قصة وقصيدة ..الثــالثــة ,,, تفضل

[جلال الدرعان]

	السلام عليكم ورحمه الله وبركاته اسعد الله مساكم يا أخواني وأخواتي اليوم أنا جايب لكم قصه وقصيده وأتمنى تحوز على رضاكم هنا هكا الواحد والواحد الله في سماه العالي وكل بليس مخزيه الله .. هذا واحد تزوج هكالبنت وهو شاب لكن يمكن انه نظل والا جاه شي المهم ما عشت البنت توفت على طول والى يوم انحشت كبده عليها بس قام يتصدد ويتنحش عن الديرة يبي المكان اللي يبعده ويصده عن المكان اللي كانت زوجته فيه لين الله يوفقه ويرزقه بزوجه ثانية والا يشوف له دبره . الحاصل راح يمين ويسار وصفقته الدنيا على كل جال الله يدفع البلا لين جا يوم واشتغل عند راعي ابل واحد يبي يعطيه مثل ما تقول عشرة طليان في السنه ماهنا راتب نقد الحاصل ان الرجال راعي الابل هذا حبيب ولكن ما له دبره الدبره عند حرمته وله ثلاث بنات جميلات كنهن نجفات من بياضهن وامهم متوفيه وماخذ هالعجوز ولكن ذالعجوز تهوش وتصايح وتعرش جنوبها من الهوش ونجسه على ذالراعي المسيكين ( ياشين العجز اذا تصلطن ) شابه عليه وهو حبيب وقايم بعمله على المطلوب يشتغل طول اليوم الين يظلم الليل الى اظلم الليل والى توه واصل فك عن ركبيته ونزل شداده وتشطر هناك يحتري عشاه , وهو عاد امين ولا يطالع البنات ويستحي لكن هالعجوز القشرا تروع حالتها حاله عيونها متقلبه من الهوش يادافع البلا لها حس كنه حس رجال . يوم جا يوم من الايام توه واصل وهي تاقف له قالت انت جيت قال ايه جيت وش تبين بعد انا تعبان قالت خذ القرب هذي وقم رو والا عاد قربهم الله يجيركم كنها جنوب بعارين قال ياناس انا توي مروي لكم مرتين وحدة تكرم من عندي وانا تعبان هالحين جاي هلكان وانا ترا راعي مالي شغل في الري قالت قم بس انت تبي تاخذ لك عشر من الغنم تبينا حنا اللي نروي والله ان تروي ( الله لا يسلطنا ولا يسلط علينا ) اها خذ البعارين ورح هاه ثم اسمعني لياك تجيب من المارد القريب تراه دبق على كبود البنات تبي تروحه لمارد بعيد يجي حوالى خمسة كيلو اسمه العقيله قالت راح للعقيله , والرجال المعزب راع الابل رجلها يسمع من بعيد ولا قال شي هالمسكين والولد ما عاد قدر يقول شي ما بقي له من مدته الا شوي ولاهوب متفالس هو واياهم ويبي عرقته هالغنيمات المهم انه راح يجيب الماء من المارد اللي قالت عليه العجوز يهز على ركبيه عاد الرجال معزبه رحمه وشفق عليه نادي بناته وقال روحن يابنات معه ساعدوه وخلوكن بعيد , راحن معه يمشن وراه وهو تعبان والله ماهوب يمهن . مالكم بالطويله يالربع وصلوا المارد ورووا وساعدوه عاد وهو مسمي بعيره اللي هو يركب حزيم رجع وصار يتذكر ايامه منول وزوجته اللي حاشمته ومكرمته المهم يقصد ويقول .. يالقلب مادمت في حاجة معازيبك = اخـدم صلاحك وماقالـــوا فقـل تمــا قلط شدادك وخل حزيم يسري بك = وعجل لبيض الصبايا بازرق الجما بالك تصافي عدو السو يـوزي بك = شرب العقيلة على كبد الغضـي سما ياليت غض النهد باللحد يدري بك = انــك على النضـــو وراد ولك عمــا المهم وصلوا وحط القرب وجت البنت وناداها الابو وقال هاه وانا ابوك وش صار قالت والله يبوي يا قال ابيات حافظتهن هي وعلمت ابوها بهن ويوم جا منعقب فتره ويقوم الشايب ابو البنات ويقنع العجوز وحط عنده وحدة من البنات , زوجه وحده منهن والحقيقه انه يستاهلها طرقا كنها خيزرانه بدل اللي ماتت الله يرحمها ( يستاهلها مسيكين يالله تنسيه هالمزيونه دندرة هالعجوز ) // // أحبتي ..أتمنى أني وفقت في تقديم ماهو مفيد لكم وهذه والله غاية المنى..

[بنت الكحيلا]

الله يعطيك العافية اخوي جلال الدرعان

قصة وقصيدة ممتعه بارك الله فيك

وتسلم على النقل الرائع والجميل

لك كل الشكر

[جلال الدرعان]

اقتباس:
المشاركة الأصلية كتبت بواسطة بنت الكحيلا
الله يعطيك العافية اخوي جلال الدرعان

قصة وقصيدة ممتعه بارك الله فيك

وتسلم على النقل الرائع والجميل

لك كل الشكر




شكرا لكي من القلب على روعة
حضـــورك وجمال التصوير و وعذوبة الحرف
منك نستمد الحبر
لكي خالص الود

[خلف الغريب]

كعادتك اخي جلال مميز في حضورك.

الف تحية لك

[صالح الأسود الجعفري]

جلال الدرعان
الله يعافيك قصه وقصيده رائعه
دمت بخير

[جلال الدرعان]

اقتباس:
المشاركة الأصلية كتبت بواسطة خلف الغريب
كعادتك اخي جلال مميز في حضورك.

الف تحية لك




هلا بك اخوي خلف الغريب
واشكرك على مرورك الرائع وكل الشكر لك على
مشاركتك وقرائتك للموضوع ونتشرف بمرورك الذي يسعدني
وتقبل مني خالص الاحترام
كن بخير

[جلال الدرعان]

اقتباس:
المشاركة الأصلية كتبت بواسطة صالح الأسود الجعفري
جلال الدرعان
الله يعافيك قصه وقصيده رائعه
دمت بخير




كل الشكر لك اخي صالح الجعفري على مرورك الدائم الي مواضيعي
والله لايحرمنى من هطله وتقبل مني خالص الود
كن بخير