من عادتي لا قسى وقتي تساهلته=ربي على الصبر بالشدات معطيني
ومن عادتي لو يزود الحمل بي شلته=صابر ولا تشكي الاثقال متنيني
الا من الثقل ثقل ما تحملته=الحاجة الي على مثلك توديني
النذل لو ان جدي جد عايلته=عن حاجتي له رفيع العرش مغنيني
برق على ديرة الانذال ما خلته=لو يثمر ورود واعشاب ورياحيني
العز طبعي ولا عمري تمثلته=من ورث جدي بكاس الطيب مسقيني
ادرس على يديه واجاوب على اسئلته =كذا قوانين وايل هي قوانيني
واذا غدر بي رفيقي قلت : مشكلته=والضربة الي ماتذبحني تقويني
ما اعامله لا تردى بي معاملته =لاني لفعل الردى ما تقدر يديني
كذا اعرفه دون اقنعة مجملته=الاوله فيه واما الثانية فيني
وان قال بي شين فيه الشين ما قلته=ذنبه يكفيه وذنوبي تكفيني
اخذت طبع النخل لو ما تطاولته=بالطوب يرمى وينزل تمره الزيني