ولو رزق الملا بكفوف راع البنز والفكسار

[فواز الغسلان]

ولي العرش ماحطك على روس البشر رادار=وعن عيب العرب عالج شرور النفس وعيوبه
وهرجك لاسرى من دون لا قابض ولا شنكار=تبي تلقى الذي لاجاه ذكرك قال والكوبه
وترى اللي يطلق لسانه بميدان العرب منشار=مثل ماقال بالعالم عيال العجز قالوا به
وترى اللي تنظره واطي يشوفك بالمقام حمار=واذا شفت البشر جزمه تشوفك نصف زنوبه
ومن يجعل هروج الناس بأعراض البشر معيار=يشاهد صورة العالم على الشاشات مقلوبه
هروج الناس ماعادت تخاف الواحد القهار=وتصير اكثر روايتهم كلام ضاع مندوبه
يقوله ساقط شاهد كرم غيره وقلبه غار=مثل ماغار قلب اللي لها الكفين مخضوبه
خسيس ولا يلاقي له بديوان العباد انكار=ويظن اهل الندى تنهار للي صاد عرقوبه
سكوت الناس عن ظلم الحواسد للكرام اقرار=يشارك بالذنوب وشرهة العاقل وعذروبه
ولو كان الحكم يرفع على الوجه الرزيل انذار=ويلقى الطرد لا عاد لرداه وكرر اسلوبه
لقيت ادغام عفن الناس لايمكن يصير اظهار=ويشرب بالدلال اللي لغوده غير مربوبه
وتصبح نية الاضمار بهروج الخبيث اخمار=يساوي في عيون الناس عنز غير محلوبه
واذا يعنيك رجل حال دونه بالكلام غبار=وتريد الصدق عن حاله قبل دعواه وهروبه
تشوف اللي عناك امره وعينك بالعرب منظار=وكديش الخيل مايخفى بجانب كل منجوبه
وتطلق في سماء عينك وتفكيرك ثلاث اقمار=تراسل موجة افكارك وتسري في تلسكوبه
جهاز الرصد في فكرك يراجي صورة المسبار=وفكرك يلقط شفرة وتصبح وسط حاسوبه
وتقوى الشوت والتهديف بالمرمى بدون آيمار=ومن شافه يقول اهداف عند الصدق ملعوبه
ولا تصبح كما طير اليا شاهد ظلاله طار=خصوصاً لاظهر شيب الزمان ودار دالوبه
كلام الصدق ماياصل مع العالم ثلاث اعشار=ومنكوس الكلام اليوم تسع اضعاف مسحوبه
واذا صد الرفاقه وانت ماتدري وش اللي صار=فلا تبحث عن اسباب القطيعه ويش ماجوبه
ولا تطلب من العايف يقدم في جفاه اعذار=وعسى رب الملا يسعد مساه ويسمح دروبه
طبوع الناس مخلوطه بصوت الذكر والقيثار=وكلن حسب مقياس البراغي شال سكروبه
مدام العود ماتظهر لحونه قبل خمس اوتار=مع اني مانقلت العود في عمري ولا نوبه
وحكم الخلق واقداره بلوح الواحد الغفار=ورحمة خالق الدنيا بدرب العبد منصوبه
ولا تحكم على المخلوق في جنه ولا في نار=ترى العقال في دار الشقى ماتامن عقوبه
ولو رزق الملا بكفوف راع البنز والفكسار=لقيت اكثر هل الطولات قبل الصرف مشطوبه
لأن اهل الندى والصدق ماله بالعرب مقدار=وتلقى عيشته عند الكلاب السود مكبوبه
واذا حاولت دفع الظلم ماتلقى وراك انصار=بجنب اللي الياشاهد هل الفزعه دفق كوبه
وشفت ارزاق خمسمايه توزع في ثلاث انفار=وحاجات اليتامى من كبار الكرش منهوبه
علف خيله ثلاث شهور يصرف كاش بالدولار=ويكفي قيمة اعلاف الفقارى قبل مشذوبه
يصير الغيث له طبلون بالنسبه وفيه اسعار=وقبل الدفع ماتقطر عليك المزن لو نوبه
اذا ما تم تصديره لقوم تدفع المليار=وناس قالت المخزون ضاع وقل منسوبه
مدام ان الجهل يقصر لك الكيلو ثلاث امتار=وداء الجهل مايمحاه مستر جون وحبوبه
وزيجة شرع رب العرش تغنينا عن المسيار=وعن فتوى الذي يرجي هدايا الشيخ وجيوبه
مدام الزوج والزوجه وشيخ القوم حكمتيار=تعرف ان الطلاق السبت لو ماهي بمكتوبه
على المسيار والمقناص والزاير مع الزوار=وكل اربع وخمس شهور بنت القوم مركوبه
وانا رجواي في رازق كسير الناب والمنقار=يزيل امراض من يربط حبال الحقد وخبوبه
من اللي ترسل الغارات فيها شعوذه واسحار=نسوا وقفة هل التوحيد يوم حصار بعقوبه
وانا جاني رفيق كان عندي من حمام الدار=وشفت اهل الردى والهرج بالقالات عاثوا به
وينقل صوبنا بوك حصيلة محتواه اشعار=وتنسب لي من اللي يعرفون القاف وغيوبه
كلام ساقط مافيه لنفوس الندى معبار=ونسخة عملته داخل بنوك الشعر مضروبه
وانا شاعر ولي بصمه ولي منهج ولي مقدار=يهيض بخافق ينظم بحور الشعر مصبوبه
على نهج الجدود اللي بوقت الشيخ ابن بقار=قبل يطلع قصيد اللي يهيم بزول دبدوبه
بوقت كان مايسمع قصيد العفن والثرثار=ولا صارت بحور الشعر والقيفان مثقوبه
ولا داج القصيد بسوق راع القرش والدينار=وقبل اعراض داء الكذب واستفحال ميكروبه
قصيدي مادخل في بيعة التاجر ولا السمسار=ولا هو سلعة تصبح وسط السوق مجلوبه
اذا هاضت تماثيلي تقول انه هميل امطار=فرايدها عقود الماس فوق نهود رعبوبه
يغوص الفكر بأمواج المحيط الهايج الهدار=لما تظهر بشاشات الحشى والجاش مكتوبه
واذا صبت الهدف قلته بديوان الكرام جهار=ومن يعنيه هذا الامر تاصل نسخته صوبه
وليش اجحد نياشين رميته طايع مختار=لو ان الشتم كلمات لنا ماهيب مرغوبه
ويوم انفي اخبر ذنوبنا اللي بالحياة كثار=واظن النفس ماتحتاج فوق اخطاه وذنوبه
لو ان ذنوبنا صارت بميزان العمل قنطار=تزيله رحمة ماهي عن العاصين محجوبه
ترى اللي يفتح الرادو ويسمع نشرة الاخبار=بها اللي يجعل العاقل يشوف الشرق منكوبه
معمر ثم صالح ثم جيش الطاغيه بشار=يبيد الشعب والجولان عند الخصم مصلوبه
شهيد السبع والستين في قبره بليا ثار=وقيادات العرب كله على العربان محسوبه
دعاية عصر ابوخالد زعيم القادة الاحرار=فخوخه في دروب العلم والخيرات منصوبه
وحرياتهم صارت لهايب ذل واستعمار=على كاهل شعوب في حجيم الهون مغلوبه
غدت مع سربة العدوان باللعبه بدون ستار=وخلت جيشها للجار واهل الدار وشعوبه
صحيح اقبال دنيانا بنظرات الفهيم ادبار=ولو تكشف حقايقها تصيح وتعلن التوبه
ولا ترسي مراكبنا الضعيفه لا وطاه اعصار=ولا كل البشر تضمن مطاعن راس كلوبه
ولكن الاكيد ان الليالي لو تطول قصار=وتبقى النفس لابواب الامل والعيش مجذوبه
واشاور من ركب صهوة جواده داخل المضمار=وسار الدرب بالتجريب والشده ماهو دوبه
يجيب الشور مايشبه قصيد الشاعر المحضار=مدام النار ماحطت وسوم الوقت بجنوبه
وانا لولاي اخبر ان البشر ملفاه خمس اشبار=واخبر الروح ترحل من شقى دنياه مغصوبه
واخبر امثالنا كانت تقول ان الزمن دوار=ونفس الناس ترحل ماخذت بالعمر مطلوبه
اعرف شلون اسدد دين دياني ثمان امرار=سداد ماتوافيه الملامة لو شلق ثوبه
ولكني رفعت النفس عن درب الردى والعار=وثقل العقل والطيبه حلا عمرك ومكسوبه
وباقي جثته لو داج بأسواق الخلايق بار=مدام ان البواقي بالاوادم غير محبوبه
وقاله بندر ابن سرور ذاك الشاعر البيطار=ومع بندر فناجيل اكثر الشعار مشروبه

