ديوان الشاعر::: مزيد المزيد :::

[مزيد المزيد]

( يا عيال وايل )

ياربعنا يامحتمين المواقيف=مافيه داعي للعلوم الهزيله
هرج القفا مابيننا والسواليف=مامن وراها كود ذل وفشيله
حنا بني وايل ولافيه تزييف=نفخر بفعل رجال عز القبيله
اللي فعول ايمانهم بالخطر شيف=يوم انها بالسيف فوق الاصيله
واليوم كل الناس صارت مواليف=من فضل رب الكون ستر وفضيله
قلته وانا عندي عن الوضع توصيف=شاعر واباوجه رساله جليله
لهل النمايم والضعوف الملاقيف=اللي فنون الطهبله تستوي له
ينبش قبور اموات ردوا مناكيف=ويحّرث ارض" دمدم السيل سيله
عقب الرخا جتنا ختوم المظاريف=وكل" على ماقيل يحسب حصيله
ياحيف يابعض الرجاجيل ياحيف=اللي على ربعه يشب الفتيله
وياساعي" بالتفرقه والتحاريف=بالمختصر مالك ومال الطويله
راس الجبل ماحركته العواصيف=عالي ولاهمه عجاج النثيله
وياعيال وايل بسمكم كل تشريف=اسم" يعز وكلنا ننتمي له
هبوا معي في صف واحد كما السيف=سيف" ينومس باللقا من يشيله
ونبقى سوا في وجه ميل الصواديف=والجمع قوه والمعالي وسيله
وياربعي اللي تحتمون المواقيف=ماضاع رجل" حط عقله دليله

( مبروك يالويلان )

ياعيال وايل شيلوا الصوت بالحان = حان الفرح والعلم كلا ً دري به
ويالبيض قومن مابقى هم واحزان = شيلن ( زغاريد ) الفرح دون ريبه
قرّت عيون اللي له الحزن ديان = ومصيبته ياكبرها من مصيبه
الحمد لله فرّج الضيق سلمان = وصارت بسيطه عقب ماهي صعيبه
قال : ابشروا ثم ارتكى له بليهان = وشال الحمول وقال : والله لاجيبه
ولا هي غريبه وقفته عالي الشان = دايم من الطولات ياخذ نصيبه
سلمان عدّ ً كل من جاه ضميان = صدّر ملي مايشتكي من غليبه
سلمان غيمة خير بالطيب رويان = ياسعد من هو باللقا ينتخي به
سلمان .. راااسك لاعدمته ولا هان = يامن ملك قلب المواطن بطيبه
ولعيال وايل اثني الشكر عرفان = فرحة ابن عم ٍ فزع له قريبه
عند اللوازم كالجسد صف بنيان = عاداتهم ربعي .. ولا هي غريبه
اعصب بهم راسي إلا صحت ويلاااان = وافخر بهم واحس نشوه عجيبه
اللابه اللي فعلها خير برهان = حتى الصغير يرد كفه لــ جيبه
ولــ نسى هل المعروف والطيب باحسان = اللي يمد العون ربه يثيبه
اجر وغنيمه لارجح كل ميزان = عند الذي كل البشر تلتجي به
وعند الصعايب كلنا دم واخوان = لاضاق واحدنا غدينا طبيبه
والحمد لله فرحة ٍ نورها بان = يالبيض قومن ( لولشن ) دون ريبه

قصيده القيت في احد محافل قبيلة عنزه بمناسبة زيارة بعض رجال قبيلة عتيبه

وعلى راسهم ابن خربوش

أستمتعوا بقراءتها بهذه الروعه

هالليل هذا غير .. تعليلته ود=بدّل ظلامه نور والعز مدهال
ليل" طغت به فرحة" مالها حد=تلمس بعيد الغيم وتعانق جبال
زان القصيد وحضر حروفه الشرد=واسرجت خيلي للمعاني والامثال
ويالشعر ماهي سالفة هاتها ود=يازينها من الراس للراس تنقال
يامرحبا ترحيبة" مالها عد=تمشي على العتبان رجال .. رجال
ترحيبة" تفرح لياشافت الورد=ويشوش عند المرجله طيب الفال
واخص ابن خربوش بالطيب والمد=زبن الضعيف ان جاه يشكي له الحال
يعطي صخا مافكر بعيشة الغد=شهم" كريم وكل مداته جزال
من لابة" تاريخها لانجرد جرد=مفروض يحفظ للمناهج والاجيال
نخوة عتيبه للملا ماتبي سرد=امرا" مؤكد والخبر مابه جدال
نخوة عتيبه ورثهم جد عن جد=مبطي لهم في صفحة المجد تمثال
اصغرهم اللي لابدت لازمه سد=قبل الكلام تشوف في عينه افعال
ولامن نخيته جاك كله ولا صد=مازين اعذاره لك الوان واشكال
والطيبه بين الرجاجيل تنعد=ورد الثنا واجب على كل الاحوال
قلته وربعي لاقسى الوقت واشتد=هم الذرا عن جور وقتي والاهوال
ويلان عز اللي من الخوف محتد=خويهم مايشتكي ضيقة البال
وعن الجماعه يكفي القول من فرد=وانا عن الويلان رحبت بـ قبال
عصم الشوارب .. خطل الايدي .. هل الجد=اثقال بالهرجه وبالسكته ثقال
ترحيبة" في سلمنا مالها ضد=من قلب صادق شالها الصوت موال
يامرحبا ترحيبة" مالها عد=تمشي على العتبان رجال .. رجال

