أدري إنه يالسبيعي ماعليك ولا عليه..."الإسناد للشاعر بدر الحنيف"

[المسيكي]

السلام عليكم ورحمة الله ،،،
مسيتم بالخير جميع اخواني واخواتي اعضاء منتدى ويلان ،،،،

ويسرني ان اسجل هذه القصيدة

[size=4]

المسندة للشاعر بدر الحنيف المسيكي

.[/size]

راكب اللي ورّدوه من الديار الأجنبيّه = اشترك فيه اليهودي والملاحد والنصارا
صمموه مخصصينه سلعة ٍ ما فيه زيّه = بالفضا مجلوب جوّي منزّلينه بالقرارا
بلاااااا مدرّج حوّلوبه بالسّهال الجرهديّه = بديار ربعي قاصدينه وعافرينن للديارا
نزّلوه وقال (كاري) بس اصبر لو شويّه = لابد التشييك منّا قبل يحدث انفجارا
وقلت وخّر يالخواجه واترك الباقي عليّه =كثر هرجك يالكويفر ماله أيّ اعتبارا
قال حقي قلت أبشر كم تبغى من عطيّه؟= بالريال وبالفرنك وبالينّ وبالدولارا
قال ميّه وزود ميّه وحط فوقه ستميّه= ولو طلب بالزود حنا متمّمينه ما نتوارا
ثم شال وقال باااي وقلت مثله بالتحيّه= وبقيت أعاين في زمالة مصنّعينه بابتكارا
ولو وصفته كيف أببدا ؟ دام ما هنيّا حليّه = غير شكله ولون بديه مايقارب للشقارا
شفت رمزه إس بي وفوقه رموز ٍ سويّه = وتحت منّه شفت شيّ ٍ مايشادي للسمارا
له جناح وبه سلاح وكل شيّ ٍ داخلِيّه = خوفي إنّك لاهمزته طرت من وسط الغمارا
ذاك مشيه ويوم هدّا مثل ذيب ٍ بالشليّه = بالمعابش جاك سارح جاك عاد ٍ بالغـتارا
راكبه صنديد عارف للقريبه وللمديّه = نادر ٍ بتّاع حر ٍ ماكــره ماكـر حـــــرارا
مسيكي مجناه يرجع بالجذور الوايليّه = ولا تهيّت بالشوارع مخاوي ٍ بعض الخكارا
عايش ٍ مابين ربع ٍ كلّبوهم شوشليّه = جدودهم مروين حدّ المرهفات وباشتهارا
بالبداوة له زمان ٍ عايش ٍ عيشة هنيّه = قاني ٍ للذود كله للركاب وللبكارا
من (الحفيرة) لحد (خيبر) للديار (الهاشميّه) = من الشمال وثم منّه لليمين وبانكسارا
قم تحرّك يانديبي وشدّ من فوق المطيّه = بلا شداد ودون قيد ٍ قم توجّه بالمسارا
خطامها مافيه لكن تلقى مثله أو دنيّه = ماعليك إلا اتّوكل واستلم منّي قرارا
من دار (حائل) راح فوقه مدّ في وقت اضحويّه = من انطلاقه ماتشوف الا عجاجه والغبارا
جاب حدّه ما تقعطل خايف أسباب المنيّه = مثل حر ٍ بالمخالب شاّل ٍ جول الحبارا
بظرف ساعة وهو مروّح معقّب ٍ للفيصليّه = عاني ٍ ماراح يمشي لا يمين ولا يسارا
قاصد ( النظيم ) ياصل يم ربعي والسميّه = والسلامه والتحية للصغار وللكبارا
ويلفي بالذات للي قاصدينه وبه مزيّه = ليا لفيته كثّر الترحيب وهلاّ ابــْحرارا
عطه خطي لاتونّا وهو فاهم للقضيّه = فاهم ٍ معنى كلامي حاكره حكر احتكارا
بدر ابن غثيث أعني شوق بنت ٍ غشمريّه =من ساس ربعي بالملاقا مثل حيط ٍ والجدارا
مسكا مايعطون حقّ ٍ كان صارت مهمهيّه = ومحتمينن للتوالي كان عجّ الكون ثارا
