البارحة .. ليل ٍ ولا شفت زيه = جاني بحالك ظلمته ما دهاني
ليل ٍ فرق من مقدمه عن سويه = ليل المفارق والغلا والاماني
ياليل كبوات النوايا البريه = وثقل القرار ليا نطق به لساني
والعيطموس ام الجروح النديه = مابين صكات الضلوع المحاني
البارحة جتني بنيه .. ونيه = مضرب مثل كيف الدلع .. للغواني
الارض .. من خطواتها مزهريه = ولون السما .. من فوقها ارجواني
جتني تسابق رجلها المخمليه = حتى دخلت عندي وزارة مكاني
وقبل السوالف .. دنة الهاشميه = واروت هدب عين ٍ سواده رواني
ان سلهمت .. سوا على الخد فيه = وان ارمشت .. يا طووول وقت الثواني
ثم شبكت يدّينها في يديه = فلت علوم ٍ سرها ما خفاني
تقول مظلومة وذيه .. وذيه = وان الخطا موجود به شخص ثاني
في وصفها .. شخص ٍ بلاها بليه = احرج تواضعها تصرف اناني
اهدى لها .. ثم بادلته الهديه = غنى لها .. ثم بادلته الاغاني
حتى احست بارتكاب الخطيه = فزة .. طواها بالبطى ما طواني
تدخلني بربي .. وتدخل نبيه = انسى خطاها لو خطاها نساني
وانا نسيت الارض والجاذبيه = نسيت قلب ٍ من جفاها يعاني
وتطري علي ّ حروف شعر ٍ قويه = للفارس الضرغام جزل المعاني
( خري وانا راكان زبن الونيه = ما يشرب القفوات كود الهداني )
بيت ٍ لحاله ما يردد حليه = كنه على شاني .. ولا هان شاني
صح الله لسانه حميد السجيه = من عقبها يا صح ربي لساني
يابنت .. انا من لابة ٍ وايليه = واسمو بنفسي عن مكان الطماني
مدام رحتي .. ما بقى لك بقيه = وليا رجعتي .. رجعتك ما تعناني
لني مع الوافي دروبي وفيه = واحاول اعطي فوق ماهو عطاني
واهل الخيانه .. مالهم بي حظيه = شموخ جدي .. عن عطاهم حداني
(وعذر الخطا) .. لا صار مثله خطيه = مثل الرسوب بمرحلة دور ثاني