( سا حة الشعار )

لاصارت الغايه وسيلة جنوني = ما ابغى لهم غايه ولا ابغى وسيله
الفكر .. فكري والهواجيس لوني = والصوت .. صوتي مثل ما ابغى اشيله
والشعر نيشانه تشوفه عيوني = اكتب جزيل الشعر واترك هزيله
وأدله الخاطر .. واردد لحوني = والاعب القيفان واشعل فتيله
واسقي عروقي من سحايب مزوني = لاضاق صدري من سراميد ليله
وان شفت لي ناس ٍ تداحم متوني = ارفع متوني للحمول الثقيله
وياساحة الشعار هونك وهوني = كل ٍ عطاه الله على قد حيله
ماجيت امد الكف بالله عطوني = ولا جيت اباحجز رقم شاعر قبيله
ولا جيت ادور بالذهايب ضعوني = ياعنك مابه بالذهايب اصيله
جيت اكتب ان الشعر دايم زبوني = ارضيه واروي خاطره وارتوي له
وهبه .. ولا هو من دعايم ركوني = هو ينتمي لي بس انا مانتمي له
لا ماكتبته لجل اسدد ديوني = الرزق من ربي وربي كفيله
اصون حرفه عن خطاي وظنوني = ماينذكر عند الردى والفشيله
والشعر معنى والصعايب تهوني = والذوق فن وكل رجل وحصيله
ولا صار غايتهم تبرر جنوني = ما ابغى لهم غايه ولا ابغى وسيله

( حراً وطى غاربه باز )

العود الازرق عج دخانه مجاز = محشوم عن دخان راع الزقاره
وان جابوا (( القسيس )) حشمت ابن باز = والقدس تحشم عند برج التجاره
مثل الرفيق اللي له الطيب مركاز = محشوم عن راع الردا والدشاره
هذا مثل والخبز نصفه لخباز = لن الرغيفه تصطلي فوق ناره
ويامبارك اسمع ماكتبته للاعجاز = لكن كذا قريت نص العباره ...
ان شفت لك حر ً وطى غاربه باز = فـاعرف بــ أن الحر فاته قطاره
وان شفت لك خبل ً على الناس لماز = عادي / طبيعي / دام ضيّع وقاره
بس الردي لو فاز لاتحسبه فاز = يجيك علمه مع رفيقه وجاره
وياصاحبي قلها بلا هم والغاز = ماعاد به حر ً يعرف الاشاره
والاعرج اللي طول عمره بعكاز = يبقى عرج مهما تعدل مساره

( أمرؤ القيس )

يا امرؤ القيس والله مالها داعي = وش له توقف على الاطلال تبكيها
لــ تقول ذكرى الحبيب بحجة اقناعي = وش تنفعك ذكريات ٍ راح ماضيها
من صد عني حرام ان جيت له ساعي = دام المحاني تقوم وجرحها فيها
القلب غبة بحر والفضل لشراعي = مايلتفت للحدود اللي يعديها
بالمركب اللي صنعته بس لــ أبداعي = قبطان .. من وين ما ودي اوديها
ويامرؤ القيس كان السر باوجاعي = بعض السوالف تموت بفم راعيها
الفكر عزفي ونبض القلب ايقاعي = والشعر ونسة عمر والناس ترويها
وان كان صدت كذا عن روض مرباعي = لاتحلم اني اجيب العذر وارضيها
والله لو ان الجفا يلوي لي ذراعي = لاقطع ذراعي لها والويه بيديها
اهل النفوس العزيزه عشقها واعي = ماتنحني للغرام اللي يوطيها
ويامرؤ القيس .. ماتخفاك الأفاعي = تموت والسم باقي في علابيها
لابارك الله بعذر ٍ جرح اسماعي = ولابارك الله بمن هو جاب طاريها

( قولي له أن الخطاء )

ياشرهة الصاحب اللي مسكنه عيني=يسقيك نوّ الغلا من عقب تغبيشه
روحي لمن هو عزيز ٍ من عزيزيني=وقولي له ان الخطا من زود تطنيشه
وقولي له ان الوصل مابينه وبيني=لاينقطع ويتحمل دفع بخشيشه
اعاتبه والعتب ماعاد يرضيني=لاصار ناتج عتاب الوقت تهميشه
احيان اقول الخطا أثقل من سنيني=واحيان اقول الخطا أخف من ريشه
واحاول انسى واداري ضيقتي فيني=عن عين هرجة قفا .. عن كف تنبيشه
واطلق عنان الخيال اللي معنيني=واذكر زمان البراءه قبل تشويشه
يوم الغلا من عيون النبع يرويني=واسقي به القلب واروي له معاطيشه
تعبت ادور عذر واعطيه بيديني=عذر التعب والزمان المر والعيشه
يااااااااخي وش اللي حصل ؟؟ وش فيه خافيني =من قبل ترسل جنود الصد مع جيشه
لاشفت مني خطا والذنب كاسيني=تعال قلي خطا لايزود بي طيشه
لاتترك الوضع غامض في عناويني=ولاتترك الهرج تلحقني تناويشه
ما للجفا بيننا سلم وقوانيني=لازم نواجه برود الوقت ونعيشه
يمديك تلحق وصالي .. وانت يمديني=الحق وصالك وادور لك مطاريشه
وترى العتب من غلاتك وانت تعنيني =وترى الغلا ينمحي لازاد تطنيشه

