قصة الدلخ بندر

[بندر الجعفري]

بسم الله الرحمن الرحيم اما بعدين000



سوف اقول لكم ذا القصه والله لايبلانا واحمدوا الله

هذا يا طويلين العمر والسلامه كان فيه فتى يقال له بندر الملقب بالدلخ وكان سبحان الله يتصف بالفداغه المبرحه لدرجه انه اذا بدر منه ماينم عن ذكاء ودوه اهله يقرون عليه المهم رجع ذا الدلخ بندر من المدرسه (يقالك يبونه يصير ذكي) وقت الظهر زي ما انتو عارفين ويكبس الغدا وتمسك غلط انه بيلعب كوره قالت له امه يا وليدي يابندر روق المنقا مالها داعي الطلعه هالحين 0
قال مانيب ولا عليكي مني وبروح العب كوره (طبعا ماعليه شرهه دلخ على اسمه)0


وفعلا راح وقام يحوس بذا الشموس الساعه12 الظهر ولابس بوت رياضه وفنيله كم طويل (حتى اسرى الحرب ماعذبوهم كذا) ويمشي في الحاره يدربي جمجمته=راسه ولا لقى احد يعطيه وجه كل شباب الحاره ضربو الغدوه وقيلو (الي هي القيلوله) وفي حين غفله لقى شي كنه ثلاجه من بعيد ويوم امعن النظر (حلوه امعن) واذا به احد عيال الحاره ويدعى رامي وطبعا ذا الشي اذا كان بندر يصنف دلخ فرامي يصنف من ذوات الاربع من قوه البلاهه ولو شفتو خدوده هاي كنها مخدات كنب كان اقتنعتو بمستوى الدلاخه الي يعاني منها رامي زي بندر طبعا ناهيكم عن وصف حواجبه هالي كنها علامه ناقص فوق عيونه غاطسه بهالشحم مير خلو الوصف جانبا (عقب ماقطع ولد الناس) راح له الدلخ بندر وهو يتلفت لاحد يشوفه من شباب الحاره يحاكي ذا الشي لانها عااااااااااار انه يتكلم مع ذا الشي بس زي ما قلت لكم انه مالقى غير ذا الثلاجه في الحاره والباقين مقيلين الشاهد من الكلام ان الدلخ بندر استخار الله ونادا ذا البقره الاليفه=رامي0


يووووووووووم ناداه الله يجيركم قامت الارض تهتز وبراطم الدلخ بندر قامت تصافق من قوه الهز واذا بشي اقرب مايكون تريله جايه من اخر الشارع تمشي ملييييييون ناصيه الدلخ بندر من الروعه الدلخ بندر بغى يوغما عليه بس بعد ماراحت النفاضه وام الركب منه وبدا يفكر في فداحه المشكله اكتشف انه من غير المنطقي انه بيوقف وذا الشي مقبل يمه ولا يعتبر نفسه في عداد المفقودين (حتى مهوب الموتا هذا يدل على قوه الاصطدام)
استجمع قواه وقرر يوخر عن ذا القطار وفعلا بعد ما فرمل رامي (يؤ نسيت اعلمكم ان ذا الشي الي انا اوصفه رامي وهو يركض خخخخخ) المهم
قال رامي وش تبي قال الدلخ بندر وش رايك تلعب معي كوره (وهو يتلفت طبعا)



رامي ماكذب خبر وافق سيده=على طول وراحو عند الساحه الي جنب المدرسه (من حبهم للمدرسه يلعبون حولها ا) طبعا اتفقو يكونون فريقين الدلخ بندر والهنود الي عند المدرسه فريق ورامي وباقي اعضائه فريق وبعد المباراه ماشافت الحلى ارتفع فيها ضغط الدلخ بندر للحد النهائي لان الهنود الي كان المفروض يلعبون في فريقه قام كل واحد يلعب على كيفه وشويه قلبوها كوره سله وقوه حره وذا البقره طاح فوق الدلخ بندر مرتين يعني اقل شي ثلاث ضلوع تكسرن في الدلخ بندر قفلت معه وقال هاتو كورتي وبطلت معاد نيب لاعب انقلعو . وهو ياخذ الكوره من يد الهندي ويروح (لاحظو ان الهندي كان يلعب بيده) يوم وصل البيت الا امه قاعده تكنس الحوش المهم يوم شافته قالت وش بلاك صرت بلاك=اسود
قال من الشمس يمه قالت لاعاد تطلع في ذا القوايل ترى بتجيك حماره القايله قام الدلخ بندر والتفت عليها التفاته معززه ببتسامه صفراء تنم عن خبث وقال يمه لو ما تطلع حماره القايله لو تطلع قودز يلا بكبرها ماعلي منها عقب الي شفته اليوم



سكتت الام وهي كل بالها ان قودزيلا ذي شغاله الجيران وصرفت الموضوع وقالت ادخل ارقد وانا امك الظاهر انك قمت تجيب خيط وخيط رح ارقد لين يقومون ربعك
طبعا ربعه ذولا لين ضربو الغدوه يسمعون بالقيلوله واحدهم يصفق ثلاث شهور بالرحه في قيلوله وحده ماصارت قيلوله ذي غيبوبه الناس لين رقدو عيالهم يحطون عندهم مويه وذلا يشبكون في يديهم مغذي من قوه النوم
الواحد لين قام من النوم لقى اهله مجمعين له جرايد عشان يلحق الاحداث الي صارت وهو نايم (يبااااااااااالغ يا ناس خخخخخخخخخخخخ)0
عموما دخل الدلخ بندر واتجه نحو مرقده ومن قوه التعب والقهر الي صار فيه اليوم حط راسه عل المخده وناااااام(لاحظو انه ماتروش عقب ذالحره)ولاقام الا اليوم الصبح0

ملاحظه:الدلخ بندر نام يوم الاثنين عام 1426هـ اتمنى انكم ماتصدقون لانها كلها سوالف ليل



الموضوع منقول