[خلف الغريب]

راوي الجزيرة ابو فهد ..

اولا الله يحييك بعد غيبة عن ويلان ونشكرك على تواجدك في منتدى الشعراء خصوصا ..

لا ادري بصراحة كيف أحيط تعليقا بهذا البحر المتلاطم والسحاب المتراكم من الشعر في هذا المعلقة التي قل نظيرها ..

الاكيد الذي اعرفه انك شاعر المعجزات وقاهر الكلمات واستاذ الشعر والابيات ...


كثيرة هي الابيات التي اود اقتباسها هنا نظرا لكثرة الابداع في قصيدة عملاقة طولا ومنهجا لكن يكفي ان اقول انها عقد درر طويل يضيء تحت شعاع شمس الحكمة والتجربة ..

تحياتي لك

[سعود المسعودي]

فواز الغسلان

صح لسانك مدد بلا عدد ولافض فوك

تقبل مروري المتواضع

[سالم العنزي]

الشاعر الكبير فواز الغسلان

صح لسانك على هذه القصيده التي سطرت فيها الكثير والكثير من الجمال رغم حدتها الواضحه

الا انها جميله وانت شاعر مبدع لاشك

[بنت راشد]

فواز الغسلان

صح لسانك مدد بلا عدد ولافض فوك
وبارك الله فيك

[سليمان الجعفري]

الشاعر الكبير / فواز الغسلان
صح لسانك ملايين على هذه القصيده التي تحمل الكثير من الجمال
الله يعطيك الف عافيه .. لاهنت
لك تحياتي

[هندي المقبل]

الشاعر والرواي فواز الغسلان

صح لسانك على هذه القصيده التي تضاف الي رصيدك الشعري الجزل والقوي دائما وان كان لايخلو من بعض المشاغبات في الفتره الاخيره وهو مالم نتعوده عن فواز الغسلان الشاعر والرواي الهاديء جدا الذي لايؤثر فيه اي موقف ..ولكن ربما له العذر والقصيده باذخه لاشك وانت شاعر كبير

اسجل حضوري للاعجاب