القهوة هذا المشروب الذي اصبح رمزا من رموز العرب وجزأ لا يتجزأ من حياتهم اليومية ...
تطرق له الشعراء الكبار بين وصف وتقدير وصرفه لمن يستحقه وتوجد عليه ..
ولو اردت ان استقصي كل ما قيل في القهوة لطال الكلام ولكن احببت هنا اورد عددا من القصائد اللي تدور حول
القهوة انتصارا لها مقابل صديقها اللدود الشاي ( اسمعي يا العيوف ) ...
ابدأ معكم بقصيدة الشيخ مشعان بن هذال في قصته المعروفة مع الدويش :
قم سو فنجال ٍ ترى البال منـداش ..=يا شوق من قرنه على المتن مرجود
في دلة ٍ مربوبـة ٍ كنهـا شـاش .. =وبهارها مقدار خمسة عشر عـود
والهيل حطه لا تداني ولـو جـاش ..= ومن الزباد اقنع على شذرة العـود
أبيه رسم ٍ للنشامـا عـن الـلاش .. =اللاش لا فاقـد ولا هـو بمفقـود
تر لـذة الدنيـا معاميـل وفـراش ..= وصينية ٍ يركض بها العبد مسعـود
والطيب سنة والردى كنه الطـاش ..= واللي يريد الجود ما هوب مـردود
في ربعة ٍ يقعد بهـا كـل هتـاش .. =يفرح بها اللي من دناياه مضهـود
وصفرا تلوح بالضحى كل مهبـاش .. =يصطي على قلب المناعير بالعـود
ربيع قلبي يوم زوعات الادبـاش ..= صفر ومغاتيـر ٍ ويبرا لهـن سـود
مرباعها الصمان تبعد عن الطـاش .. =ومقيضها دخنة ليا صـرّم العـود
أبي ليا جانا من المـال شوبـاش .. =وتطاوحت من بين الاسلاف جلحود
من لا يروي شذرة السيف لا عاش ..= عسى عليه مورّد الجيـب مقـدود
والشيخ هايس بن مجلاد رحمه الله له هذه الرائعة :
قم سو ما يصبغ على الصين لذيـاب ..= بـدلال يشـدن البطـاط المحـاديـب
احمـس ليا مـن العـرق فوقـهـا ذاب ..= واستدن ما يجذب عليـك الشراريـب
نجر يصيح من الطرب تقـل بحجـاب ..= يصبر على طـول الدهـر للمواجيـب
وليا انطلق من مزلقـه كنـه خضـاب .. =ورس صبغ بكفوف بيـض الرعابيـب
صبـه لمـن قـاد السرايـا للأجنـاب .. =اللي بمحاسه يشبـع النسـر والذيـب
والثاني اللي وان لفوا له علـى ركـاب .. =قدام بيتـه تقـل مجـزر قصاصيـب
والثالث اللي وان غشى الزمل ضبضاب .. =يرخص بعمره دون زمـل الرعابيـب
وباقي الملا يكفيهم التـول لـو شـاب ..= رصاصة المجلس حميـر المشاعيـب
اللي نهـار الكـون يفـزع بمصـلاب ..= كبـار الأنفـس ساهجيـن المواجيـب
وهذه القصيدة للشيخ وارد بن نهار العواجي في وصف القهوة وبعض المعاني :
الكيف قبل اليوم حنا شربناه=جدٍ على جدٍ شربنا الحشايش
ياما شعمنا النار للي تنصاه=يغدي عماس اللي على الكيف دايش
إنجورنا بالليل تسري على غناه=صهيل شقرٍ ركزٍ العرايش
فنجالنا يشدا خضاب الخونداه=ما قيل ني ولاله الجمر نايش
ردينا اللي تدفق السمن يمناه=لا صار تالي الزاد غادي نوايش
ابيوتنا بالخوف دايم مبناه=نرذ المعادي يوم دور الغبايش
الى تبين درب كود ضربناه=الى انهضم راع الضلوع الهشايش
كم هجمةٍ نجعل عليها مناداه=صملانها عقب التملي نشايش
