الساعه 2:09 صباحاً
الجوال يرن يرن فأسمعه وكأنه بعيد واتجاهله منزعجاً من كوني لم اغلقه كالعاده عند النوم.
الحمدلله صمت الجوال فعاودت النوم مره اخرى وما ان استغرقت بالنوم الا والجوال يرن مره اخرى !!! اووووف من هذا المزعج !! مديت يدي بصعوبه الي الجوال ورآيت فأذا بالرقم المتصل غريب وغير مسجل لدي ! آه اذا لاداعي للرد فأعطيته صامت ! وعدت للنوم !
وما ان وضعت جنبي على الفراش الا والجوال يرن مره ثالثه ! وبما اني لا اطيق ان يزعجني احد وانا نائم فتناولت الجوال بغضب ورديت !!!
الوووووو (بصوت النائم المنزعج)
المتصل : آسفين يبدوا اننا ازعجناك .. لكن حظك هو الذي ازعجك اكثر !!
انا : من معي ؟
المتصل : معك سمو الامير الوليد بن طلال !!!!!
انا : يابن الحلال ترى ماني رايق لك اما قل لي من انت او بقفل !
المتصل : من حقك انك ماتصدق لك انا الوليد !
انا : اوووف يالله مع السلامه !
المتصل : يامقروود لحظه !
(وكأن النوم ذهب وبدأ المخ بالتفكير وكأني اسمع ان هذا الصوت هو صوت الوليد بن طلال الذي اسمعه في التلفزيون وبعدين حسيته انه يعرفني من قال يامقرووود )
انا: عفواً ان كنت الوليد ..لكن الامر يعني مستحيل شوي ..آمر طال عمرك (بصوت مؤدب ومتشكك )
المتصل : من حقك وانا راح اثبت لك اني الوليد وكما قلت لك حظك هو الذي ازعجك واسعدك الليله .
انا : ماذا تقصد ؟
المتصل : لاتقاطعني واتركني اكمل وانت راح تفهم !
انا: طيب تفضل .
المتصل : انا قررت الليله اني اتبرع بمبلغ عشرة ملايين ريال سعودي وقلت ان افضل طريقه اني اتصل على رقم عشوائي وكان الرقم الذي اخترته هو رقم جوالك .
انا: ههههههه شكرا ياطويل العمر خلاص حول لي الفلوس خلني انام (غير مصدق وبسخريه)
المتصل : وانا سوف احول لك الفلوس فوراً . بس اعطني اسمك ورقم حسابك ؟
انا : ابشر عندي حسابات في كل البنوك بس ترى كلها بالسالب
قاطعني بضحكه طويله .
المتصل : ماعليه انا اقلب السالب عندك الي موجب في حياتك كلها !
انا : طيب كل البنوك فيها حسابات اي بنك تبي !
المتصل : عطني اي رقم حساب.
انا : دقيقه ( قمزت للمحفظه وطلعت كروت ارقام الحسابات وتذكرت ان الوليد مساهم في سامبا قلت اعطيه رقم حساب سامبا )
انا : اسمي .. بدر فهد الجعفري العنزي ورقم حسابي وطبعا في بنكك سامبا ياطويل العمر (احسها تملق واضح)
المتصل : ههههههه كل البنوك لي يالطيب المهم بعد دقائق شيك على حسابك وادعي لي .
انا : طيب الله يرزقك . خمس دقائق يعني !!
المتصل : ان شاء الله ههههه .. يالله نخليك تنام .
انا : الله يسلمك .. اكيد ماراح انام .
طار النوم وذهبت لأفتح الكمبيوتر واشيك على الحساب وانا بين مصدق بالغصب!! ويوم فتحت الكمبيوتر وحاولت اتصل بالنت لم يتصل !!!! طفيت المودم شغلته فصلته من الكهرب ..( لايتوفر وصول الي الانترنت) اخخخخخخ
قمت احاول الاتصال بـ 907 وكانت الساعه بحوالي 2:43 دقيقه وعند ماطلبت التحويل لمكالمة الموظف (عزيزي العميل نعتذر منك سوف يخدمك الموظف فور الانتهاء من خدمة العميل الذي معه نقدر لك انتظارك وربما يستغرق اكثر من 15 دقيقه ) خخخخخ بعد الساعه 2 الصباح وفيه عندهم ضغط عملاء ..!
ماعليه وراكم وراكم ننتظر 15 دقيقه .. المهم جلست متسمر عند التلفون وهم يهذرون عليه . فيتامين وجود ومدري وشو ..!!! وبعد مرور 23 دقيقه فصلوا الخط !!!!!آآه لع.. الله .. وكل انواع الشتائم والسب لانها ممنوعه من النشر ماكتبتها !
اخخخ وانا وش عندي غيركم ياشركة الاتصالات نعاود الاتصال !! عاودنا الاتصال وكرروا نفس التسجيل وطبعاُ الانتظار ربما يسستغرق اكثر من 15 دقيقه .. انتظرنا وانا آتامل في كلمة "ربما" هي تشير الي احتمالين ولكنها لدى شركة الاتصالات السعوديه دائم تشير الي احتمال واحد !! اي انه من المستحيل يكلمك الموظف بأقل من المده المحدده!!
المهم بعد 18 دقيقه رد الموظف وكأني اتخيله توه صاحي من النوم !!
انا: الحمدلله قدرت اكلمك طال عمرك !!
