تعال عندي لك من الشوق لحظات=وعندي لك ابيات القصيد وأغانيه
وعندي من اللهفه بداية نهايات=وعندي نهر مايرتوي منه ساقيه
وعندي لك سطور ٍ بها نبض الاهات=وعندي قلم ماخانني يوم اناديه
قبل الوداع الى كسى الصوت ونات=وقف وعطني خافقن جيت اناجيه
ماعاد فيني حيل يامر الاوقات=ولاعاد لي صبرن على حمل ماضيه
وش حيلتي لاجيتني انت بالذات=وعطيتني عهد الغرام وامانيه
وفجأه تجي فرقاك هم ٍ ولوعات=وياخذك مني شي ماكنت هاقيه
مدري بكتك العين بسكات بسكات=مدري صرخت وقلت ماني مخليه
مدري سمعني حي في داخلي مات=ولاسمعني كل حين براضيه
شفت الرياض بكبرها والبنايات=زولك سكن في كل حي ومبانيه
وشفت النجوم الى بعرض السموات=تشهد على نظم القصيد وقوافيه
ضاقت على فجوجها والمسافات=ورحت ازعج الاصوات واقول ياهيه
يمكن تجي واشاهدك بس لحظات=وتعيد لي ذاك الزمان وطواريه
لوغبت ماغابت لياليك ساعات=ولو راح حبك عهد مانيب ناسييه
ببقى على ذكراك لو كان هيهات=ولو مر زولك غصب ماني مراعيه
بغض عنك الطرف واسلي الذات =ياقلب راح الي توده وتغليه
ودعتك المولى عليم الخفيات=يبقيك ياحب خسرنا معانيه
وانا على فرقاك بعد الابيات=ابحر معى شعري وارسي موانيه
واسلي اللى ساهرالطرف مابات=واشاركه والقلب مافيه كافيه
وسلااامتكم
طيف القصيد
23/08/12, (11:09 AM)
تعااال
العرض الشجري