أوراق قديمـــــه

[سعود العواجي]

ورقــه أولــى :

شكـرا ً على الجرح كفيتي ووفيتي = عفوا ً على الحب والاخلاص والغيره
كذبه كبيره اذا في يوم حبيتي = كذبه وعقلي مصدق يالله الخيـره !!
بنيتي العذر وأنتي ساكنه بيتي = عذر المعزب على طردة مساييره
لمحت رمشي يصفق يوم مريتي = مثل المطر يوم لاحت لي تباشيره
مريتي القلب وقفتي وصديتي = رحتي وكني غريب الاهل والديره
مااهتز غصنك ولا في يوم حبيتي = ماينفع الحلم لو طارت عصافيره
صبحتي الجرح في جوفي ومسيتي = علمتي الحب كيف يكون تقديره
الله على الحزن يوم انك تعليتي = شي ٍ خيالي يفوق الوصف تعبيره
والحين جيتي ورحتي مثل ماجيتي = ماعاد لك باالغلا طاري ولاسيـره !!

ورقـه ثانيــه :

انا طفل ٍ حساه الحزن بيدين الهوى مقتـول = شرب شهد الهوى ولا ظن في شهد الهوى سمه
شرق به وقته القاسي وساقه حظه المشلول = وتعثر مالقى حوله شريـك ٍ بالهوى ..زمه
توسد وأمتلى عمره من هموم السنين سيول = وهامت به مجاديفه وتاه سنين في يمه
كما شيخ ٍ رباه الياس وخانه جسمه المنحول = وتيبس في شفاه الريق وثار لطيحته ..دمه !
بكى من ضيم ايامه وكان بعالمه مهمول = نشد عن سكة أفراحه وصدمه الواقع بهمـه
عجـز يكتم انين الحـزن من عينه يفوح القول = يجول لقلب حساده أحد غافـل وأحد شمه
وأنا مقدر ألم الشعر وهو في ظاهره منقول = ولكن لاانتثر غيضه على العذال با ..لمه
ولكن غزت بصدري رماح الفارس المجهول = وتغلت في شراييني صحيح ان الهوى ذمه
يايمه والمفارق خيل عسفها صدقي المجمول = ورميت اصدق مواثيقي على التوفيق يا يمـه
وانا ياكثر ماخضت المآسي والألم والهـول = ولبست من الهوى ثـوب ٍ قديم ٍ ضاق بي كمه
وسقاني سيل نظراته وتبعثر بالعيون فصول = وتدلت به عناقيد الكلام وذابت بفمه
ونسجته في خيالي حلم لاممكن ولا معقول = وجفوني باالعيون احضان تزيح الغير وتضمه
وانا اللي صرت له طفل ٍ على كفوف الهوى مقتول = شرب شهـد الهوى ولا ظن في شهد الهوى سمه

ورقـه ثــالثـــه :

لاتصدقني حبيبي لو بقول اني ماابيك = ولاتكذبني لو اني قلت حبك ذاخره
لاتوصيني عليك الله يرحم والديك = وانت عمري فدوتك من أوله لـ آخـره
ياحبيبي لاتردد دام قلبي في يديك = وأنت آمر لايهمـك هـرج ناس ٍ ساخره
اطلب الله كل ماتزعل يحفظك ويهديك = ويجعل ايامك حبيبي بالسعاده زاخره
انت توجك الخفوق وصرت في عيني مليك = وصار بيتك بالحشا مثل القصـور الفاخره
كل حرف ٍ من قصيدي يعتبر منك وإليك = وفيك لو تحكي الحروف احسها متفاخره
كل ماابحر عن هواك أرجع على شطك وأجيك = كن حبك صار مينا والخفوق الباخره
ولاتصدقني حبيبي لو بقول أني ماابيك = وأنت عمري فدوتك من أوله لـ آخــره !!