سهرت البارحه .. والدمع ساهر فوق رمش العين = وألا يا طول ليل الدمع .. دام العين سهرانه
تقالبني .. هواجيس الفراق اللى قبل يومين = فراقِِ .. منه نفسي يا رجال الطيب .. مرضانه
فراقِِ كان صدمـة .. ما إحتريناها .. تجي هالحين = ولكن جات .. وآآمنـّـا .. بـ حكم الرب .. سبحانه
فراق .. الوافي اللى في وفـاه .. يخـجـّـل الوافين = ماهو فرقـا الهنوف اللى لها عامين .. زعلانه
هذاك اللى علشانه .. عيوني دمعها .. زافين = هذاك اللى خفوقي يدبل الونـّـة .. علشانه
هذاك العجمي محمد مبارك .. طيب الجدين = أبو كلمة هـلا يا مرحبا .. لا شاف ضيفانه
هذاك محمد مبارك .. وريث السيف أبو حدين = هذاك اللى لقينا فيه .. جود وطيب جدانه
هذاك اللى بنى له .. سور عـز .. أشبه لـ سور الصين = فخر لـ عيون أبوه .. ورفـع راس لـ جملة اخوانه
هذاك اللى يجي ذكره .. مع الادنين والأقصين = ولا به غير كلمة والنعـم .. والنعـم ميدانه
هذاك اللى لـ صدقانه .. ولد عم .. وقرابة دين = وهذا ما جعل اغلب رجال الطيب صدقانه
محـمد سـيفِِ .. مجرّب .. بـ وقت العسر قبل اللين = ونفسه من عدود المرجلة والطيب رويانه
أبو وجـهِِ كريم .. ونيّته ما تقبل الوجهين = على وضح النقا .. والراس ما يختلّ ميزانه
ثقيل ليا .. حكـي .. ماهو بـ حكي .. الخايب المسكين = ولا أذكر يوم واحد .. مرّت العيبه على لسانه
كريم ليا عطى .. واصابعه ما تلمس الكفين = خلقه الله يمد .. ومـدّته .. جزلة ومليانه
على مثله يكون الحزن حاضر .. والتوجّد دين = على رقاب الرجال اللى على شوفته شفقانه
تنحـّر راس تنوره .. شمالي مغرب البحرين = بعد ما ودّع .. بـ روضة تناجيب .. أقرب إخوانه
توكـّـل بالسلامة .. جعل فاله .. وين ما اقبل زين = وعسى ربي يصبرنا على بعده وفقدانه
على الله يا محمد والرجا في شوفتك بعدين = مصير الحي يتلاقي .. وتفرح فيه حيـّـانه
الاخ الشاعر عبدالله الثايت
صح لسانك على هذه القصيده الرائعه نابعه من طيب ذاتك واكيد يستاهل هذا الرجل
قصيدة أخلاص الرجال للرجال ليس غريب على عبد الله الثابت
الذي ثبت على مواقف الطيب دائماً
وكما قال أخي صالح الضويحي يلبس الشعر رِداء الفخر والسمو عندما يعانق شموخ
الاوفياء فهم الابداع وصفاتهم هي الروافد الأجمل لجمالية الشعر ونقاء ذات شاعره
أخوي الغالى عبدالله الثابت
لك كل الود والاحترام
14/10/05, (10:26 PM)
العرض الشجري