ــــــــــــ صدى لصوت محمد المقبل ــــــــــــــ

يامرحبا مليون يا أعز الاصحاب=ترحيبة البدوان لاقبل مطرها
ترحيبة" تحمل مواثيق واعجاب=اقولها صادق وانوّه بـ ثرها
ان المعاني طيب والطيب جذاب=يقطف به الطيب معاني ثمرها
ويامحمد المقبل ترى سهيل لو غاب=ماريته لابد تلقى خبرها
بس البلا من طاح بعيون الاقراب=يفرح وزلة صاحبه ماسترها
مداح وجه وكل ماغبت يغتاب=روح الصداقه والأخوه نحرها
واللي تعاطى فكر الارهاب ماهاب=من سو نفسه والنهايه دمرها
بكره يجيه العلم ويشوف الاسباب=لاعافت النفس الرديه قدرها
لاعاش عمره طول الايام مرتاب=مابين شك .. وخوف نفسه قبرها
تجي له الدنيا كما المر لاذاب=في فم خاين نعمته ماشكرها
اشوف لي في داخل القاف محراب=(( سجود سهو )) وكل مؤمن ذكرها
لامن قفلت الباب لاتفتح الباب=بيبان خلق الله وش اللي كسرها
ماغير قولة شوفوا فلان وش جاب=مع كلمة" تنذر بعلة خطرها
أغرتهم الشهره على كسب الالقاب=لين اغرقتهم بالمصايب بحرها
والسالفه ماهي سواليف نصاب=يطيح بالحفره غشيم" حفرها
ومن طاع ربه لو خسر عكف الاشناب=عادي ولو هو بالمواقف خسرها
يمشي سنود ولو مشى بين الاجناب=محدن منع نفسه ولحدن جبرها

( ما عاد تعنيني )

يازارعه حنظل بتلويعة أهاتي= وياشايله بالخطأ جلباب سكيني
وش باقي ً من عيون الليل ماباتي= والسهر يرسم على خدك عناويني
يابنت دام الهوى من ضمن غلطاتي= باكسر غرامك قبل يكسر سكاكيني
زلـــه ولازم اصحح كل زلاتي= واعلمك من اكون ؟ وليه تعنيني
يابنت حوى يموت الحب بسكاتي= ولافيه بنت" بكت من صدها عيني
عاملتك بطيبتي ماقلت لك هاتي= مديت كفي ولابغى من يجازيني
رسمت حبك على هامة مداراتي= رفعت قدرك على شانك هويتيني
قريتك اول غلا يسكن كتاباتي= وكتبتك اول حروف العشق بسنيني
الين شفتك على نوتة نهاياتي= تعزف مواويل صدك في شراييني
ومادام رحتي ماهي باكبر معاناتي = حلم" كبر وانتهى في راحة يديني
كم قلت لك لاتغرك بيض ضحكاتي= لاشان وقتي يصير الطبع به شيني
الى هنا بس .. تكفيني متاهاتي = يعني اختصار الحكي ((ماعاد تعنيني))
انتي خسرتي وانا ربحت بك ذاتي= ياكبر حزنك مادام انك خسرتيني
واليوم ابانساك وانسى بك بداياتي= ماسامحك لو تجي وتبوس رجليني

[مزيد المزيد]

( لك لحالك )

خذ الحقيقه واسمع العلم من شان =ترتاح نفسك من هواجيس بالك
والله واللي خالق الانس والجان = انك بوسط القلب ساكن لحالك
يزود قدرك مايجي فيه نقصان = اتعب عشانك واتحرى وصالك
ولو قلت لك فلان وفلان وفلان = اكذب عليك ان قلت ادور بدالك
لنك هنا باقي على مر الازمان = لو غبت عني ماتغيب خيالك
مع كل ظلع .. وكل عرق" .. وشريان = تلقى بقايا من بقايا دلالك
رفيع شان ومهتوي عالي الشان = ومردد" مابين عمك وخالك
وان جات غلطه قلت ابد منت غلطان = اغلط على كيفك وكلي حلالك
ولو قلت لي وش فيك ضايق وزعلان = اقول ابد ماضيق دامي قبالك
وابقى معك في ((قمة الوعي)) نعسان = واصحى على صوت الخطر في سواااااااالك
ليه الغلا يموت في داخل انسان ؟؟؟ = مادام حالي تشبه ابعاد حالك
يعني نقول ان الغلا جاه طوفان ؟؟؟= وان الزمان المّر قطع حبالك ؟؟؟
يمكن بس اللي حامي" قوس الاجفان = رمش" وقف لك محتمي واحتمى لك
يضحك ولو هو واقف" فوق بركان = مره تحت شمسك ومره ظلالك
وارجع واقول الشعر زور" وبهتان = لني عطيتك كل عمري فدالك
اضيق لاشفتك من الوقت طفشان = واظغط على نفسي وانا فيك هالك
تـــدري من اول ماعرفتك الى الآن = وانا احس ان الغلا لك لحاااالك

( جمرة غلا )

