ملحمة (حرابة الدول) ولدعلي

[مضحي بن دواس]

السلام عليكم ورحمة الله وبركاته

احبتي ابناء العمومة طابت اوقاتكم

قبيلتي عنزة قبيلة عظيمه رفع الله شأنها على مستوى العالم قال رسول الله صلى الله عليه وسلم : ( لا تزال العرب بعزٍ ماعزت ربيعة ) وهذا جلي في عصرنا الحالي فولاة امورنا
هم سنام حكام العرب فمواقفهم وجهودهم جليه للعيان يسعون جاهدين الى كل مافيه مصلحة هذه الامة ...


ابناء ربيعة تاريخكم عظيم فقبيلة عنزة كما اطلق عليها ابنائها هي امة لكثرة عددها وعظم تاريخها ..

تاريخ قبيلة ولدعلي هو جزء من تاريخ قبيلة عنزة وبالتالي تاريخنا واحد وفخرنا واحد
وهنا المحت في قصيدتي الى جزء من تاريخ قبيلة ولدعلي فحسبك انه جزء وكيف الكل بل وكيف بتاريخ عنزة المجيد ...


اتمنى ان ترقى الى مستوى ذائقتكم وافكاركم وانا والله فيها مجتهد ..

للصافيات من المعاني بدعنا = والشعر له معنى ومبنى ومدخال
ولاخير في قولٍ على غير معنى = وهرجٍ بليا اثبات سامج وبطال
نظمت عقد وبالفرايد رصعنا = يزهى بها المنطق عذيات وشهال
الحمد للي بالفضيلة رفعنا = الغرب قبل العُرب ينظر لنا اجلال
ولادعة بين القبايل لمعنا = بتاريخنا يحق نفخر ونختال
للطيب وافعال الكرامة قدعنا = وحنا شربنا للشيم كل فنجال
الله جمع قلوبنا واجتمعنا = والولدعي للولدعي في وظلال
على المباديء والحميا انطبعنا = نثبت عليها لو تحرك لها جبال
واليوم حنا جزء من مجتمعنا = المجتمع كله على قلب رجال
نجدد ولانا لابو متعب واطعنا = ماهو ولاءٍ يحكمة قرش وريال
هذا الوطن من در خيره رضعنا = وحنا لولاة امورنا كلنا عيال
من يعبث بامن الوطن له ردعنا = يرجع ذليلٍ منهزم صاغرٍ ذال
على صحاصيح البسيطة زرعنا = مفاخرٍ لا سولفوا تضرب امثال
من خيبر ونجد العذية طلعنا = يوم النجيدي بالنبا يشكي الحال
"ابن محفوظ اليا وردنا منعنا = ويلان وين انتم ترى حمولنا ثقال
ويوم انتخى خشم القحم والتقعنا = كسر عمود البيت مسطور الابطال
مع جملة الويلان حنا شلعنا = بجيش عرمرم زلزل القاع زلزال
وسرنا عليه وفي دياره فدعنا = ولقن دروسٍ ماطرت له على بال
وسدنا الشمال وللخرايم قطعنا = من ارض الشمال لنجد مرتع ومنزال
بمناخ( سوح ذياب) يوم اجتمعنا = اللي وقف بوجيهنا شاف الاهوال
وربعي ملاذ الي يدور فزعنا = لوتطلبه كل الدول دونه رجال
لوفاضوا عن راينا مارجعنا = حوله هل الملحا كريمين الاسبال
دخيلنا عن الظلايم دفعنا = ونفداه بالروح العزيزة وبالمال
واليا زمى الموقف حما ماخنعنا = نارد على الاخطار رجلي وخيال
لله خضعنا ولالغيره خضعنا = نموت عز ولاحياة بها اذلال
سنة لاخو عذرا عليها اتبعنا = قو الدول ماهزنا ربع مثقال
خديوي مصر لجالنا وله قمعنا = كتايب الاتراك بايمان الابطال
شفنا جحافل جيشهم ماهلعنا = وبالمعركة شافوا الهزيمة والانكال
وحررنا حكمه ولعدوه نزعنا = ورجع على عرشه وهمٍ له انجال
انصادم ادولَ وعليها شرعنا = قانون مايقبل عماله ولا اذلال
امبراطور"نمسا" زارنا بمنتجعنا = مع وفده الرسمي واخذ عندنا ليال
ولادعه عز العروبة طمعنا = نغيّر سياسات ونبدل احوال
وابو عنزة شيخٍ بدوره سطعنا = سلطان سلطان الفخر طيب الفال
ينخى ربوعه للجهاد وبتعنا = وخلَا فرنسا من شجاعته تهتال
من أسرة يشهد لها الكل معنا = تاريخها مثبت ماهو قولٍ يقال
ارخ ابن عباد وحنا اطلعنا = وابن ربيعة دون احداث وافعال
مع جده غنيمان زحنا وقلعنا = قبيلة ٍ من فعلنا شيخها شال
معه عنزه و بنجد فيها درعنا = حاصر بها العارض والاحسا بها اكتال
وبسوق منفوحه شرينا وبعنا = نرفع به الاسعار وننزل بها ادبال
وعقب محمد درعنا لاوقعنا = للي يضيمه جاير الوقت مدهال
اليا شكيناله يحس بوجعنا = يحل عسرات ٍ صعيبات وجلال
وفرحان اخو بقشه بدوره رفعنا = راية معزي يومها ضرب وقتال
ينخى ربوعه للوطن واندفعنا = مع اخو نورة وقفته مابها جدال
شمال غرب المملكة كم ردعنا = ندحر فلول المعتدي بعزم الاشبال
ومحمد الفرحان حبه ولعنا = انا اشهد انه لعنزة غيث همال
وسعود امير الفوج ياما نفعنا = جته عنزة يحدها اشهب اللال
قال : ابشروا ياربعنا بما استطعنا = ووردهم العد الرهاوي بالامحال
للكايدة ياعيال وايل قشعنا = وفتح ابواب ٍ محكماتٍ بالاقفال
بثلاثة شيوخ الشمل اقتنعنا = ادناهم الي للصعيبات حلال
هذي حقايق مثبته مابتدعنا = وشمس الحقايق ماتغطى بغربال
وولالوم ناس تخفي الي صنعنا = بفواهها حنظل وبعيونها خلال
من دلة التاريخ يامستمعنا = الي تقهويته وقم ربع فنجال
ننهج سلوم جدودنا مادنعنا = نمشي على درب الاوايل ونكتال
نحفظ قيمنا والمثل ماستطعنا = نشوم عن درب الردا وخطو الانذال
هذي عوايدنا وهذا سنعنا = مجدٍ نفاخربه على مر الاجيال