خيالنا يبرز نهار الملاقاه=يروي حدود مصقلاتٍ عطايش
نصبر على زلت رفيق دمحناه=صبر الجمال اللي تشيل البلايش
الى من راعي البوق أظهر مخفاه=على الرمك نقعد صغا كل طايش
وهذا الشيخ سعد بن قطنان السبيعي يعتبر من رموز الكرم والسخاء في قبيلة سبيع وأحد مشاهير كرماء العرب وهو القائل في القهوة :
جر الفراش النا وهـات الدلالـي .. =أربع مغاتير علـى النـار تدنـا
ترى حلاة النـار دوم إشتعالـي .. =وسوقة فناجيل عليهم مـن أدنـا
فنجال أشقـر مثـل دم الغزالـي .. =ليا نقص شيء من الكيف زدنـا
أتعب لها بالسوم لو كان غالـي .. =لو كان زود بالثمن مـا نشدنـا
نشري لها المثلوث هو شف بالي..= لو كان سوقه نازح عـن بلدنـا
ياما دفعنا بالثمـن مـن ريالـي ..= غير القرا نسهر لهم مـا رقدنـا
وله أيضا في القهوة:
قم يا رويشد شب ضو المنـاره .. =ثم هات من صوته يقود المسايير
نجرٍ ليـا حـرك تزايـد عبـاره .. =يا زين صوته بين عوج الدواوير
يا مسوي الفنجال كثـر بهـاره ..= جلـفٍ ويتلنـه ثمـانٍ مغاتيـر
حاذور يالصبـاب تثنـي مـداره .. =ألا على اللي ينطحون المخاسير
أحد ليـا سيّـر عرفنـا وقـاره.. =واحد ليا سيّـر يـدور التفاكيـر
كم واحدٍ ناشـي بليـا خسـاره .. =مصبرٍ نفسه على البخل تصبيـر
هو يحسب إنّا ما نعرف الصقاره .. =يعد عمره من حساب المناعيـر
يا حبنـا والله لجمـع التجـاره .. =لولا الحياء حنا نعرف المعاذيـر
ومن قصائد القهوة هذه الأبيات من ضمن القصيدة طويلة الشهيرة للشاعر المعروف محمد العبدالله القاضي وهي في وصف القهوة وطريقة اعدادها :
دنيت لي من غالـي البـن مـا لاق ..= بالكف ناقيها عـن العـذف منسـوق
إحمس ثلاث ٍ يا نديمي علـى سـاق ..= ريحه على جمر الغضى يفضح السوق
وايـاك والنيـة وبالـك والاحـراق ..= واصحا تصير بحمسة البن مطفـوق
ليا اصفرّ لونه ثم بشـت بالاعـراق ..= صفرا كما الياقوت يطرب لها المـوق
وعطّت بريح ٍ فاخر ٍ فاضـح ٍ فـاق .. =ريحه كما العنبر بالانفـاس منشـوق
دقـه بنجـر ٍ يسمعـه كـل مشتـاق .. =راعي الهوى يطرب الى دق بخفـوق
لقّـم بدلّـة مولـع ٍ كنهـا ســاق .. =منصوبة ٍ مربوبـة ٍ تقـل غرنـوق
خله يفوح وراعـي الكيـف يشتـاق ..= ليا طفح له جوهـر ٍ صـح لـه ذوق
أصفر قمـوره كالزمـرد بالاشعـاق .. =وكبارها الطافح مـا صافـي المـوق
زلّه على وضحا بها خمسـة رنـاق .. =هيل ٍ ومسمار ٍ بالاسبـاب مسحـوق
مع زعفران ٍ والشمطري ليا انسـاق .. =والعنبر الغالي على الطـاق مطبـوق
فيـلا اجتمـع هـذا وهـذا بتيفـاق .. =صبّه كفيت العوق عن كـل مخلـوق
بفنجال صين ٍ زاهي ٍ عنـد الارمـاق .. =يغضي بكرسيّه كما اغضاي غرنـوق
إليا انطلق من ثعبتـه تقـل شبـراق .. =رنق ٍ تصوّر للحمامة علـى الطـوق
