامه كذوبي
قل له بظف محمـد كـان يبغيـه=واللي يقرب للدخيل امهزوبـي

ومرة اخرى يضرب اروع الامثلة في حماية الدخيل ..

عيت على الشيمـه سواعـد لحانـا=دخيلنـا هيهـات يجبـر وينـظـام
حنـا لياسرنـا بعـيـد ٍ معـدانـا=حنا الذي من نطلبـه حـق مانـام!؟
يابعد عن ضيـم الرجـال قصرانـا=ماننثني لـو يطلـب الجـار حكـام
أولاد وايـل مرهبـيـن ٍ اعـدانـا=نعفي الضعيف وللخصيمين ظلام...

وهاهو يخاطب شلاش دخيله :

ياشلاش مانعطيك حمر الطرابيـش=لو جمعـوا كـل العساكـر علينـا
دونك نسوق المال والخيل والجيش=وان لزموا ياشلاش نرهـن حدينـا
اخوان عذرا مابهم ماكـر كديـش=يرجع معيف وخاسـر ٍ مـن يبينـا
حنا بني وايـل بعـاد المطاويـش=حامينها من النقره الى حد سينا
مركاضنا يشبع به ناقـض الريـش=نرهب عدانـا كـان حنـا مشينـا
ستر العذارى ناقضـات العكاريـش=يامـا تسلطنـا ويـامـا عفيـنـا

الرائع حمدان ..

فعلا انت من جعلني استرسل بهذه السيرة العطرة فلك مني كل الشكر ..

[محمد الدلماني]

المال ماورث سلاله على العيش= ولايرجع الميت مدامه دفينا
ونطح الجبل ماهو مثل نطحة كديش =شف العرب حولك وهم عارفينا

الشاعر حمدان بن ربيع المطرفي العنزي


كفو والله وصح لسانك على هذا النص الرائع والجزل

[سعد النفج]

الاخ العزيز / حمدان المطرفي

صح لسانك

و نعم فيك

اسعدتنا هذه الشامخه

اعجبتني كثيرا

الله يعطيك العافيه

منتظرين جديدك

[هندي المقبل]

الشاعر حمدان المطرفي

الف نعم وصح لسانك على ماكتبت

دمت بكل ود

[عادل العايش]

الشاعر حمدان المطرفي
الله الله على هذه الروعه أبحرت بنا الى عالم جميل ورائع

وتاريخ يحمل الحكم والنصح

أنت دائماُ راائع

تقبل مروري

[ماجد الغانم]

الغاااالي

حمداان المطرفي

اهلاً بك ...وبعودتك

وصح لساااانك ...ولاهنت

قمة الجزااالة اتحفتنا بها

لله درك ...ولافض فووك

دمت بكل خير ...وداام هذا الحضور الجزل

تقبل خالص تحياااااتي