حتى الجبل لو ما تهزه معاصير ** تنحت متونه من سطارة هواها

[خلف الغريب]

المشاركة الأصلية كتبت بواسطة سعد النفج

قصايدي عدت ابشركم بخير=واسقت رياض الشعر في محتواها
واليوم ابكتب لي قصيده بعد غير=علّ الضما يجفل ليا هل ماها
شاعر و اعرف ان المصايب مقادير=لكن قوي الصبر يتعب مداها
وانا تعبت من العنا و المشاوير=وتعبت من جدب الدروب و غثاها
ليا دلبحت روس الرجال المناعير=قل لي من اللي سالم ٍ من عناها
حتى الجبل لو ما تهزه معاصير=تنحت متونه من صطارة هواها
و الصبر مفتاح الفرج و التباشير=حكمه مفاتيح القهر من وراها
صبرت و متوني تشيل المخاسير=متون شيخ ٍ وقفته ما قواها
اسلا و لالي بالليالي مسايير=ما غير نجمه ساطعه في سماها
تشرب دلالي بين حشمه و تقدير=و امد كفي و ابتدي من غلاها
و سالم كتب له من قوي التعابير=سالم ابن صالح و فكري قراها
( شفني جبل من سبتك ياعصيفير)=شطر ٍ حفظته يوم سالم بداها
تسلم يا بو دانه/ عسى ايامك بخير=دليت واحد وجهته مالقاها
اثبت بإن الصبر شمس المشاوير=و ان الثقه عز الرجال و غناها

الله الله يا سعد النفج ..

والله وتالله وبالله انك مبدع ..

جمال روح وجمال شعر وجمال الفاظ كلها هنا في هذا البستان الشعري الرائع والمنظم ..

ولا هان ابو دانة شاعرنا المميز لله دره ..

حتى الجبل لو ما تهزه معاصير..... تنحت متونه من صطارة هواها

وسيبقى الجبل ثابتا بإذن ربه ...

لا هنت يا ابو شايش ولله درك ..