الشعر ياليل العتب والمشاريه - °~*¤®§(§ شبـــكة ويــلان العـربـيـه §)§®¤*~ˆ°

**صالح السالم** · 20/09/10, (01:54 PM)

الشعر ياليل العتب والمشاريه=من غير موعد جاء يبعثر حروفه
بين الرجاء والياس والحزن والتيه=وليل مباته مشغلاته طيوفه
حلما من احلام البشر وش يساويه=من زود ياسه لاحقته الكلوفه
يرسم خيال لمقبله غير ماضيه=واصعب من بلوغ المرام النكوفه
واللي رست في وسط صدري مبانيه=ماني بسايق في غلاه الحسوفه
من اول ايام الغلا لين تاليه=وشلون ابنسى مونته ومعروفه
تزهر مرابيع الوله من تلبيه=لو طلته ما باعدت عن كسوفه
يا صاحبي والحزن في وجه راعيه=ما بين اللي خافيا وسط جوفه
اقفيت عن صدر فتح لك محانيه=وخليتني لصدوف حزني علوفه
ابعد شراع احلامنا عن مراسيه=والموج عالي والهبايب تحوفه
هذا طريقي وانتي اللي رسمتيه=وصعب المعالج للقلوب الشغوفه
صدري اليا جينا لباقي رجاويه=يزيد قربه منك ويزيد خوفه

**مازن الفهد** · 20/09/10, (04:17 PM)

الله عليك
شاعر و اسلوبك جميل
صح لسانك

**فرحان بن نومس** · 20/09/10, (05:15 PM)

الشاعر القدير صالح السالم

صح الله لسانك واعتلاء شانك قصيده تستحق الاشاده

كلمات مميزه من شاعر مبدع نتمى لك التوفيق

وننتظر جديدك بكل شوق

**خلف الغريب** · 21/09/10, (01:05 AM)

صح لسانك اخوي صالح ..

جميلة كجمال حضورك ..

يرسم خيال لمقبلـه غيـر ماضيـه

واصعب من بلوغ المـرام النكوفـه

اي والله صدقت يا صالح وصح لسانك ملايين

**سالم صالح** · 21/09/10, (02:23 AM)

الراقي / صالح السالم

صح السانك والله يعطيك العافية قصيدة راااائعة وشاعرية مميزة

دائما وانت ترتقي للقمة

تقبل تقديري وودي

**صالح السالم** · 26/09/10, (11:01 PM)

مازن الفهد
فرحان بم نومس
خلف الغريب
سالم صالح

صحت ابدانكم

والف شكر لكم على مروركم المشرف

سعدت بهذا الحضور

وكلامكم وسام على صدري

بيض الله وجيهكم

لكم كل الود والتقدير

**خلف الغريب** · 27/09/10, (09:53 AM)

يا صاحبي والحزن في وجه راعيه

ما بين اللي خافيـا وسـط جوفـه

اقفيت عن صدر فتح لـك محانيـه

وخليتني لصدوف حزنـي علوفـه

صح لسانك يا صالح وابدعت في هذه الوجدانية الجميلة التي تكشف لنا شيئا مما يختلج في الصدر..

رائع كما عهدناك..