مجنونها بالحب والقلب مجنون=مايعشق الا بنت عز واميره
درة بحر في وسط محار مدفون=وكل اليدين اللي تبيها قصيره
شامت عن اللي بالمحبه يحبون=وحبت خفوق" في غرامه جديره
وانا بعد مالي سواها بهالكون=مثل القمر لاغاب مافيه غيره
في حبها ما سمع سواليف وظنون=وفي قربها تصبح همومي صغيره
أميرتي مجنونتي ليه ماتمون=واصغر اصابعها شعوري تثيره
يا تاجي اللي ماملكته على هون =عزالله انك للانوثه سفيره
أن قلت احبك غارت عيون وعيون=كني مسوي لي جريمه كبيره
كلن ينشدني وش العلم وشلون =يستانس النجدي بوسط الفجيره
واسكت .. افكر .. كل علما" له فنون=والسيف حدّه مايضره جفيره
نسيوا منام طريف في حضن قسيون=يوم الدلع يلعب بقذلة سميره
ونسيوا ولّه جده على شوف عجلون=وهلّم جرّا والنماذج كثيره
وانا خفوقي ذنبه اللي يقولون = انه مجرد قلب يملك جزيره
والقلب عذره كل دقاته شجون=جاته سحابه بالمشاعر غزيره
جمرة غلا ومشعلله وسط غليون = راعي مزاج ومنبسط باتعميره
والعذر وافي .. والغلا راس ومتون=والشوق وصلة حب والصّد غيره
وقلبي معاه الحق والسر مكنون= بين المحاني ثبت الله مصيره
ومجنووونها لو قالوا الناس مجنون = قال : ايه عادي عاشقٍ لي أميره

ــــــــــــــــــــــــــــــــــــــــــــ


الــعــيـن تـدمـع لاطـرفــتـهـا يــديــــنك


قصيده اتمنى ان تعانق نقاااااااااء قلووووووووووبكم ....

ياخالد الدنيا عسى الله يعينك = محد" مشى فيها على كيف وده
فيها الغرايب والعجايب تدينك = مره رخااا .. مره قساوه وشده
وان مالت ايامك وشانت سنينك = فصل لحافك قد رجليك مده
يسترك من قل" بذله يهينك = لاروحت سود اللياليِ مصده
واحذر من اللي بالرخا محتمينك = البعض لاشانت تغير مرده
واتعب على الطيب وخله قريــنــك = وان شفت فعله للرجاجيل عده
وياحر شامخ ماتوطي جبينك = اقبل قصيد" ما أبي منك رده
العين تدمع لاطرفتها يدينك = لابيح الرجال سره وسده
والاجنبي لا اخطا تخزه بعينك = وان عادها تلعن ابو جد جده
بس البلا لاجات طعنة يمينك = من كف رجل" للمواقف تعده
اللي تحسب انه من اول عوينك = بيّن رداه وغير الوقت وده
واحسب حسابك بين نفسك وبينك = لاستاحش اللي حط يده بخده
والله .. الله في رضا والدينك =قبل الظلام اللي يوقفك حده
وياخالد الدنيا عسى الله يعينك = محد" مشى فيها على كيف وده

( سمو الاميره )

قيل قديم" ياسمو الاميره=ان الغلا ماينحسب بالمقامات
فان كان قبل اسمك كنايه صغيره=مسجله ضمن الورق والسجلات
فانا لي اسم" ماتمنيت غيره=يسمو بفعلي ماسمى بالدعايات
من رووس ربعي من قبيله كبيره=رجالها خلقوا لصعب المهمات
صغيرها رجال ضمن العشيره=يحسب حسابه بالامور الصعيبات
ودامك فتحتي للسواليف سيره=باعلمك عن سالفة ظلع ابانات
الشامخ اللي لو ظروفه خطيره=يبقى شموخه تاج رووس" وهامات
رفيع عن مد اليدين القصيره=رزين ماتابع هروج الاشاعات
في وقفته وصف الدروب العسيره=وفي جلسته طب الجروح العليلات
مثل الغلا والقلب يعشق مصيره=واللي عشق مافكر برغبة الذات
ادناة لمسه للمشاعر تثيره= لامره الطاري وجاب المطمات
ولاصارت الحسبه كذا مستديره=حسبة افندم عند بيه وبشاوات
ماعذرب الرجال شره وخيره=الا .. ليامنه نزل للسخافات
حلم الحقير يطول راس الحقيره= واهل الجزايل حلمها بالجزيلات
مثل الكديش لياعشق للحظيره= الحر عشقه للجبال الطويلات
ومن لاحسب خطوات رجله بسّيره=تكثر عذاريبه مع كل شمات
لكن عسى بفراق الاحباب خيره=دنيا المتاهه تنتهي بالمتاهات
ولا فيه داعي كل ماقلت حيره = قلتي خلاص نفض كل العلاقات
لن الشمالي ياسمو الاميره=بعده يجي دور الرتب والمقامات

اليكم اهدي هذه الحروف المتواضعه امام شموخكم ....

اااالبارحه ليلة قصيد وتعاليل=عشته مع اللي تكتب الشعر بحساس
بصمة انوثتها تهز الرجاجيل =ولمسة دفاها جمرة" تشعل انفاس
تكتب على صدر السما صرخة الليل =وتدفن بقايا حزنها فوق قرطاس
ماشوهت قيفانها بالتفاصيل =ولالونتها في سخافات الاقواس
تغار من كلمة هلاها مواصيل =وتخجل شفايفها من معانق الكاس
شفت المها بعيونها تعسف الخيل =وبنعاسها شفت السهر يعسف نعاس
احيان احس بهرجها نكهة الهيل =لاجاوبت شهقاتها لحظة الياس
واحيان احس بصمتها شي ماقيل =ماودها تحني على شانه الراس
ولا من حكيت ارخت لي السمع بالحيل =مثل ارتخاء الصدر لاعانق الماس
اعزف لها جرحي قصيد ومواويل =وتعزف لي جروح الغلا حزن واتعاس
وان قلت ليه الصمت قالت تساهيل =بكره تهون ويندحر كل وسواس
قلت ألله اقوى والرجا بالمقابيل =ناس تموت وينولد عقبها ناس
مع السلامه والوعد طلعة سهيل =لامن ثنى راس الجفا قوة الباس
وأيقنت أن الحزن سم التعاليل = من يوم شفت بعينها نوم ونعاس

