ماجد الولدعي .. مطلوب

[صالح السالم]

يا ماجد الولدعي يا مشغل الساحه
اللي نوا للقتال يجهز اسلاحه
لا تحسب السالفه خوخه وتفاحه
ياعين ياليل يادنيا من انتي له

سلام يا ماجد وعذر النجم يوم انه يغيب=تاتيه قوه لاهي بحوله ولاهو حولها
ان كان شفت الوضع يا ماجد بدا ماهو نجيب=لا تبتعد والناس عاملها بقد اعقولها

[سعوط المجانين]

ياصالح الجعفري والسيف ابو حده = ماشلته الا لرجل ٍ ماعرف حده
اتحدني شيمتي وبسيفي احده = ياعين يالليل يادنيا من انتي له

يامرحبا ترحيبة ٍ من طيبها يسلا الغريب = بالشاعر اللي ماجهل عرض العلوم وطولها
ماني بغايب والبشر فيها غبي وإبها لبيب = وسويسرا تصرف ذهب واسيوط تاكل فولها

[صالح السالم]

اعرف طريقي لا تحسب صاحبك غادي
رح علم اللي عن دروب السنع غادي
ناقف بميقافنا ونذل الاوغادي
ياعين ياليل يادنيا من انتي له

لا تحسب انك كل ما جنبت ما خلفك حسيب=حنا نعرف ابحارك اللي مشغلتك بلولها
الدار لو تكره ثراها ما تنسيك الحبيب=لا تستمي في ناس ما تاصل ربع محصولها

[سعوط المجانين]

اما ركبت الفرس ولا على شهري = تبا تبين النتايج يومي وشهري
يالوايلي منته بعمري ولاشهري = ياعين يالليل يادنيا من انتي

حاسب حسابي للسوالف من بعيد ومن قريب = يوم ان بعض الناس من خلفي تدق اطبولها
اسم ٍ يشرفني وانا شرّفت ربعي يالصحيب = والناس ياصالح ماظن انك نسيت افعولها

[صالح السالم]

ان كان ماجد يبي له كسب من جده
يجر حصانه على شاطي بحر جده
لو ان ما شغلته موروث من جده
ياعين ياليل يادنيا من انتي له

انا ادري انك ذيب ظلمى ما تجي في درب عيب=لكن طبع الناس يا ماجد تشيل احمولها
عاد انت لك حرية التفكيرلكن لك طليب=ان كان جبت الكلمه اللي ما يشرف قولها

[سعوط المجانين]

ياللي تقص الاثر لاتضيّع الجره = اما ترخّي حبال الدلو او جره
ياراعي الفول لاتكسر لنا الجره = يالليل ياعين يادنيا من انتي له

قود المطيه بالخطام الزين فالكون الرحيب = لاتضيق بك وسع الدّير بجبالها وسهولها
امرك عجيب ومطلبك ياصاحبي مطلب عجيب = اتوصّي اللي عارف ٍ مخراجها ودخولها

[صالح السالم]

نمد لك عون كان احتجت للمده
لكن متغيرٍ هالوضع له مده
من مد لك كف خير الخير له مده
ياعين ياليل يادنيا من انتي له

احق دارك بالمطر والخير والوقع المصيب=والا ديارٍ ما عرفنا غرسها ومحصولها
الذيب يوم انه يجر اعواه وده صوت ذيب=ما همته كل السباع اللي تهز ذيولها