شكّل على الفنجـال لونـه إلـى راق ..= دم الغزال ليا انمـزع منـه معلـوق
خمر ٍ إلى منـه تسلسـل بالاريـاق .. =وعليه من ما صافي الـورد مذلـوق
راعيه كنـه شـارب ٍ ريـق تريـاق ..= كاس الطرب وسرور من ذاق له ذوق
ومن أشهر ما قيل في القهوة هذه الأبيات للشاعر دغيم الظلماوي الشمري حيث قال ::
يا كليب شب النار يا كليب شبـه .. =عليك شبه والحطب لـك يجابـي
حنا علينـا جيـب ماهـا وحبـه .. =وعليـك تقليـط الـدلال العذابـي
ادغث لها يا كليب من سمر جبـه ..= وشبه ليامنـه غفـى كـل هابـي
واحرص على جمره من احراق حبـه .. =ياما العرق تشوف على الحب ذابي
ودق البهـار وبهـره ثـم صبـه ..= تصبغ على الفنجال مثل الخضابي
ونجرٍ توال الليـل يدعيـك نبـه ..= لا طق طاره حس ذيبٍ بنابـي
الوالمه يا كليـب عجّـل بصبـه .. =والرزق عند اللي يجيب السحابـي
ومن يوجعه راسه ترى الهيل طبه .. =وليا تقهوا كيفـة الـراس طابـي
بـاغ ليـا شبيتـهـا ثم قبه .. =تجذب لنـا ربـع سـراة غيابـي
سـراة ليـل وناطحيـن مهـبـه .. =لا نسنست يا كن به سـم دابـي
بنسريةٍ يا كليـب صلـفٍ مهبـه .. =متلطميـن وسوقهـم بالعقـابـي
إن شابط المنزوع خطـو الجلبـه ..= ياما حلا يا كليب خبـط الركابـي
آقف لهم وأبـدي سـلام المحبـه .. =لا جنّب الهيّن عريـض العلابـي
بكلامٍ أحلى مـن شخاليـل جبـه .. =وأحلى من السمن الجديد العرابـي
مع كبش مصلاح لـك الله نجبـه ..= ومن مدفق السكين حن الركابي
خطو الولد فوقـه زبـونٍ وجبـه ..= ويجي عليهم من حساب الزهابـي
وأصبر وإن الصبر يا زين غبـه ..= يرقيك روس مشمرخات الهضابي
ومن لا صبر يا كليب في حكم ربه ..= هذاك يوم الحشـر مالـه ثوابـي
وهذه القصيدة الرائعة ذات الصيت الواسع للشيخ تركي بن حميد العتيبي :
يا ما حلا يا عبيد في وقت الاسفار .. =جر الفراش وشب ضـو المنـاره
مع دلة تجذا علـى واهـج النـار ..= ونجر اليـا حـرك تزايـد عبـاره
النجـر دق وجاوبـه كـل مـرار .. =ما لفه الملفـوف مـن دون جـاره
في ربعة ماهيب تحجب عن الجـار ..= لامن ولد اللاش مـا شـب نـاره
وأخير منهـا ركعتيـن بالأسحـار .. =لا طاب نوم اللـي حياتـه خسـاره
تلقاه فـي يـومٍ يضيعـن الأفكـار .. =يومٍ على المخلوق ما أطول نهـاره
وقم في قصير البيت حشمة ومقدار ..= لو جار فإدمح له ولو بـه خسـاره
ترى النبي وصى على الجار لو جار .. =خذ الحذر يا عبيد عقـب النـذاره
رافق قوي الدين حفّـاظ الأسـرار..=ينفعك في يومٍ يجـي بـه كـراره
ترى الهوى والغي هن شر الأشرار ..= ومن داس عار الناس داسوا لعاره
جنب ردي الكار مـا فيـه تعبـار .. =ما فيه من فعـل المناعيـر شـاره
واسلم ودم بالخير يا طيـر غيمـار .. =وصلوا على المختار ما غار غـاره
وهذه قصيدة للشيخ عجران بن شرفي السبيعي الذي اشتهر بأنه لا يثني الدلة ولا يذبح الماعز لضيوفه ::
