الشاعر محمد بن حسين الدسم شاعر الحكمة والموعظة
من أبلغ قصائد محمد في الحكمة والموعظة من تجارب
الحياة هذه القصيده وتسمى>>(الشيخة)<<حيث أن هناك
ثلاث قصائد تسمى>(الشيخة)<منهن قصيدة الشيخ مشعان
وقصيدة مقحم الصقري وهذه القصيدة
لقد نشر بعض أبيات هذه القصيدة البحاثة الأردني روكس
بن زايد العزيزي في كتابه ((معلمة التراث الأردني)) ونسبها
لغير صاحبها وهاهي القصيدة كاملة قالها محمد الدسم يوصي
أخيه أبو زعزوع فيقول:
ياخوي لك عندي وصاة مصيبه
....... ترى وصاتي تلمس العقل وتصيب
ترى وصاة أخوك ما به معيبه
....... ما دام اخوك مكمل العقل وامنيب
لابد أموات ولا ذرى تتقي به
....... واخشى توازى للدروب الضنابيب
سمر الليالي ما تعلم بغيبه
....... ولا يعلم الا صاحب العلم بالغيب
ودي تحرُص عن بلا كل ويبه
....... ويصير بك عرف وكمال وتأديب
ولا المقدر صار ما ينحكي به
....... ما يمحي هذا من الله مكاتيب
أول وصاتي بالفروض الوجيبه
....... صوم وصلاة وأد كل المواجيب
وثاني وصاتي للأمور الصعيبه
....... أصبر وبأمر الله تهون المصاعيب
جرح عبي له ما يكلف طبيبه
....... ولا فيه شي الا مضاله تجاريب
وثالث وصاتي تلعةٍ ينعدي به
....... تلقا عليها بينات المساريب
واللي عدابه ذيب من بطن ذيبه
....... ولا واحدٍ عدابها غير هو ذيب
ترى هذاك العرف من غير ريبه
....... راعيه ما يطلب ولا له مطاليب
ورابع وصاتي كثرة الهرج خيبه
....... هرج بلا معناه مسموج وايخيب
لا صار ما عندك علوم غريبه
....... وسط الرجال ترتب الهرج ترتيب
وخامس وصاتي خفة الرجل عيبه
....... من كثر الدوجات يركض له العيب
ان كان ما عندك لوازم تجيبه
....... تنحر لزومك كان ما جاك واتجيب
وسادس وصاتي لك معزه وهيبه
....... عليك بسفن البر حرش العراقيب
ولا يعجبك زبد الغنم والرويبه
....... ترغب لحوش الضان وتخلي النيب
راعي الغنم يشيب من قبل شيبه
....... والبل معزة تجلي الهم والشيب
إلى اشلهب الوقت لو هو حليبه
....... يوصلك لديار الهنا والتعاجيب
وسابع وصاتي كان صابتك سيبه
....... وتقدر على كثر الثمن والمطاليب
بنت الحموله والأصيل العريبه
....... اللي اقتناهن نال لذة وترغيب
واللي اقتنا بنت الردي والهليبه
....... أصبح بهم وجنب الربح تجنيب
والعوز يرث لك مذله وريبه
....... أردى الرجال اللي يسمونه السيب
عليك بالسقمة ولو هي تعيبه
....... ما دام بك حيل تنط المراقيب
ترى كثير المال كلن حبيبه
....... ينقال له فت جاي لو ما فعل طيب
ومن قل ماله صار شنٍ أروي به
....... لو كان طيّب يكثرن به شواذيب
وثامن وصاتي علمها ينحري به
....... ترى الدروب الفاسده فعلها ريب
درب الدنس والعايزة والقريبه
....... ترى هذيلن من كبار العذاريب
ثنتين من داخى عليهن احكي به
....... والعلم يظهر من أذان الأعاريب
مداخي على عرضه مثل شق جيبه
....... ومداخي على وجهه تعيبه معاييب
وتاسع وصاتي عن مناقر شريبه
....... لا صار ماهو من وساع المساريب
خله ويلقا بالموارد لعيبه
....... عند الموارد يكثرون اللواعيب
ومن دوّر العيلات غربل نصيبه
....... حسب حسابه من حساب المذاهيب
ومن ترك الشيطان حقه غدي به
....... ومن هاب طبات الملاعيب ما هيب
عن واحدٍ يبلاك او تبتلي به
....... حديكم يناحر ديار الأجانيب
وعاشر وصاتي كان حلت مصيبه
....... وبلاك ربك وابتلوك المغاضيب
احذر تمضي ما تسمي غليبه
....... أمض وتبيّن عن لحاق المشاعيب
أزبن على حصن الرجال الصليبه
....... اللي يحلون العقود المناشيب
اللي زبنهم ما يجي له طليبه
....... عده بعيطا عن سموم اللواهيب
وعندي وصايا للعقول اللبيبه
....... للي يضمه بالضلوع المحاديب
الضيف ضيف الله وصابه حبيبه
....... استقبل ضيفك في تهلي وترحيب
قلط له الميسور وما هان جيبه
....... واحلف على المذخور دين المعازيب
وخويك اللي بالخلا تبتلي به
....... خيال والا فوق عوج المصاليب
او من مشى رجلي ولا له نجيبه
....... او عورة يبلا بها عالم الغيب
اصبر وراع الصير مشكور طيبه
....... عند اللي يدور الفخر والمراتيب
وقصيرك اللي ما يصيبك يصيبه
....... وصابه الله له كرامه وتوجيب
والعبد لا بد ما كتب له يصيبه
....... واللي تجنب تايح الرمي ما صيب
الشيوخ والحكام زمل منيبه
....... بهم عمار وقضي لازم وتخريب
ما ينومن من شان منهم حليبه
....... عقب الصداقة ينقلب كنه الشيب
أهل خفايا وغيبهم ما دري به
....... يتحدرجون بدون عيب وتذنيب
عشرانهم أهل العلوم العجيبه
.......وصدقانهم مروين حد المغاليب
وان كان ما حدا الثلاثه تجيبه
....... مالك بهم والدرب شرق وتغاريب
خويهم ما يشتهي نفض جيبه
....... حكاي وجهين يقص العراقيب
هذي يوديها وهذي يجيبه
....... وهذي يسويها بين صدق وتكذيب
واللي حكى بين الصحيب وصحيبه
....... مخرب ويخرب بين ناس اصاحيب
سوالفهم دايم نميمه وغيبه
....... ولا يستحي كوبان من كلمة العيب
راعي النقيلي لا توارد قليبه
....... خل الردي ما فاد قربه ولا ايثيب
حذراك لا تنزل جوانب شعيبه
....... وبالك تحطه ياأبو زعزوع بالجيب
14/06/05, (08:57 PM)
(( الشيخه...محمد الدسم ))
العرض العادي
