طيف العنود
يا وجد حالي كل ما مر طيفه =طيف العنود اللي ذبحني هواها
لا جيبت ابرقد بالغلا سل سيفه=وغليه وغلي طيفها من غلاها
وجدي عليها وجد رملى ضعيفه=ماله قرايب وهجروها اقصراها
تلوّعه بقعاء بحال ٍ كسيفه=والحظ الاقشر ساعده في شقاها
والبيت طين ولا يذري سقيفه=وبعض الليالي ما تحصل عشاها
ولا تبين الحاجة بطبعه عفيفه=صبور لكن صبرها ما قواها
ماله بهالدينا سوى أمٍ كفيفه=ولها ولد صغير وآخر ضناها
جيعان لكن ما تحصل رغيفه=تموت لا من صاح وإلا دعاها
لا شافته يبكي تزايد رجيفه=وقامت تهل ادموعها من عناها
من خوفها عليه حاله نحيفه=آخر أملها بالحياة وعزاها
ترجيه يكبر له ويشغل وظيفه=وتطلب ولي الكون يقبل رجاها
وانا رجايه بنت شيخ ٍ شريفه=محد ٍ بهالدنيا عرف وش وراها
حبيبتي يا ناس ماله وصيفه=عقل وجمال وعال ٍ مستواها
عطاه ربي مع جماله لطيفه=يا حظ من يقضي حياته معاها
والله لو تسكن ديار الخليفه=دار الشيوخ اللي عزيز ٍ حماها
لمشي وراها طوع من شان كيفه=وبيع ما أملك ودور رضاها
واسكن بشارعها ومر برصيفه=يمكن تجي صدفه وفوز بلقاها
ومن لا مني يا عل يفقد وليفه=ويبلا بعله ما يلاقي دواها
رابح الغضيان