[[ خَفَايَا رُوْحْ تَعْبَانْهْ ]]

[أبو غرام]

.. واستمر بكيبوردياتي ^_^ ..
.
.
.

ادع ربك وانحني له وابتهل=يمكن الدعوه تجي معك وتصيب
دام مبنى العرف عندك من جهل=مالك الا دعوتن عَلّه تجيب
من تردت قيمتك مالك اهل=خالفت دنياك هقوات النصيب
علمك امسى من مراقيب لسهل=خابت علومك عسى عمرك يخيب
جيت تصهل ليت مثلك ماصهل=النَعَقْ ماهو صهيلٍ يالبيب
الفكر شَبّ وشبابٍ أو كهل=ومضةٍ تضرب معاك او هي تعيب
يسبر اغوارك ومن بيرك نهل=يخبر العالم عن اسرارٍ تغيب
جيت لك ناصح على مهلٍ فهل=تسمع اللي يعرف العلّه طبيب
ادع ربك يمكن الدعوه تهل=تفرج الكربه وتطفي لك لهيب
غيرها والوقت الاقشر ما مهل=كم حسودن مات من حسرة صحيب