الموظف: بماذا استطيع ان اخدمك ؟
انا : يابن الحلال النت مايشتغل عندي !
الموظف : من معي ؟
انا : بدر .
الموظف: دقيقه اشوف لك ؟
(وتركني خمس دقائق وانا كل شوي اقول الوووو ولا احد يرد !! شكله سوى فيني غفوه مثل غفوة الجوال !)
الموظف : اخوي التلفون مقطوع عليه فاتوره !
انا: هو مقطوع من زمان بس dsl كان شغال ليه ماينقطع الا اليوم !
الموظف : نعم اخوي الخدمه انفصلت عنك اليوم ولازم تسدد !
انا : مافي حل اخوي ترجع لي الخدمه بس ساعتين انا عندي عشرة مليون ابي اسدد !!!
الموظف : (اعطاني اشكل ) اي خدمه ثانيه .
انا : انت سويت لي خدمه اولى علشان تقول الثانيه !!
الموظف : مع السلامه تقويم الخدمه معك !
قفلت السماعه بقوه وانكسرت السماعه !!!! خخخخخخ
خساره كنت شاري التلفون قبل شهرين وجديد !! بس ماهي مشكله اشتري تلفون من العشر ملايين !
رجعت للسرير انتظر الصباح ..
اوووو نسيت اقدر استفسر عن الرصيد بالجوال !! دقيت على سامبا .. الحساب من زمان ما استخدمته فأدخلت الرقم السري وطلع خطأ !!
اوووف وادخلته مره ثانيه وطلع خطأ ... يالله حظي الليله سعيد والا نحس !!!
باقي آخر محاوله ادخلته للمره الثالثه والحمدلله طلع صحيح !
ضغطت كم زر بسرعه الاستفسارات وبعدها مدري ايش المهم ...
رصيدكم الان 9996300 كم؟؟؟ كم؟؟ .. اعادة المعلومات !! رصديكم الان 9996300 !!
والله صدق بس ليه ماهو عشر مليون !!! كم ناقص ؟؟
ايه تذكرت بطاقة فيزا كانت مخليه الحساب بالسالب وكنت تارك الحساب علشانها !!
الحمدلله بس لو قلت للوليد يزيد على العشره مليوون 3700 ريال حتى ماينقصون العشره مليون !
يالله مو مهم !
عدت الي السرير واسترخيت قليلاً ,, وبدأت افكر !! ماذا افعل !
طلع الصباح الحمدلله ورحت على طول طلبت اجازه استثنائيه ! وشريت لي عشر اراضي وشريت لي شماغ ماي فير ونظارات ب570 ريال !
والحمدلله فيه بيت حلو رحت وشريته واخيرا ارتحت من الاجار وعطيته المتأخر هالمره دفعت له 5000 مره وحده فأستغرب مني لاني اول مره اعطيه مثل هالدفعه !
عاد قلت لازم اخذ لي جوله سياحيه ودق على الخطوط السعوديه قلت ابي اقرب حجز لسويسرا يالطيب !!
فقال لي .. ماعليش ياخوي مافيه امكانية حتى انتظار لمدة شهرين !!
وش تقول ؟؟؟؟!!!!
قال مافي حجز .. مافي حجز .. مافي حجز .. مافي حجز .. !!!!! فكان يرددها بصوت عالي افزعني من نومي فقمت مرعوبا !!
وانا اصيح بأعلى صوتي "" حتى لو انتظار .. حتى لو انتظار .. حتى لو انتظار ""
فأذا باب الغرفه يفتح علي... وشفيك ... وشفيك !! فاذا انا بشقتي وعلى اسفنجي المتلبد !!
واذا الشمس ساطعه بالغرفه لانه اصلا مافي ستاره !! وعرفت اني متأخر على الدوام واناظر للجوال واذا هي الساعه 9:30 ..
واذا فيه خمس مكالمات لم يرد عليها وست رسائل !!
فوجدت ثلاث مكالمات لمديري بالعمل ! ومكالمة لصاحب الشقه ! ومكالمة للي عنده الجمعيه هالشهر !! فعرفت ان اليوم هو 25 فوجدت بالرسائل
(( تكفى تراني محتاج الفلوس هالشهر )) والثانيه (( ترى مالك عذر عني هذا الشهر لازم تدبر لي اقل شيء 500 ريال)) والثالثه ((رقم حساب بالراجحي )) والرابعه من شركة الاتصالات السعوديه ((عملينا العزيز نود تذكيركم بسداد المستحق على رقم .... بمبلغ 2734 ريال وحساب رقم ...ولمزيد من المعلومات....)) واخرى من موبايلي و... و...مالكم بالطويله ..
ياترى متى يتغير الحال ؟
ياترى متى امتلك بيت لعائلتي ؟
ياترى متى امتلك ارض في وطني الذي اكثر من ثلاثة ارباعه صحراء غير مستغله ؟
ياترى متى تحترمنا شركات الاتصالات وتحسسنا اننا نحن العملاء وهم من يقدمون الخدمه ؟
ياترى من يستطيع ان يقوم بهذا التغيير !!
كنت سعيدا بحلمي تعيساً في واقع مرير !!
اتمنى لا اجد بعد كل هذا من يحسدني على حلمى فهو مجرد حلم فدعونا نستمتع بها !!
.... انتهي...
14/02/11, (07:41 PM)
مكالمتي مع الامير الوليد بن طلال!
العرض العادي
