يوم أتذكر بالعصور القديمات
وأسمع رواة يذكرون القبايل
تذكرعلوم شامخات جزيلات
كود السولف باقيات سمايل
يسوقني شوق لها كل الاوقات
وأطرب لها لوكان ماضي وزايل
لوكان فيها للعرب شن غارات
ومشاحنات بين صايل وجايل
ياصوت الغزاي وادلى بلا صوات
مد العقيد وحضبوه الاوايل
تتليه دكلات السبايا الرزينات
واقفا يدور معبسات الشمايل
غاروا على وضح تلالا لهيقات
حالوا عليهن كاسبين النفايل
وصاح المصيح فوق ناب الطويلات
البل خذوها مقحمين الدبايل
لحقوا هل البل طالبين المثارات
المعتزين بناقضات الجدايل
لحقوا على قب من الخيل عجلات
لحقت بكل مجرب له فعايل
الموت عند قطيهن له علامات
كم فارس من فوق سرجه تمايل
حمي الوطيس وصار للسيف صرخات
تلاحمت به صافنات الاصايل
المكرمات الضابحات الاصيلات
مسومات هاجمات ثقايل
القادحات المسرعات الثقيلات
الهاذبات بالغضب والغلايل
العاديات الصافنات الرهيبات
الواثبات المشهرات السلايل
المرهمات القاحمات السريعات
الراجفات اللاحقات العجايل
الجادفات الصاهلات الخطيرات
الجامحات الشاحنات الهوايل
عليهن اللي يدحمون المهمات
متوشحينا بالسيوف الصقايل
تلاحموا بمصقلات شطيرات
قطف النفوس وصاخن الدم سايل
المدرعين الشاهرين الصقيلات
القاتلين ومرملين الحلايل
ياما أرملوا من جادل زوجها مات
بسيوفهم طشوه حدر النثايل
يالمستمع عصر مضا وانقضا فات
جيله رحل والجيل هذا نزايل
عنهم سئلت وقيل تحت الثرى أموات
وحنا بثرهم سائقين الرحايل
دنياك يالمخلوق تجريبها أفات
دنياك هذي بين عدل ومايل
لو أقبلت دنياك تجزيك باقفات
أقفت بفارس عبس وكليب وائل
وين الاصيل اللي حكم بالمساوات
كلا شهد له بالفعول الجزايل
عبدالعزيز مكون المستحيلات.
يا ما قهر بالسيف من كان عايل
ليث يدش فجوج غاب مخيفات
كم حاكم من سطوته راح شايل
عوجا اليا ردوا لنصب الرهيفات
صارت على ذولاك عوج سحايل
السيف يشهد والقلم والسجلات
هذا الصحيح اللي ذكرته صمايل
العز لاهل العز ساس وعادات
ينسخ بسطرات الورق بالسجايل
الله جعل للناس طرق فضيلات
طرق تناني عاشقين الفضائل
درب المعزة للنفوس العزيزات
ماتقبله نفس تروم الهزايل
قصيدة الشاعر / الأسمر الجويعان الجعفري العنزي رحمه الله
07/06/09, (02:22 PM)
وصف الخيل الشاعر عنزه الاسمر الجويعان
العرض العادي