.

مضحي بن دواس الولدعي العنزي

.

[سعد النفج]

الشاعر / مضحي بن دواس

الف نعم بك و بولد علي ..

نص فخري رائع ..

يحمل لنا الكثير و الكثير ..

استخدام المفرده كان رائع بالنص و التسلسل اعجبني كثيرا ..

صح لسانك يا مضحي ..

و الله يعطيك العافيه ..

[خلف الغريب]

الرائع مضحي بن دواس ,,

الف صح لسانك وسلمت وبيض الله وجهك ..

الف نعم والله باهل الملحا ولد علي الكرام حرابة الدول هذه القبيلة العظيمة من قبائل عنزة كرم وشجاعة ونخوة وحمية وجميع الصفات الطيبة ,,,

تاريخ قبيلة ولد علي لبنات من ذهب في القصر الذهبي لتاريخ عنزة العظيم ..

تشكر على هذا الجهد الجبار وهذه الملحمة الرائعة وهذا الشعر الجميل ..

[عوض بن خميس]

مضحي بن دواس الولدعي العنزي

ونعم باهل الملحا والنعم مليون بكم فانتم رافد من روافد المجد الوائلى الخالد انشاللة . عنزة هى من تغنى بها الشعراء
من القبائل الاخرى وقد قال الشاعر عايد الشمرى هذة القصيدة الرائعة وقد اعجبتنى وحبيت اوردها بهذا السياق
مع شكرى وتقدير اخى مضحى على قصيدتك الرائعة..
قال الشاعر عايد الشمرى فى مدح قبيلة عنزة