يالله عسى خيره ويالله عسى خير = النفس ماتدري وش اللي خفاها
غيمة حنان ولفلفتها المعاصير = من ديره لديره توّمي عصاها
ضاعت ضياع الهند من كسب كشمير = من وين ماتمشي وبقعا وراها
حتى لقت شخص" يسمى شكسبير =شاعر شباب وميت" في غلاها
قال انتي حلمي قالت الحلم بكير = مافيه حلم" ينولد من خلاها
قال العمل قالت ورا الظلع به بير = والبير خلفه بيت شبكه معاها
والبيت ساكن داخله نافخ الكير = المجرم الظالم حياتي بلاها
مهري ثمين ولايجي فيه تقصير = ومحبوبتك في قص راسه رضاها
وفز وتزهل بالخطر سالم الزير = ولليوم هذا ماتحقق رجاها
راحت وراح وكل سكره لسكير = حاله جديده ينغمس في رداها
ويابدر قل للي على كفه الطير = ماكل صيده تشبع اللي رماها
وللشاعر المبدع عسى فاله الخير = وصل سلامي واخبره في مداها
قله ترا الغيمه تبي دهنة السير = ان كان له خاطر بباقي غلاها

ــــــــــ شطب على مصلح النشمي ـــــــــــــــــــــ

شطّب على مصلح بلا هم ياشيخ = عندي عمر غربي يساوي قبيله
حقه علي اجيه لو هو بمريخ = هي ابرك الساعات يوم اعني له
أخو وخوي لانوخ الوقت تنويخ = يكرب حزامه للحمول الثقيله
الصاحب اللي من حساب المطانيخ = الدهمشي طب الجروح العليله
ماهو من اللي لبخ العلم تلبيخ = اللي يضيق ان ضاق صدر الكحيله
في غيبتي لعداي سم" بذرنيخ = وفي غيبته لعداه غصب احتمي له
هو مسندي لاصار بالوضع تلطيخ = لاراح ابو وجهين واخطى الدليله
ماينفع المرضان كيّه وتمريخ= ولايستوي ( حاتم ) وكفه بخيله
فرقا وجيه" كسبها بس توبيخ= لانام ليل ولا اهتنى في مقيله
يذبح ويصلح لين تصفي على طيخ = ويرجع بخف حنين يطرق شليله
وامانتك لاجاك ابو بطن بربيخ = خبل" يدربيها على قل حيله
المهبد اللي يبتكر له صواريخ = تلفيق حكي ويدعي بالفضيله
قله ترا لو ينبت الظلع بطيخ = يبطي عظم هالراس ماينحني له
ولا انت لامنه بدت لازمه شيخ = شيخة ذراعك بالمراجل طويله
من رووس ربعك والرجال الطخاطيخ = دهامشه والسيل يجرف بسيله

اكبر فخر عرف الرجال المطانيخ = واني انا وياك نفس القبيله

[مزيد المزيد]

الشجره اللي غرست بحد بيروت = يابن غثيث الوقت جار وحرقهاااا
من عقب ماهي تنبت الخوخ والتوت = اغصانها طاحت وحتحت ورقهاااا
هذا مثل يضرب على كل سربوت = اللي خذا هذي وهذي سرقهاااا
ولا ادشر من المربوط ياكود مفلوت = والملعنه سلم" لمن هو فرقهاااا
يرفع كروته لين طاحت به كروت = خلا الذبيحه والتهى في مرقهاااا
استتفه الموضوع واغتر بسكوت = لين وصلت بدروبنا مفترقهاااا
ويابدر قله لاصبح الهم مكبوت =ينده على اللي بس توامى خرقهاااا
الشله اللي مالها حظ وبخوت = على الردا كل"برمحه زرقهاااا
وان طاعني يرتاح لايرفع الصوت = سحابة" بالبعد يلمع برقهاااا
وقله ترا طب الطواغيت طاغوت = ولا كل صخره تنفعه لادرقهاااا
تجيه جن الشعر بالكف تابوت = تبطش وتلعن خامس اللي سرقهاااا
وقله ترا دون الردا سكرة الموت = لجباه رووس" مدها من عرقهاااا
ماهي سوالف ضحك ومزوح بيلوت = السالفه يدري بها من طرقهاااا
شجرة خناااااا غرست على حد بيروت = اغصانها طاحت وحتحت ورقهاااا

ــــــــــــــــــــــــــــــــــــــــــــــــ الخاتم الالماس ــــــــــــــــــــــــــــــــ

الغصن الاسود لاتوكدت قصه=وذيب ً تهابه هد سنه ونابه
واللي يجيب العلم لاجاك وصه = لازم يرد العلم مادام جابه
ماينفعه مشروك نصه ونصه = لاصار سلم اهل المواثيق غابه
والخاتم الالماس لاطاح فصه = خله امل لاحلام ناس ً غلابه
يعتاش به صدرا ً من القل رصه = اللي يحسب ان الخواتم نهابه
يعقد شوش من شان يطلع بقصه= ماهمته لو الردى في ثيابه
اهم حاجه كيف يصعد منصه = ووشلون ياصل في يديه السحابه
لكن يا بووائل على الحلق غصه = بابقى عظم بحلوق ناس ً تشابه
واخر قرار بما يلي جاء نصه : = ماكل من يضحك بوجهك قرابه
ولكل شارب طال شارب يقصه = لياحطته تحت النظر والرقابه
والساق من حد المفاصل مفصه = حتى يموت العلم ماهي طلابه
ومال الجواب إلا سوالاً يخصه = واصعب سوال يجيك بعد الاجابه