يا فهيد صك النجر يوحيك بتـال .. =صكه كفـاك الله جميـع الأذايـا
استدن نجر في الدهر يعول اعوال ..= اعوال سبـع حاديتـه الضرايـا
وعليه كيف لي من البن فنجـال ..= جعل الرخوم ونسلها لـك فدايـا
وعده لحماي النوايـب والأثقـال ..= في الضيق لامن إلتقـن المنايـا
واللي يحزب زاد بيته ليا اكتـال ..= وحط المعاني الطيبة لـه شرايـا
واللي ليا رد البرا بين الأعمـال ..= لا رفعـوا لقطيهـن بالهـوايـا
واللي يروي حربتـه بالتجيـوال ..= له عادةٍ يرخص سمـان العطايـا
وباقي العرب خله ولو كان زعال ..= هذا وبالمجلـس كثيـر الحكايـا
والشاعر محسن بن علي بن جغيثم السبيعي قال أيضاً في القهوة::
يا عيد شب النار قم سو قم سو .. =قم سـو فنجـالٍ وزيـن قنـاده
هات الدلال ووسع بحفرة الضـو .. =شب بحطب سمرٍ ولوعه عـراده
خل النشاما لا تلافو لـك وجـو ..= يلقون من جدك مراسيم عـاده
إحمس من البن الخضر لا تلافوا .. =وللعود حط شـداد وألا وسـاده
وبهارها هيلٍ من الباخـرة تـو .. =توه منزّل من سنابيـك سـاده
مع البحر ملفاه وألا مـع الجـو .. =مع زعفرانه كبر رجل الجـراده
حتى يجـي فنجالهـا لا تقهـووا ..= مثل صفار البيض في كأس ساده
فإن كان هم عجلين قـل تغـدوا .. =وألا العشاء مضمون مثل العباده
حتى لا راحوا لأهلهـم وقفـوا .. =كلٍ يعد الطيـب علـى إنفـراده
وأيضاً الشاعر عبدالهادي بن راجس السبيعي قال في القهوة::
أوي فنجـال يصبـه مسـويـه ..= وحنا سوالفنا على جـال ضـوه
في ربعة والبيت يرفـع بقاريـه .. =بيت على ماقيـل يرفـع بقـوه
تالي نهاره وأولـه دايـج فيـه .. =قم سو فنجال المطاليـق سـوه
احذف لها رمـث كبـار مثانيـه ..= تـو الجماعـة نازليـن بجـوه
والماء تخيّر من زلاله وصافيـه .. =من مزنة ماخاشر العـج جـوه
واحمس ولاتحرق وحاذر تنييـه ..= ما بين فرغهـا ومابيـن تـوه
وإجغف لها من طيب الهيل غاليه ..= والزعفران بكثرة الهيـل شـوه
صبه على اللي طيبـات معانيـه .. =واختص من هو بالمراجل تفـوه
اللي يعّنز لك ليا رحـت ناصيـه .. =يسلـم ولا يسلـم ردي المـروه
والشاعر سلطان بن مبارك الأدغم السبيعي يقول أيضاً في القهوة ::
يا سليم شب الضو مالك مهانـه ..= يجي لها ضوحٍ يقـود السراتـي
وأشغل بفنجـال وزيّـن زيانـه .. =وإحذر من الإحراق وألا النياتـي
ريح وطعم راعيه ينشـع لسانـه ..= أطرف حمر لونه كمـا دم شاتـي
عده على اللي لا هرج لك تكانـه ..= قليـل هـرج وبالملاقـا زناتـي
يفداك من هو عايـش بالذهانـه .. =وإيديه لحبال الـردى قاضباتـي
طاريٍ عليه الجود تالـي زمانـه .. =زل الشباب وهو على ذا السواتـي
عند الجماعة مهلقٍ فـي لسانـه ..= وهو لا يحذف ولا يجيب الحصاتي
واشكر للجميع مرورهم ...
29/05/08, (12:50 AM)
( كيف الرجال ) .. القهوة العربية في الشعر ..
العرض العادي