يعني على قولة هل العرف ياحسيـن
****** لاخيـر فـي رجـلٍ بليـا جمـاعـه
ولانـي ولـدت بـدار فكاكـة الديـن
****** اهل الكرم والطيب واهـل الشجاعـه
ويلان لا وردو على المـوت عجليـن
****** فيهـم علـى ورد المنايـا بتـاعـه
الطيبـيـن الطاهـريـن النقـيـيـن
****** الخيـريـن الصادقـيـن السبـاعـه
موفين حق الجـار بالطيـب والليـن
******للجار فـي قـرب النشامـا مناعـه
معهم سليت ورحت بالمذهـب الزيـن
******راحت معاهم حفنـة سنيـن ساعـه
ثلثيـن عمـري راح يـا وي ثلثيـن
******مايـوم جتنـي العايلـه واللكـاعـه
صاروا لي الطف من غطا الجفن للعين
******وارق من حكـي الحديـث بشفاعـه
تحس في قـرب الرجـال المياميـن
******انك اخو من ((دم)) ولا ((رضاعـه))
حمّاية الوضحا مـن اللـي مغيريـن
******لاوين مـن طالـت عليهـم ذراعـه
واجب علي اذكـر فعـول الكريميـن
******اللي شروا كسب المراجـل بضاعـه
مدامنـي وافـي واحـب الوفيـيـن
******وقناعتـي فيهـم تفـوق القنـاعـه
لازم علـيّ اعـد فعـل الحشيميـن
******واترك حديـث الناكسـه والرعاعـه
اترك علوم عفون الاشـوار مهفيـن
******حـق الرجـال الطاهـره بالشناعـه
نقالة الحكـي الملفـق علـى ويـن
******بالهون ياهـل الواطيـه والبشاعـه
ياحسيـن ماتوخـذ قبيلـه بخبلّـيـن
******مادامهـم مـا يـوم جابـو قلاعـه
دحوش الرجـال مقابليـن النساويـن
******اهل الحكي والكذب واهـل الخناعـه
وياحسين قالوا في حديـث القديميـن
******تحشم كـلاب القـوم رغـم الدناعـه
وانـا لـك الله ماسمعـت المقفـيـن
******واللي مشا لـي بـاع دبلّـت باعـه
مايرخـص الغاليـن فعـل الردييـن
******راعه بقلبـي حـب الاجـواد راعـه
ياحسين جيت ونبض كـل الشراييـن
******حب عنزه باعلـى عوالـي رفاعـه
ولاتحسبنـي جيـت لانـي مسيكيـن
******ولا سـلايـل دافعـيـن الرتـاعـه
جيتك ولد مـن روس ربـعٍ عريبيـن
******شبـوب نـارٍ عـالـي بانـدلاعـه
انـا سـلايـل لابــة بالملايـيـن
******بالضبـط امـه كاملـه باتسـاعـه
شمر على عرش المراجـل سلاطيـن
******اسياد عرش الطيب من فـوق قاعـه
ان جت على الفزعات نعمك ونعميـن
******وان جت على المده تموت المجاعـه
ولا جت على وصل الرحـم للقريبيـن
******اقسـم قسـم مـا بالطنايـا قطاعـه
الحاصل ان القلـب مابيـن عرقيـن
******متساويـات بنبضـهـن واندفـاعـه
عرق النسب واسم الطنايا العزيزيـن
******وعرقٍ مع الويلان صعـب انقطاعـه
وامنت في قـول الرجـال الحكيميـن
******مربى الولد يغلب على الاصل طاعـه
ياحسين واللي نـزل الطـور والتيـن
******واللي هدى الانسـان فـن الزراعـه
ماقلتها ياحسين واقصـد بهـا شيـن
******غير الثنـا بالطيـب مامـن طماعـه
حبي لكم ياحسين اصـل المضاميـن
******ومداد حرفٍي مـع سنـاه وشعاعـه
حـرف كتبتـه ورد فـل ورياحـيـن
******وياليت كـل النـاس تقـدر سماعـه
وربـي لرددهـا بـكـل الميـاديـن
******ولو لي بعد قـدره نصيـت الاذاعـه
لاني وفـي عشّـاق طبـع الوفييـن
******وقناعتـي فيكـم تفـوق القنـاعـه
وختامها بالـورد والعطـر ياحسيـن
******مني لكـم ياهـل الوفـايالجماعـه

شكرا الشاعر عايد الشمرى والنعم بقبيلة شمر عامة

[سلامة الجعفري]

صح لسانك ملاييييييييييين


هذي ملحمة وشعر عالي المستوى


واذا قابلتك كأنك ماتعرف بالشعر شي ؟؟

نبغى نحقق معك والا تنزل في شبكة ويلان كل يوم قصيدة من هنا لسنة

اختر بين الامرين عاد ههههه


تقبل مروري

[سالم صالح]

مضحي بن دواس



الف صح السانك على هذه الشاااااامخة بشموخ من هي به ومليااار نعم بك وبولد علي يستاااااهلون الطيب


ملحمة شعرية رااااائعة وهي قليل من كثير في هذا المجد العريق والعتيد



كل التقدير لك اخي

[مضحي بن دواس]

المشاركة الأصلية كتبت بواسطة سعد النفج

الشاعر / مضحي بن دواس

الف نعم بك و بولد علي ..

نص فخري رائع ..

يحمل لنا الكثير و الكثير ..

استخدام المفرده كان رائع بالنص و التسلسل اعجبني كثيرا ..

صح لسانك يا مضحي ..

و الله يعطيك العافيه ..

سعد

اشكر لك مرورك يالغالي وتعليقك العذي

وماعليك زود ونعم بكل القبايل والعوايل

وعافاك الله يالغالي