هواجيس القصايد

[صالح السالم]

اشغلتني هواجيس القصايد وغنت=غصب عني كتبت اعذب حروف القصيده
خيل الافكار في لحظه علي استجنت=بعد ما كنت فاقدها شهورٍ عديده
وبعد ما طولت غيباتها النفس عنت=قلت ابشرب فناجيل البيوت العنيده
ان تهيلتها عسراتها لي تبنت=اتخير من اجزال البيوت الفريده
غيمت في سماء وصف الحقايق وكنت=وامطرت فوق هضبان الورق ما تجيده
قلت ابكتب بجزل ابياتها يوم جنت=وصف في لابةٍ يا حيها من بديده
لو وقف دونها وصف القصيد وتعنت=ما وصل نصف في ذكر الفعال المجيده
من فعولٍ بها ماض الليالي تغنت=خلد الوقت ما خلد وتبقى جديده
سعد عيناً تجي من دونها لا تمنت=فزعةٍ تجعل النفس الشقيه سعيده
يوم زرق الرماح اعزومهم ما تونت=من نوى جمعهم يحسب احسابه فقيده
كم سيوفً بدم اعتى النشاما تحنت=لين يلحق عقيد القوم باقي عبيده
والهقاوي سنام المجد صوبه تعنت=واطينٍ على خشم العزوم البليده
ما استباح الحمى قوماً على الدار شنت=محتمينٍ دخيل الدار عن من يريده
سنةٍ بالعطاء تبقى وللطيب سنت=كسبت النعم لو تنهي بقايا رصيده
كن حتى حروف الشعر فيها تهنت=كل ما فل ما بالذاكره واستعيده