ــــــــــــــــــــــــــ حاضر وسمي ، تحت امرك ومن عيني ــــــــــــــــــــــــ

حاضر, وسمي , تحت امرك , ومن عيني=لاصوتت لي طيوفك جيتلك معهن
ولبا عيونك الا منك نظرتيني=ولبا رموش ًتنهض لين ترفعهن
ويسعد مساء هالمساء ياشمعة سنيني=ياول جروح الغلا واخر مواجعهن

.
.
.
.
.
.

تربعي بالحنايا واسكني فيني=واجني ثمار الغلا من كف زارعهن
شاعر ولي ملهمه بالحب تسقيني=تنثر ورود القوافي حب واجمعهن
من حقك الصمت بس الصمت يشقيني=لاهلت عيونك النجلا مدامعهن

.
.
.
.
.
.
.

لايشغلك باللقا هم" معنيني=دام الجوارح على حبك مطوعهن
هاتي يدينك وحطيها على يديني=وضمي كفوف" جفاف الوقت موجعهن
ولفي ذراعك على متني وضميني=ضمة غلا تحيي عروق" مجوعهن
بردان من جور بعدك جيت دفيني=شوفي عيوني عذاب البعد لوعهن
باحط راسي على صدرك وخليني=اعد نبضات قلبك قبل لاسمعهن
وان طاحت خصال شعرك بينك وبيني=لامن غفيتي بعد اذنك بارجعهن
تفنني في غرامي لين .... ترويني =وانا المشاعر حرام اني لاولعهن

.
.
.
.
.
.
.
.
.
.
.
.
.
.
.
.

وان كان عيني غفت والسهر كاويني=لاتسدلين الستاره لين اودعهن
تقويسة شفاك وخدك يامعنيني=وخصلة شعرك وسواد العين رابعهن

.
.
.
.
.
.
.

حاضر, وسمي , تحت امرك , ومن عيني=لاصوتت لي طيوفك جيتلك معهن

ـــــــــــــــــ المنتدى ماجيت انا تحت ظله ــــــــــــــــــــــ

كل" على مذهب وكل" بمله = وكل" على كيفه يكون علاقه
وكانك تحاسبني على كل زله = ماعاد ابيلك يارفيقي صداقه
كل" على ناسه يشيخ بمحله = وكل" على ذوقه يحدد مذاقه
واعرف ترا من تاه غيره يدله = وانكار عرف اللي تعرفه حماقه
هالمنتدى ماجيت انا تحت ظله = من شان امثل دور حسن اللباقه
ولاجيت انا لجل العيون المظله = من شان ادور من وراها عشاااقه
الصبر في بعض المواقيف عله = لاشك احشم وجيه ناس" رفاقه
مار انت تكفى من يجنبك خله =ان طعت شوري خل عنك الطفااااقه
سيف الخطا من بيننا لاتسله = ومن مثل شكلك ود قلبي فراقه
واليوم كل" يارفيقي بمله = وكل" على كيفه يكون علاقه

ــــــــــــــــ افتح ياسمسم ـــــــــــــــ

افتح ياسمسم .. جيت ادور لي احباب = عدنان انا وابحث عن ديار لينه
تايه وادور من ورا فكري ابواب = او لا ..ادور من نجى بالسفينه
قلب" كفر في عالم العشق ماتاب = وش دخل احساس البشر بالضغينه
لينه .. فتاة" باول العمر ترتاب = تخاف لاسمعت ضجيج المدينه
لينه .. يتيمه مالها اصحاب واقراب = لينه .. بريئه بس دايم حزينه
من مات ابوها بعينها موتة كلاب = قدامها ذااق القهر والغبينه
وفزعة اخوها بين صادق وكذاب = لحق ابوه ودمعته وسط عينه
هي تدري انه مات والعمر به غاب = وهي تدري انه مات عالي جبينه
لكن بقى في قلبها لوم وعتاب = تمشي شوي .. شوي وتقول وينه
وينه زمان العز وش جاب وش جاب = مابه طمانينه ولابه سكينه
لينه .. بكت تحت الخطر بين الاجناب = تكسر يدين اللي تمادت يدينه
في صوتها جرح" بكى موت الاشناب = (( زئير ليث" )) ولعوا في عرينه
سمعتها تقول خاب الرجا خاب = وان كان فيكم حر يرفع يمينه
اقفى بها عبسي ولاحسب حساب =شاف الزمان اغبر وغبر سنينه
راح يتمخطر واحترامي للاصحاب = ماغير شجب وبالخفا محتمينه
لكن محال يدوم هالحال لو شاب = راس الطفل يجيه من هو يهينه
يالينه وينك.. منتي بــ صفحة كتاب= انتي حقيقه والملا خابرينه
مايضيع حقك دام للحق طلاب = طال الزمن ولا قصر تاخذينه
وبكره يجي عدنان يااولوا الالباب = ويفّرح اللي زاد همه ونينه

