لاتفرح ان الوقت اسعدك واعطاك.......

[احمد العريفي]

لا تفرح إن الوقت أسعدك واعطـاك=لابـد مـا سـود الليالـي تبكيـك
دنيـا تقلـب علـهـا مـاتـولاك=تمسي عزيز وتصبح امن الصعاليك
إلى اقبلت تخفي عيوبك عن اعداك=وإلى ادبرت تظهر عيوبك لاهاليـك
اغنم من صروف الدهر كانه امداك=قبل اللحد عن ظاهر الارض يخفيك
وترى التشكي للمخاليـق يشنـاك=يحط من قـدرك ويفـرح امعاديـك
وكثر التشره يجعل الناس تجفـاك=ولا عاد تلقى بينهم مـن يخاويـك
ولا تمادى في زعل مـن ترضـاك=مادام جاء عاني على شان يرضيك
ولا تخاوي من علـى ابـوه بـداك=هذاك وان طال الزمان يغـدر فيـك
والجاهل احـذر لاتجادلـه يبـلاك=في كلمة بيـن المخاليـق تعميـك
والهرجه العوجى لو أنـه تنصـاك=حـاول تجاهلهـا وخلـه تعديـك
ولاتخيب هقـوت اللـي تهقـواك=مادام جاء بين المخاليـق ناصيـك
واحذر تهزا يافتى بخلـق مـولاك=تشوفهـا باقـرب قريـبٍ يواليـك
ولاتفرح بزودٍ على الحق وان جاك=زودك ترى نقصٍ على حق ذوليـك
وخل القناعه ميـزةٍ مـن مزايـاك=مـع القناعـه كـل شـيٍ يكفيـك
وان جت لك الدنيا على غير مشهاك=اصبر ترى بالصبر تـدرك امانيـك
لا تأمن الدنيا ترى الوقـت فتـاك=لجا القدر كثر الحـذر مـا ينجيـك

احمد بن عبدالرحمن العريفي
(نديم المجره)

[البدر]

الله على هالابداع

العريفي ما اجزل ماتنطق به

مثل هذا الشعر نادر هذه الايام ... صح لسانك

[علي السابل]

صح لسانك احمد

قصيده تحمل من النضج الفكري والشعري الشئ الكثير


صوت العقل والحكمه وشح هذا الحضور الجميل


تقبل الشكر والتقدير

[بدر العيد]

صح لسانك احمد العريفي امتعتني بحضورك وحكمتك
اسمح لي بحفظها

[سالم صالح]

احمد العريفي


صح السانك وفكرك فانت شاعر تكتب بحكمة ونضوج


لله درك وتقبل تقديري وودي

[سليمان مفضي العنزي]

احمد العريفي

صح لسانك على هذه القصيده التي اكتمل فيها كل معاني الجمال والجزاله

تقبل اعجابي من فضلك

[بدرفهد الجعفري]

الشاعر احمد العريفي

صح لسانك

بصراحه لا اجد كلمه تفي امام هذا الابداع الشعري

ابدعت وامتعت