يالج قلبي لجت الجمس يالج = راعيه مع لغف الطرايف يبوجة
وياحن قلبي حنت الطرش لا هج = شله عقيدا بس حنت خلوجة
وصل الصريخ وركبت الخيل بالعج = خيلا عرايا عجلوا عن سروجة
القوم فادوا دون وضحا تبهرج = على العزاوي والنخاوي حروجة
تطابحوا والرمي بالارض رجرج = يقدح كما برقا شعقته لعوجة
[معهم غلاما شد والخيل تفرج = كلاب له بالحرب نفسا لجوجة]
بين المتارس روس قوما تدحرج = والطرش يرزم والسبايا تعوجة
انا اشهد اني مثلهم صرت محرج = من واحدا عرق المحبة يسوجة
سبب عذابي يوم قرب ويرتج = ينثر حلاه من الدلع في غنوجة
يمشي وثوبه من خطاويه يحتج = كن السلاسل قيدت في دموجة
نجل العيون وكحلها تنثره كج = يذوب في وسط العيون الدعوجة
يوم اقبلت قلت البوارق تلاعج = والا القمر زايد علينا وهوجة
لو ينطق الشارع من اوصافها ضج = يضيق لو انه وساعا فجوجة
اللي بعرش الزين ميز وتوج = عليه حسرات المولع زعوجة
وانا مضالي من طعون الهوى شج = وسمه بقلبي لو تقافت حجوجة
ان هب من ريح الصبا خاطري سج = تقذفني الذكرى على كل موجة
تزج عبرات الهوى مقلتي زج = وحلفت درب الحب ما عاد ادوجة