ــــــــــــــــــ صدى لصوت بدر الحنيف ـــــــــــــــــــــــــــ

شفني هنا واقف ولا فيه توديع = بالموقف اللي لاوقفته اذوده
ولاخير في رجل" نوى طلعة الريع = ليا اقبل عليها رجعنه قيوده
ويابن غثيث الوايلي ربعك سبيع =( دلاق ) لامن الخطر حك عوده
لاينشغل بالك برووس المفاريع = ليافرعن بيض النوايا بسوده
ابكارنا وضح" وراحن مفازيع = يوم الجمل .. راعيه شح بقعوده
ومثلك شجاع" مافزع بالمقاليع = يبين ماهو يختفي في حيوده
والشك زايل والزمن راسه يطيع = ماتلحقك شكات ناس" جحوده
والشرح واضح صح من دون تسميع = تعرف صفاته من ملامح ردوده
وان طعتني درب" يجي فيه تقطيع = ادمح خطاه وخل نقصه بزوده
الوقت لكعني مع الناس تلكيع = واصبحت خبره في خفايا سدوده
شاعر يجي من باب شهره وتلميع = غصب" على الناشر يلبي بنوده
وشاعر يجي من باب فزعه وتشجيع = في كل ليل وصبح يمدح جدوده
وشاعر يجي (( دلووع )) من باب تنويع = يفقع مرار الشعر سبة بروده
وشاعر يجي واثق يهز المجاميع = ياويل من ياطأ برجله حدوده
والمشتري عند الطلب لازم يبيع = وسهم" خسر به لايغره صعوده
( وجحر الحيايا غير جحر الجرابيع )= شطر" غدا بين ( الرفيعه وجوده )
فــ .ان كان ميت واجب" فيه تشييع = حتى يجيه العلم داخل لحوده
وان كان حي .. ليانوى طلعة الريع = عن غايته لايمنعنه قيوده

[تركي صالح]

_____ مبروك ياعيده ______

ياشاعر المليون مافيك حيله = يامعجزن بالمملكه عصم الاشناب
للوقت وقفه والليالي طويله=تقطع حبال وتبترم برمة الداب
تدور في لحظه وتلقى وسيله=تقنع بها عاقل وتكسر بها ناب
واليوم دارت واستوت للجميله=اللي غطاها سلعة ً عند كذاب
عباتها تقول لا للرذيله=وحجابها يقول للدين جلباب
شبت على راس الشراره فتيله =وصكت عليهم بنت الاجواد دولاب
جتهم على كف النقا مستحيله=وسوت لها في قمة الشعر مرقاب
تقول انا بالشعر روحي طويله=قد التحدي بالقصايد والانساب
يازينها كسب اللقب يالجزيله=وياشينها للدار بعيون الاجناب
بصمة انوثه في جبين الفضيله =ووصمة خزى بوجيه راعين الالقاب
مبروك ياعيده ومنتي قليله =شعرك صخر منحوت والقاف جذاب
ماله شبيه الا الجذور الاصيله= وماله نقيض الا المواقف والاسباب
واللي يبي يشوف بنت القبيله =يحجز على اول طايره يم الاصحاب
يشوف في عينه ويسمع دليله=مسرح ولجنه والتذاكر على الباب
واسكت ولا كلمه وعينك ذليله=ذا شاعر المليون ياعصم الاشناب

[مزيد المزيد]

ابيات خاصه جدا ً , وخصوصيتها لانها كتبت بــ انسان غير .

تقول اكتب لي قصيده .. وانا اقول = ماللقصايد في حضورك عذوبه
طلتي عروش القلب بالعرض والطول = وش لك بشعرا ً كل ناسي حكوبه
قصيد لامعقول ويصير معقول = لاصارت حروفي سبايب عقوبه
تكبر مع الغاوين واصير مسئول = عن كل غاوي تاه واحمل ذنوبه
ومتني تعب ماعاد يقدر على حمول = تهلك ضميره بين ذنب ٍ وتوبه

.
.
.
.
.
.

ادري كلامي فلسفة شاعر يجول = مابين ميزان الرخا والصعوبه
لكن مصير الوقت يكشف لك حلول = وتشوف في عينك حقيقة دروبه
ولا الغلا بالقلب والشوق معسول = وكم قلب رجال ً كشف به عيوبه

.
.
.
.
.
.

وش لك بشعري دامني دايم اقول = ماللقصايد في حضورك عذوبه
يارب ترزقني رضاها على طول = ويارب عفوك والأجر والمثوبه

وشــــولـــــه احــكــــي لــــك ؟؟!!

وشوله احكي لك وانا كلي جـراح=وشلون ابانثر جرح محدا" بكالـه
ماظنتي يابنت بالبـوح ابارتـاح=وش مكسبي غير العنا والجهالـه
سكرت باب البوح والصمت مفتاح=تكفين خلـي كـل حـي" بحالـه
لاتنبشين الصدر تشقيـن الارواح=ولاتجرحين القلب فـوق احتمالـه
قلب" بغبـات الهواجيـس سبـاح=غاص الهوى والحب قطع حبالـه
ياجارحه قلبي ترا الدمع فضـاح=وان طاحت الدمعه وش اللي بقاله
مايستره ثوبه ولاينفـع صيـاح=عزيز قـوم وكلنـا فـي ظلالـه
قلب" ليامن الخوي والغـلا طـاح=ياطا على همه ويكتب سوالـه ؟
ليه الزمن كسّر مجاديف الافـراح=وليه الحبيب يخون من هو وفالـه

اقــــصـــــر بـــ ثــــوبــــك ,,

اقصر بثوبك لايهمونك الناس = مادام قدوتك الرسول وكلامه
ولاتنزعج من كل وسواس خناس = لاصرت واضح ماتجيك الملامه

.
.
.
.
.
.