يابدر مشكاي أنته بالليالي الخرمسيّه = انتصيتك دون غيرك وجيت يمّك بالجوارا
والمسدّة يالبناخي فيك ماهي بس كذيّه = مثلك وشرواك يمشي بالليالي وبالنهارا
ومن نعزّه مانخصه كود بأبيات ٍ عذيّه = ولا بغينا غير علم ٍ مشتعل مثل المنارا
دوك قافي فيه شوحي كلها أبيات ٍ نديّه = مثل ورد ٍ بالربيع مفتّح ٍ فيه اخضرارا
النفل ويّا الخزامى بالفياض وبالركيّه = طيب ريحه مثل عطر ٍ منعش ٍ يم العطارا
والمعاني يالسنافي جايّه مني هديّه = انتسلّى بالقوافي دام فينا اقتدارا
دامنا حيين نمشي ودنيتك هذي هفيّه = لو تزوم تعود تنكس ثم تنزل بانحدارا
لو تسرّك لاتغرّك انتبه أرها لهيّه = والعمر لابد يفنى دام وقتك بافترارا
وين جدّي ووين جدّك وين ذاك ووين ذيّه = راحوا ولا كنّ منهم نازل ٍ خال القفارا
خلق تفنى للهلاك ولا بقي منهم بقيّه = وحنا لاشك معهم داير ٍ والدور دارا
ذي عبره مستديمه وأنت تدري بالغميّه = ولابد الإنسان ياخذ من الليالي اعتبارا
ودنيتي يالقرم هذي شفت فيها كل سيّه = وقتي المذموم عيّا وقالّي كلاّ مرارا
انثنى الحر النداوي لد عينه للحديّه = والأصايل يالمسيكي بدّلوها بالشهارا
ومالَك إن كان تعجز شيله العصبة القويّه = ياهنيّك صرت شيخ محصّل ٍ كل الوقارا
والكرم والطيب أصبح بين شمس وبين فيّه = والعوايد كلبّوها ذايبه فيها انصهارا
والقريّب صار ضدك يضحك بسنّ ٍ خفيه = ومن أولّ ٍ يروح كلش مايحسّب للخسارا
والصديق اللي نخيته ايتعذّر بالجليّه = به عفانه مرسّنينه والرسن بيد العذارا
والدايح اللي من تشوفه تشهد أنه كالبنيّه = خاب سدّه كيف لبسه زاهي ٍ بنت السوارا
هايف ٍ سلتوح مثله ماعرف غير الرديّه = عايش ٍ بين الهدايف دايمٍ عيونه سهارا
والنهار اقضاه كله نايم لحد المسيّه = ياملا الفلاّل مهنا لا صلاة ولاااا اذْكارا
وبعد نبحه طول ليله انمسد عقب الأذيّه= تحت رمثه جاك رابض حافر ٍ مثل الجعارا
وش نقول و وش نخلي ويش باقي من جنيّه = وقتنا فيه البلاوي وشفت بالخلق استعارا
أدري انه يالسبيعي ماعليك ولا عليّه = مار هذي شيّ واقع ننكره والخلق تارا
وختامها سلام مني معطّر ٍ لاهل الحميّه = فيه طيب وفيه صدق وفيه نفحي باختصارا

فهد المسيكي

وسلامتكم واعذرونا عن التقصير .

.

[حمود نايف الهذيل]

كم هو صباح جميل..ان اكون اول متصفحي هذه المعزوفه الجميله

صح لسانك ياالمسيكي......تعودنا سماع روائعك الشعريه يارائع


تحياتي ....وتقديرررررررررررررررررري

[هندي المقبل]

صح الله السانك المسيكي

رائعه ونتمنى ان نرى رد بدر عبر هذا المتصفح

تحياتي

[فاضي عبدالعزيز]

الشاعر//// المسيكي



صح السانك قصيده جزله ورائعه


وهذا ماعودتنا عليه

وبنتظار قلم الشاعر بدر حنيف




لاهنت