مصافحة أولى][.. ياحلم عمري وأدري (الحلم) كذاب ..

[مشاري البواريد]

السـلام عليكم ورحمـة الله وبركاتـه

سعيـد بتواجدي بينكم في هذا الصـرح الشـامخ ، وهذه بدايتي معكم إخترتها لتكون مصافحتي الأولى ، عسى أن تنال شيئاً من رضاكم واستحسانكم.


ياحلم عمري ..

بنساك لكن دام هالجرح ماطاب
بنساك وأرجع من ورا جرحي أذكرك

ماهو أمل لن الأمل داخلي خاب
هذا مرار اليآس فيني ، وأبشرك

ماتت بي الشرهة ولا باقي عتاب
حتى المدامع تبتسم غصب تشكرك

أرضيت بي ناسك وانا وين وش جاب
انا خسرت الناس.. من شان ما أخسرك

ماللولاء بإخلاص ميزان وحساب
في شرعك اللي أصغر ذنوبه..الشرك

واللي يسلم (راحته) بين الأنياب
ذنبه على جنبه ولو تفركه فرك

ياحلم عمري وأدري (الحلم) كذاب
الا أنت مدري ليه دايم أفسرك!!

مهما تخالف واقعي فيك وأرتاب
يبقى جنـوني يعتذرلي ويعذرك!!

أزريت أجاوب حيرتي وأخلق أسباب
أنكرتني وشلون انا مقدر أنكرك؟

وخيّرت قلب ٍ عن مماشيك ماتاب
اما يوخر عنك .. والا يوخـرك

وأثرك محبة تعتلي حد الإعجاب
تضوي خفوقي لو عيوني إتعذّرك

النفس طابت .. لكن الجرح ماطاب
لو ماذكرتك .. يكفي الجرح يذكرك



وسـلامتكم جميعـا .. أخوكم / مشاري البواريد

[جنون الحلم]

بنساك لكن دام هالجرح ماطاب=بنساك وأرجع من ورا جرحي أذكرك

الله الله
لله درك
عزف راقي وكانك تغرد خارج السرب
دمت ولاهنت
ودام هكذا شعر

جنووووووون الحلم

[هبوب العنزي]

النفس طابت .. لكن الجرح ماطاب
لو ماذكرتك .. يكفي الجرح يذكرك



انا اشهد صح لسانك ترليووووون ولا يكفون اخوي مشاري دام هذا الابداع وهذا الاحساس ,,,

[سعد النفج]

مشاري البواريد

الله الله الله

شاعر عذب ..

نص اعجبني كثيرا و اخذني بعيداً .. هنااااك

الى عالم .. مشاري البواريد..

صح لسانك..

تقديري

[فهد الشافي]

شاعرنا الرائع مشاري البواريد

صح لسانك على هذه القصيدة الجزلة

دمت بود

[سعود المسعودي]

مشاري البواريد

الله الله الله

صح لسانك وعلئ شأنك

وتسلم يمناك على الرائعه

لاهنت يالقرم

[أبو غرام]

مشاري البواريد

رحبنا بك وانتظرنا جديدك وتفاعلك ولم يخب الظن بك

نص راقي برقي صاحبه

لله درك وصح منطوقك وسلمت انامل نقلت لنا هذا الجمال

دمت بود اخي وفائق التقدير لشخصك الكريم