صورة وقصيدة

[صالح العرجان]

أنــا بطبـعـي أنـجـذب للنـوامـيـس
وأشيش لامن صاحـوا أولاد وايـل

الله خلـقـنـا لـلـقـنـا والـمـتـاريـس
مـاهــو كـــلام إلا كـــلام وفـعـايـل

ماهـو قصـورٍ بالحـرار القرانيـس
ولاهـو قصـورٍ فـي رجـال القبايـل

لكنّنـا مـن خلقـت الأرض فـرّيـس
نولد على ظهـر الخيـول الأصايـل

الله خلقـنـا لـلـحـروب المقـابـيـس
نشبـهـا مــن غـيـر نــار وفـتـايـل

عـدونـا مــا يـرقــد إلا بكـوابـيـس
الخوف سوى وسـط قلبـه عمايـل

وإليا صحـى تخطّفتـه الوساويـس
بقلـوب خلـق الله نسـوّي الهوايـل

مـا كـن فيـنـا بالمـلاقـا أحاسـيـس
عـدونـا دمّــه عـلـى طــول سـايـل

عـدونـا حـنـا نجيـلـه عـواسـيـس
لا طـوّحـت بالـصـوت أم الجـدايـل

الله خلقـنـا بالـكـرامـه طـواويــس
والله خلقـنـا نكعـمـه كـــل عـايــل

يا ما حفرنا وسط نجد التضاريس
وهـذي حـوافـر خيلـنـا لــه دلايــل

تاريخنا وسط الكتـب والكراريـس
يـدرسـونــه للـشـجـاعـه مـثــايــل

عاداتنـا مـن الكـرم نفـرط الكيـس
ورث الـجـدود الطيبـيـن الأوايـــل

يـا طامـعٍ فينـا تعـوّذ مـن إبلـيـس
مـالـك مــع أولاد وايـــل صـمـايـل