صحيح ماكل اللحى ترفع الراس = لكن سماهم واضحه بابتسامه
اللي لوجه الله تلقاه نبراس = والنور في وجهه لوجهه علامه
في مشيته .. في جلسته بين جلاس = في وقفته .. في مظهره واحتشامه
يامر على المعروف باسلوب واحساس = وينهى عن المنكر بذوق وفهامه
مسلم يخاف من الخطايا والادناس = والدين للرجال يرفع مقامه

.
.
.
.
.

اقصر بثوبك وانتبه تحني الراس = مادام قدوتك الرسول وكلامه

اسعد الله جميع اوقاتكم بكل خير ,,

مسج عاجل يصل للاخ سعود صالح العواجي

يامرحبا والشعر يقصر مسافات = بالشاعر اللي ممتلي بالمروه
حرفه جزل ماهو علوم وسخافات = لذا عن اذنك / واجب اني انوّه
لايخدعك مونتاج بعض القنوات = ماكل من يرفع قناته فتوه
شاعر رجل تلقاه وقت المهمات = وشاعر ذنب .. جلده حريرا مموّه
ولا القصيد الانثوي لانولد مات =واخر حدوده لانفجر في هدوّه
يبدا بداياته على عشر نيات = ويموت مابين الغلا والأخوه
واعقل رجل ماينثني للتفاهات = يحذر صديقه قبل يحذر عدوه

اسعد الله اوقاتكم جميعا ً

سررت بقصيده مسنده من الاخ مصلح النشمي يقول فيها : ..

بندقك فعلـك والمواقـف "نياشيـن=اما تصيـب الطيـب.. ولا سمـاوي
يوم ان غيري"بندقـه" فعلهـا شيـن=امدهـا ... ولا تخيـب الهـقـاوي
قم يانديبي حـرك الجيـب هالحيـن=واحذر على الموتر وانا اخوك تـاوي
خل الذي براسي يطب الوعـر ليـن=صـم الصخـر يفتهـا بالنـخـاوي

واتمنى انني توفقت بالرد على شاعر بحجم (عمر غربي ) ..

بندقك قلبك / والنوايا براهين = وان زان قلبك ماتخيب الهقاوي
وكثر المرامى مانفع حرب تشرين = انقلبت النيه وماتت عزاوي
وياراعي الفكسار مافيه بعدين = اصبر علي شوي لاتصير غاوي
اليوم تسري لاصبح الليل ليلين = لديار ابوفيصل زبون الجلاوي
عطه الرساله واضحه بالعناوين = وقله ترى مزيد قصيده رهاوي

.
.
.
.
.

يامرحبا بالقاف عند الكريمين = في منتدى الويلان والعز ضاوي
ويامرحبا بالشاعر اللي من سنين = تطرب له الشعار وقت الغناوي
الله يجيرك يابوفيصل من البين = والله يفكك من جميع البلاوي
قريت قافك والمعاني مضامين = ومضمون شعرك واضح ً بالحراوي
والزله اللي من ضعوف ومساكين = ماتنحسب زله ومثلك غناوي
مغنيك ربي بالرجال الميامين = وعرفة وجيه ً عرفها عود جاوي
ولاتستشك من كلمة ًبين خبلين = ولو هو عوج لاتلتفت للدناوي
وان طاح من عينك خبيث ً مليعين = هذي بشاره ماتجي بالمناوي
والاجنبي لاصار ذيب وحمر عين = اتعب على عرفه ولو هو نحاوي
ولا الردي لو هو من الناس الادنين = حذرا على دربه تسوق الخطاوي

هناك من يعشق (( اللوم )) ويحرض على (( التطنيش ))

وعبدالله عايد أحدهم

عبدالله عايد يلوم القلب باحبابي=يقول طنش وراس المال بنوته
مايدري ان الغلا سواني ارهابي=والقلب يمشي على كيفه بريموته
ولايدري ان السهر وسم لي اهدابي=من طول ليل العنا والعين مكبوته
ومايدري اني إلا طولت بغيابي=يرسل عتابه علي بنظرة سكوته
وان قمت اسولف وابرر له عن اسبابي=يمش دمعة عيونه في طرف كوته
وهذا هو اكبر دليل ان الزعل ذابي=لاطاح دمعه .. وشفت الموت من موته
اضم يده وابرهن له عن اعجابي=يا لولو البحر يا مرجان .. ياقوته
اتبع هوى خاطرك واجيك منسابي=مثل انسياب الشبح لازمّ كبوته
وليابتسم لي اضيع وتثقل ثيابي=اذوب مع ضحكته وادوخ في صوته
لله در الدلع لاصب باعصابي=واستنشقتها عروق القلب مبهوته

.
.
.
.
.
.
.
.
.

وان قال لون الغروب احمر بعنابي=اقول لون الشروق احلى من وقوته
لاشع نورك .. ظلام الليل يرتابي=ماكنه الا شفاتك وانت من توته

.
.
.
.
.
.
.
.
.

يعني كذا باختصار القلب منصابي =واللوم يزرع قنابل جرح موقوته
لكن تجمل يابوعايد عن عتابي=وناظر هنا صورته بالصدر منحوته
واشوار مثلك باسكر دونها بابي=وفر كلامك .. وكل ٍ مونته قوته
ولا انت ابن عمي ومن خيرة اصحابي=ماودي ازعلك من شان كتكوته
ومادمت انا حي مايبكي من غيابي=وان مت تكفون حطوني بتابوته