يقول الجاحظ .. ( ثلاث قبائل من العرب بلغت من الشرف والسؤدد مبلغا لايضرها معه. هجاء او يرفعها به ثناء ( قريش) و( تميم ) و( بكر بن وائل(
مدخل :
طال المرض واستفحلت كل الاورام =كيف الحقايق صار فيها مجادل
اللي صحيح يطيح والكذب قوّام =واشيب عين الحق مافيه عادل
القاعدة تصبح على مر الايام =عقب الشناح اليوم حدر الجنادل
ماهي غريبه والتعاجيب قدّام =ياظلمة التاريخ والزيف سادل
تقليب الطوايل :
ابي وشلون صار العقل مايل = ابي وشلون تقليب الطوايل
هجوسي تضحك وأحيان تبكي =تشوف اللي اشوفه من هوايل
نقول الشمس في كبد الخضيرا=وقالولا ولا فيها مسايل
نقول حوار ويش الام تطلع =وقالو من غبا لاشك حايل
نقول اللي يبا المحّار يبحر =وقالو ناجده بين النثايل
نقول اللي ضمى نعطيه يشرب= وقالو كود مانلقى ثمايل
عقول(ن) ضاربه ماهيب تعمل = ولاهي تنفع بشتى الوسايل
قلوب(ن) حاقده والعين تقدح =وصار كبودهم فيها ملايل
حراميّة تواريخ ومعاهم = مزوّرة الحقيقة والدلايل
وكل الذنب لانّا من سلالة =سلالة ماخذه كل الفعايل
خذت مجد العرب من كل جانب =من الحينه رجوعا(ن) للاوايل
كلو كل المفاخر لابت(ن) لي =ولاخلّو لهم غير القلايل
ولابه مفخره ياكود وحده =وهي تسوى تواريخ القبايل
وهذه مفخرة محد(ن) وصلها =سمت بقريش من بين الحمايل
قريش اللي بعث منها محمد =صلاة الله على واف الخصايل
وكل(ن) له على ماقيل حقّة=من التاريخ مافيها دغايل
ولكنّه رصيد(ن) ويتوزّع=اذا ماقسّم ومابه تحايل
ورى قريش(ن) ابد بالمجد ياتي =تميم اهل الصخى وعيال وايل
تميم اللي ابو القاسم ذكرهم =بمعنى النص او ماكان قايل
اشد الامّة واعنف واقوى=على الدجال واكثرهم صمايل
وايضا لابتي ترثت ربيعة=مواريث الفخر والشك زايل
تقووفي نطاق اسمه((لهازم))=ربيعة في ربيعة دون حايل
ولادم (ن) دخل ماهو ربيعي=قبيلة فخذ او كانت عوايل
وزبدة حلفهم هاليوم لابة=عنوز المجد جذمين(ن) هوايل
ضنا بشر وضنا مسلم وكلن=على مر الزمن صايل وجايل
تكفّي درّة(ن) من كنز ربعي =ابا اذكرها وهي ام الجمايل
اجارو من يطوف الناس يبغا = رجال(ن) تستر اعراض(ن) اصايل
حموهن عزوتي من بطش كسرى =وقالو عندك نجوم القوايل
وهو دولة بهاك الوقت عظمى =بوجه اشبه تقول انها فصايل
طفت نار المجوس بيوم حاسم =قيادات العرب بكر بن وائل
بوجه الفرس دحّو ثم ضحّو =تحرر للعرب من شر طايل
وقايع ثابته محد(ن) جحدها = يكود اللي على الويلان شايل
فلاظنّي احد يورث ربيعة =بهذا الوقت غير عيال وايل
ومن كثّر كلامه في نسبنا=نعده متهم ونقول عايل
ومن لزّق كذا نفسه معانا= بدون اثبات ندّية البدايل
نقول ارقد واذا غطّيت احلم=وسو اللي توده من عمايل
ولكن لاصحيت احذر تصدّق=حلومك وارجع لما كنت آيل
ابي اختم ولا ودّي اطوّل=وابي أعطي خلاصة للمثايل
بتقوى الله كل انسان يرقى=ويلقى نفسه من اهل الفضايل
والا منّه ظلم غيره وزّور=وقام يخوض بانساب وسلايل
يعد آثم وأجره دوم ينقص=وبين الناس يعقبها فشايل
وخير ختام صلى الله وسلم =عدد ماداجت خيول ورحايل
وعدّ اللي طمن واللي تعلّى=على خير البشر دين وشمايل
الختام :
قيل لي : الاستثاء اصبح قاعدة والقاعدة اصبحت استثناء
قلت لهم : اذا غاب الضمير يتغيّر الكثير
والسلام عليكم ورحمة الله وبركاته
كتبه / جمال اللميع
09/05/11, (07:15 PM)
ترثت ربيعة
العرض العادي
