من قصص اورنس الشعلان

[عبدالله التركي]

الاخ العزيز صالح العرجان شكراً لمرورك امابالنسبه للقصيده التي قالها الامير محمد بن احمد السديري رحمه الله فهي ليست اسناد على الشيخ اورنس بل هي رثاء فيه رحمه الله واليك القصيده؛


يسقيك يادارٍ شمالي عنازه = غربي الولج ياعلي شرق الطريبيل
سقاك نوٍ ممطرٍ من عيازه = على رغاب القاع فيضٍ من النيل
عز الله إنه راح فيها جنازه = صميدعٍ توصف عليه الرجاجيل
له في عازاتٍ ولي فيه عازه = وقت اللزوم لياحصل بالدهر ميل
مالوم قلبي لو يزيد اهتزازه = جرّ الونين وشاف ضيم الغرابيل
عيني كما شننٍ تفتق خرازه = عليه دمعات المحاجر هماليل
حرٍ جزع وادما بقلبه حزازه = وتفجرت شعبان قلبه مباهيل
تقصر يمين اللي بالايام هازه = يرجع ذليلٍ فاقد العقل بهليل
اللي لمح ضده ثقيلٍ مرازه = أخو محمد صافي الذهن حلحيل
من شبِّته ياما قطع من مفازه = وياما ظهر من غرقةٍ كنها الليل
رقا سنام المجد والطيب حازه = وبيته لعصمان الشوارب مداهيل
قلبه من البالود ماهو قزازه = والغيض قد فجّر قلوبٍ مغاليل
وان داخل الشردان رعب ونزازه = الذل مايلقى عليه المداخيل
هزيم حطوا حفرته بالعزازه = براس الطويلة وارفع القبر بالحيل
ومن الذهب حطوا لقبره ركازه = ومن صافي الياقوت حطوا قناديل
حتى يجيه اللي بعيدٍ منازه = ويلقى بقربه شمّخ القود والحيل
إعتضت به ربعٍ لقلبي لهازه = أعني هل العليا عصاةٍ مشاكيل
علمي ليا جاهم سريعٍ نجازه = وانا لهم دايم على العدل والميل
هم فزعة المظلوم وهم جهازه = وبالفعل للشعلان تشهد هل الخيل
شعلان فيهم بالحرايب فيازه = بجدع المدرع فوق قبٍ مشاويل
ربعٍ حماهم مايقرّب حجازه = وعدوهم أسقوه ويلٍ بثر ويل
إن حل ضرب مخلّصٍ بالبرازه= أرووا حدود سيوف حدبٍ مناحيل
أحد يحوش الطيب غصبٍ خزازه= وناسٍ عن العليا ضعافٍ مهازيل
يبين لك فرق الذهب من بيازه = فرقٍ بعيد أبعد من الجدي لسهيل
البيض ترضع لين يابس عرازه = وبالألف يظهر واحدٍ به تنافيل
تاخذ رفيعين المباني بزازه = ياليتها تعتاض عنهم تباديل
إن قيل قلبك مصخرٍ بانحيازه = قلت الوفا له وسط قلبي مناقيل
وانا أحمد الله ماحظرني خزازه = وردون ثوبي ضافياتٍ مضاليل
يسقيك يادارٍ شمالي عنازه = مزنٍ من المنشا ركونه مخاييل

الامير الشاعر : محمد أحمد السديري