مرثية متواضعه بالشيخ صالح الأمعط العواجي رحمه الله

[أبو طيف]

بسم الله الرحمن الرحيم


السلام عليكم ورحمة الله وبركاته


هذي قصيده كتبتها بالشيخ صالح الأمعط العواجي شيخ ولد سليمان من عنزه(رحمه الله )

وهي اول قصيده بحياتي اكتبها وقصتها قصه

بالبدايه بديت اول ثلاث بيوت (مدح) بديت بعد صلاة العصر مباشره

وبعدها بساعه ....... جاني الخبر المؤلم واللي حول قصيدتي الى رثاء

رحمة الله عليك يا ابو طلال


القصيده

بديت بسم الله ومع القاف سجيت=لين اغرقن قيفان شعري دلالي
ابحرت دون اكتب على دفتري بيت=واخترت من نضم القصيد الجزالي
لو قالو العذال يافلان ماريت=اصد عن عين العواذيل بالي
قلت اكتب الابيات بيتا" بأثر بيت=واسابق الشعار وارقى العوالي
هديت قيفاني على طيب الصيت=الشيخ صالح مدهلن كل بالي
هديتهن من يوم قالولي اقفيت=وانا قليل العرف في هالمجالي
جاني الخبر وياليتني وقتها ميت=يوم الخميس العصر قبل الزوالي
عجزت لكتم عبرتي لين هليت=الدمع من فوق الخدود اللتوالي
بعد الظهر نادو على الحي للميت=صلو عليه ووجهوبه شمالي
مرحوم ياشيخ جلسة وتمركيت=بين الضلوع ووسط مركز خيالي
يالله عساك بجنة الخلد وليت=ودارك خضار وكلبوهآ ضلالي
وصلاة ربي عد ماصبحت وامسيت=على النبي الهاشمي خير والي

وسلامتكم

ولاتحرمونا من تصحيحاتكم ونقدكم

ولا تواخذونا على القصور

ادري ان وزن العنوان اثقل من وزن الأبيات

لاكن وش نسوي شي بالقلب وقلناه بهالابيات

انتظر تعليقكم بكل شوق

تحياتي

[نافع عيد الجديد]

صح السانك ملايين

قصيده جزله من راس جزل

والله يرحم الشيخ صالح العواجي ويدخله فسيح جناته

لك الاحترام والتقدير

[رابح الغضيان]

رحم الله ابو طلال

وصح لسانك

قصيدة معبره

تحياتي لك ابو طيف

[فاطمه الجعفري]

الله يرحمك ياابو طلال


وانشهد انه فقيده وتسلم اخوي على القصيده المميزه



فاطمــــــــــــه

[أبو طيف]

نافع

رابح


فاطمه


مشكورين على المرور

لاكن مو معقول القصيده سليمه واقول كذا لانها اول قصيده لي

ولابد من وجود بعض الأخطأ اتمنى

ان ارى نقدكم وتعليقاتكم على القصيده

تحياتي

[رابح الغضيان]

ابوطيف

إذا هذي اول قصيدة لك فتأكد أنك شاعر

صحيح ان هانك بعض الملاحظات على القصيدة

بس موضوع القصيدة جعلنا نركز عليه غض النظر عن بعض العيوب

الموجودة بالنص

حيث هناك كسر بـأكثر من بيت وخلل بالوزن في بعض الابيات

وبعض المفردات في نهاية الشطر دون معنى

بدايه جميله واتمنى ومتأكد بأن الجاي افضل

وفقك الله ورعاك

تحياتي لك

[أبو طيف]

رابح الغضيان

شهاده اعتز بها من أستاذ

ولاكن اتمنى توضيح العيوب الموجوده بالنص

لكي تكون بحجم موضوع النص

واتمنى توضيح ايضاً الكسور والمفردات اللتي دون معنى لكي استفيد الخطأ

انا والله ماحطيت قصيدتي هنا الا ابي تصحيحاتكم

وتعليماتكم ... فلا تبخلن علينا وتكتفي بقول ان القصيده بها خلل

بالوزن وتسكت أنا ادري ان لابد من وجود كسر وخلل بالابيات ولاكن اين هو

وكيف تصحيحه

بأنتظاار تعليقكم لكي ترتقي القصيده بحجم موضوعها

تحياتي